Деветнаесетгодишно лице е осомничено за убиство на малолетниот Ељон Ј. во скопско Арачиново што се случи во сабота, соопшти во неделата Министерството за внатрешни работи.

Вчера околу 16 часот во Арачиново се случило убиство кое во полиција го пријавил жител на селото. Било утврдено дека жртва е седумнаесетгодишниот Ељон Ј. кој со приватно возило бил пренесен во амбуланта во Синѓелиќ каде што им подлегнал на повредите.

Според првичните сознанија на МВР, извршител на убиството е лицето Р.Ј.(19) кој е во роднинска врска со починатиот. До убиството дошло по претходна телефонска расправија, по којашто починатиот дошол пред куќата на осомничениот, каде продолжиле вербално да се навредуваат и си размениле по неколку удари со боксови по телото, а потоа Р.Ј. извадил пиштол и со два истрела го усмртил Ељон Ј., а потоа избегал.

Од првичниот преглед на телото на починатиот констатирано е дека има две прострелни рани во градите нанесени од пиштол, а на лице место се пронајдени две чаури и еден стап кои се предадени за понатамошна обработка.

Осомничениот денеска е приведен, а пиштолот со кој постои сомнение дека е извршено убиството е даден на вештачење.

По целосно документирање на случајот ќе биде поднесена кривична пријава./крај/мф/сд