Водачот на навивачите на Црвена ѕвезда од групата ’Хиени’, Велибор Дуњиќ (27) е убиен во четврток вечер во Ушче, додека девојката со која бил во автомобилот е тешко ранета, објави Blic.

Полицијата моментно врши увид пред сплавот ‘Џими’ каде што е извршено убиството.

Напаѓачот кој пукал во Дуњиќ додека тој седел во паркирано возило, за сега не е познат. Во пукањето била повредена една девојка на возраст од 27 години која била префрлена во Ургентен центар и истата се наоѓа во животна опасност.

Како што јавува српскиот весник, екипа на Паркинг сервис утрово го однела автомобилот BMW од местото на настанот.

Според првичните сознанија, станува збор за криминална пресметка.

Велибор Дуњиќ е познат по бројни тешки кривични дела. Еден од водачите на навивачката група на Црвена ѕвезда е осуден во декември минатата година на две години затвор поради напад на лидерот на ЛДП, Чедомир Јовановиќ. Претходно бил осуден на четири години затвор поради обид за убиство, а со амнестија е ослободен во ноември 2012 година. Против него се поднесени 40 кривични пријави за дела поврзани со дрога и насилство.

Групата ‘Хиени’ претставува помала фракција, подмладок на навивачите на Црвена ѕвезда и е основана во блоковите 21 и 25 во Нов Белград. Позната е по скратениците ХЦЗ и Х21, а меѓу навивачите на црвено-белите важат за екипа чие време допрва доаѓа.крај/мф/сд