Фирма од Радовиш откупила 310.300 килограми тутун од 2.024 тутунопроизводители, а исплатата од околу 50 милиони денари никогаш не ја извршила. Фирмата ДПТУ ’Томи-Мит Јака Тобако’ имала забрана за откуп на тутун, но вработена во Министерството за земјоделство му овозможила да ги склучи договорите, соопшти Министерството за внатрешни работи.

Во периодот од 09 до 21 јануари годинава, С.М. (62) од Скопје, сопственик и управител на правното лице ДПТУ ‘Томи-Мит Јака Тобако’ во својство на откупувач склучил договори со 2.024 тутунопроизводители од општините Радовиш, Конче, Струмица, Василево и Штип, при што откупил 310.300 килограми тутун во вредност од 49.833.462 денари кои не ги исплатил во договорениот рок согласно обврските.

Иако правното лице не ги исполнувало условите и имало забрана за вршење на откуп на тутун, К.Т. (52) од Кочани вработена во Министерство за земјоделство, шумарство и водостопанство ја повлекла забраната за откуп со што му овозможила на правното лице да ги склучи договорите и да се стекне со значителна имотна корист.

Секторот за внатрешни работи Радовиш поднесе кривична пријава против правното лице и против С.М. за сторено кривично дело „измама”, С.М.(62) од Скопје за сторени кривични дела „измама” и „злоупотреба на службената положба и овластување” и против К.Т. (52) за сторено кривично дело „злоупотреба на службената положба и овластување”.крај/мф/сд