Кога ќе излезам од затвор ќе ве исечам на парчиња, ќе ви ставиме бомба и вие ќе летнете, ова се дел од заканите коишто осудените во случајот „Детонатор“, Јорданчо Михајлов и Жан Железарски и’ ги упатиле на судијката во овој случај, Весна Димишкова при објавувањето на пресудата на 24 декември 2013 година.

Осудените во четвртокот повторно седнаа на обвинителна клупа и им се суди за заканите што и’ ги упатиле на судијката на денот на објавувањето на пресудата.Судијката Димишкова утрово пред Судот детално опиша што се случило и какви закани и упатиле обвинети од случајот „Детонатор“. Негодувањата започнале уште кога почнала со читањето на казните на обвинетите. „И вие ќе седнете на ова место, каде ќе ви оди душата, ова го судите по директива и вие имате семејство, ќе ви ставиме бомба и вие ќе летнете“, рекол Јорданчо Михајлов, додека Железарски и’ порачал дека „по дваесет години, кога ќе излезам од затвор, ќе ве исечам на парчиња од глава до доле“. Иако судијката претходно ги опоменала, ги погледнала директно во очи за да не го нарушуваат редот во судницата, негодувањата продолжиле, а кога судечкиот совет се повлекол за да одлучува за притворот на обвинетите тие продолжиле да и’ се закануваат и да ја навредуваат обвинителката, упатувајќи закани по нејзиниот живот.За заканите кон судијката, дознале и членовите на нејзиното семејство од медиумите, па нејзиното дете не сакало да оди во училиште.„Другарчињата во училиште го прашувале дали навистина мајка му ќе ’летне’. Додека траеше целиот процес, секогаш кога ќе го ставев во погон мојот автомобил си велев ’Фала ти Боже, не летнав’“, раскажа судијката која се плашела да не биде монтирана бомба под нејзиниот автомобил, имајќи предвид дека на дел од обвинетите им се судеше поради тоа што двапати му подметнаа бомба под автомобилот на кочанчанецот Драганчо Стојменов.По објавата на пресудата, припадници на МВР ја предупредиле да не го напушта судот без нивно обезбедување, бидејќи имале сознанија дека околу судот имало групи блиски на обвинетите кои ја чекале. Била спроведена со обезбедување, а една група ја чекала на раскрсницата на Македонската радио телевизија. Потоа одреден период била обезбедувана од полицијата.„По објавата на пресудата. од страв во возилото не дозволував да влезе заедно со мене моето дете, па од него барав да стои надвор од гаражата и да внимава да не го чукнам возилото додека излегувам, му давав да фрли отпадоци“, сведочеше Димишкова.Притисоците до судијката за овој случај почнале уште пред да почне судењето. На 12-ти  септември 2012 година во нејзината канцеларија дошло лице кое и’ објаснувало дека и’ се јавило друго лице од Австрија кое сакало да и’ се пренесе на судијката дека тој ги знае обвинетите од мали нозе дека биле мирни деца и дека „ни на мравка не згазнале. Притисоци имала постојано, за време на судскиот процес и јавно ги опоменала роднините на обвинетите „ да престанат да ми праќаат ’сватови’, оти со тоа ништо нема да постигнат“. Судењето не е тонски и визуелно снимано, но членовите на судската полиција во Судот потврдија дека обвинетите и’ се заканувале на судијката.Обвинетиот Жан Железарски рече дека судијката не ја зборува вистината и дека на интернет имало „две илјади клипови снимени“ од објавувањето на пресудата и на нив се гледало дека нема никаква реакција од ниту еден обвинет.Јорданчо, пак, изјави дека во ниту еден момент не и’ се обратил на судијката , туку кога заминала на консултации по објавата на пресудата, искоментирал дека не е човечки ова што се случило, дека на секој може да му се случи да седне на обвинителна клупа, да биде наместен како што тие биле наместени од страна на Драганчо Стојменов. „Тој нé намести, ни го направи ова, дека има Господ и еден ден сé ќе излезе на виделина. Не знам каде ќе ви оди душата“, искоментирал наводно Михајлов. Во овој случај Железарски е осуден на казна затвор од 14,6 години, додека Јорданчо Михајлов на 12,6 години затвор.Судскиот совет ја објави одлуката за 15-мината обвинети за рекетирање и лихварство, во судскиот процес познат под името „Детонатор“. Во случајот им се судеше на 16 лица за лихварство, рекетирање и обиди за убиство, а двајца од нив беа осудени доживотен затвор./крај/мф/ффс