Организираната криминална група од Куманово, чии членови, сите роднински поврзани, беа уапсени во средата, „испрале“ четири милиони евра преку изнуда, лихварство и продавање дрога, соопшти во четвртокот министерката за внатрешни работи, Гордана Јанкулоска.

До Основното јавно обвинителство за гонење организиран криминал и корупција поднесена е кривична пријава против првоосомничениот Ф.А. (43) и неговите четири браќа, против две сопруги кои биле вклучени во криминалната група и против шест синови кои, исто така, биле дел од злосторничкото здружение. Тие се товарат дека во периодот од 2004 до 2014 година, се стекнале со голема материјална и имотна полза, вршејќи кривични дела од областа на насилниот криминал-изнуди и лихварство, како и преку недозволена трговија со дрога од Македонија во Швајцарија и пуштање во оптек на нелегално стекнатите парични средства преку сопствени сметки и сметки на правните лица во нивно владение. Судот на сите 13 осомничени им одреди мерка притвор од 30 денови.

Според досега документираните сознанија, информираше министерката, сите членови на семејството биле задолжени за различни криминални активности со цел стекнување на противправна имотна корист вршејќи кривични дела недозволена трговија со дрога, лихварство и изнуди и така стекнатите парични средства ги пуштале во легален платен промет користејќи ги сопствените фирми, банкарски сметки, услуги за брз трансфер на пари. Дел од вака стекнатите средства ги користеле и за купување недвижен имот на Косово.

Од досега преземените мерки утврдено е дека криминалната група го поседува комплекс „Калабрија”, лоциран во кумановското село Романовце, составен од семејна куќа, печатница, пекарница и базен (1.405 квадратни метри), повеќе стамбени и деловни простории во вкупна површина од 2.553 м2, пет куќи, земјиште во државна и приватна сопственост во вкупна површина од 49.890 квадратни метри.

Овој имот приведените го стекнале така што повеќе сопственици на правни лица за градежен материјал, електро материјали и слично ги доведувале во должничко-доверителски односи вршејќи набавка на материјали за градба без да ги платат сумите за извршените градежни работи. На тој начин правните лица ги доведувале во неликвидна состојба и потоа им нуделе парични средства на заем за да продолжат со извршување на дејноста одредувајќи им високи каматни стапки, а со закани и уцени преку другите членови на семејството изнудувале склучување фиктивни договори заверувани кај адвокати и нотари. Освен тоа што доведувале правни лица во неликвидна состојба, осомничените со употреба на сериозни закани во подолг временски период изнудувале парични средства и од повеќе физички лица уценувајќи ги да потпишуваат фиктивни-лажни договори за купопродажба на недвижен имот.

Исто така, со цел остварување противправна имотна корист, од почетокот на формирањето на злосторничкото здружение, организирале и создале мрежа од соизвршители и помагатели која се занимава со транспорт, препродавање и пуштање во промет на хероин во Швајцарија, а парачните средства стекнати од продажбата ги трансферирале користејќи ги услугите на агенциите за брз трансфер на пари.

Во период од 2004 до 2014 година, членовите на оваа криминална група во легалниот банкарски ситем на Македонија преку нивите банкарски сметки како физички лица, како и на жиро-сметките на правните лица со приливи и одливи на денарски и девизни сметки, пуштиле во оптек приближно четири милиони евра, претворајќи ги криминално стекнатите парични средства во недвижна и движна сопственост, а со цел да ги прикријат криминалните приходи и локации на купениот движен и недвижен имот.

Во текот на средата во операцијата „Калабрија” во која учествуваа над 350 полициски службеници, на подрачјето на Куманово од слобода беа лишени 13 лица, а претреси се извршени во вкупно 26 објекти-стамбени и деловни простории, сопственост на истите.

Освен тоа, претреси се извршени и кај пет нотари и две книговодствени бироа за кои постојат индиции дека преку нив се заведувале купопродажните договори и се водело сметководството на правни лица во владение на криминалната група.

Од извршените претреси кај сите лица, до сега пронајдени се парични средства во износ од околу 30 илјади евра, нотеси за лихварска евиденција, купопродажни договори за движен и недвижен имот, нотарски акти, возила, компјутери, оружје, муниција, телефони и др.

„Во соработка со Јавното обвинителство продолжуваме да постапуваме за расчистување на криминалните активности на групата и обезбедување на докази за други кривични дела и идентификување на други членови на криминалната организација”, рече Јанкулоска.

Одделот за сузбивање на организиран и сериозен криминал до надлежното ОЈО поднесе кривична пријава против 13 физички лица: Ф.А. (43) Р.А. (24), А.А. (23), Љ.А. (42) Н.А. (21), Х.А. (44), А.А. (39), Б.А. (20), Н.А. (46), В.А. (23) Б.А. (22), С.А. (35) и Е.А. (32) сите од Куманово поради основано сомнение за сторени кривични дела злосторничко здружување, изнуда, лихварство, недозволена трговија со дрога и пуштање во промет психотропни сусптанции и прекурзори и перење пари и други приноси од казниво дело.

Покрај против физичките лица, поднесени се пријави и против правните лица ДПТУ Калабрија Ферат ДООЕЛ Куманово, Калабрија Кафе пицерија Куманово, Калабрија Хотел Куманово, ДПТУ Петрол Калабрија Куманово, ДТПУ Аризона Компани ДООЕЛ Куманово, Млечен ресторант Куманово, ДТПУ Хотел Рома ДООЕЛ увоз-извоз Куманово, Петрол Рома Куманово, Рома еден Куманово, Рома два Куманово, сите од Куманово за сторено кривично дело перење пари и други приноси од казниво дело по член 273 ст.7 од КЗ на РМ./крај/мф/сд