Синоќа околу 21:05 часот, 80-годишниот В.П. од Скопје бил физички нападнат во маркет на подрачјето на општина Центар.

Пензионерот случајот го пријавил во скопската полиција.

МВР презема мерки за целосно расчистување на нападот и идентификација на напаѓачот.

Тетовската полиција поднесе кривична пријава против 47-годишник од Тетово, осомничен дека измамил маж од кичевско кој во април годинава преку страницата на социјалната мрежа „Фејсбук“ договорил нарачка.

Жртвата платила капар од 1.200 евра, а рокот за испорака бил еден месец. И покрај тоа, осомничениот не го исполнил договореното и не ја испорачал нарачката, по што случајот бил пријавен во полиција.

Синоќа околу 20:40 часот, на крстосницата меѓу улиците „Разловечко Востание“ и „Вич“ во Скопје, се случила сообраќајна несреќа во која учествувале две возила „хјундаи“ со скопски регистарски таблички и „шкода“ со српски национални ознаки.

Хјундаито го управувал 52-годишниот В.Л. од Скопје, додека зад воланот на шкодата бил 38-годишниот Р.Ѓ. од Србија, кој моментално престојува во Скопје.

Во несреќата тешко се повредил возачот на хјундаито. Тој бил пренесен во Градската општа болница „8 Септември“, каде што му биле констатирани тешки телесни повреди.

Увид на местото извршила екипа од скопската полиција по наредба на јавен обвинител.