Три криминални групи препродавале дрога на наркозависнисници на подрачјето на Франкфурт и неговата околина, ги користеле истите методи, но дрогата ја продавале на различни подрачја, соопшти Министерката за внатрешни работи, Гордана Јанкулоска која излезе со детали за најновата акција „Диригент“.

Организаторите на овие криминални групи престојувале Македонија од каде ги регрутирале и обучувале членовите и им даваат насоки и инструкции на уличните дилери во Франкфурт и околината.

Првата криминална група ја организирале лица од Велес и по нивни инструкции во Франкфурт и околината била набавувана дрога хероин, како и смеса за мешање на хероинот кој бил нуден на улична продажба на зависници во Франкфурт.

Организатор на втората криминална група е 38 годишно лице од Свети Николе кој во почетокот на ноември 2012 година, организирал мрежа на посредници за неовластено купување и неовластена продажба на хероин во три области во Франкфурт.

Тој наоѓал лица од земјава кои ги испраќал во Франкфурт и по негови инструкции вршеле улична продажба на хероин.

Во третата криминална група како организатори се идентификувани две лица од Велес и Скопје. Во септември 2012 година, тие испратиле 25 годишна девојка од Велес, во Амстердам да набави наркотична дрога хероин и хемиска супстанца, кој го предала на член на групата, подоцна приведен на железничката станица во Франкфурт.

Во последната акција за разбивање на Франкфурт мафијата биле опфатени 62 лица од кои 44 лица во Германија и 18 во Македонија. Од лицата приведени во Германија, 26-мина се македонски државјани.

Во Германија биле запленети 700 килограми смеса за мешање на хероин, 5 килограми чист хероин и над 5 килограми кокаин, како и 30 000 евра. Во Македонија биле запленети 5 килограми хероин кој членовите на групата од Македонија се обидуваа да го внесат од Турција со намера да го транспортираат за Франкфурт, но и помала количина на марихуана и амфетамин.

Претрес е извршен кај 10 лица во земјава, поради сомнеж дека се инволвирани во „Перење пари“, односно дека нивни фирми или фирми кои се во сопственост на нивни блиски биле користени за пуштање во легален промет на незаконски стекнатите пари.

„Од тие причини во истрагата вчера се вклучи и Управата за јавни приходи и Финансиската полиција, а се очекува од нашите партнери од Германија да ни бидат доставени докази за некои трансфери по што ќе бидат комплетирани постапките и против овие лица. Накусо би се осврнала и на трите криминални групи кои дејствувале во Франкфурт“ изјави Јанкулоска.

Вклучувајќи го и последното продолжение на Операцијата „Диригент“, во изминативе четири години приведени се преку 500 членови на Франкфурт мафијата.

Најголемиот дел, околу 460 се приведени на територијата на Германија, Австрија и Холандија. Во земјава од 2009 година наваму се приведени 70 лица. Запленети се преку 220 килограми хероин, 4 килограми кокаин и неколку килограми марихуана. Документирани се трансфери на пари тешки неколку милиони евра, а десетици илјади евра се запленети, како и голем движен и недвижен имот./крај/мвр/фф