Во текот на минатата недела, царинските службеници открија три измами, еден обид за нелегален влез на патници и повеќе обиди за криумчарење разна стока, при што привремено се задржани девизи, алкохолни пијалоци, облека, техничка стока, стаклени чаши и фалсификати.

Во три одвоени случаи, при контрола на три патнички возила, пријавени за излез од државата, на граничниот премин Богородица биле откриени 15.500 евра.

Во првиот случај, при контрола на полски автомобил, управуван од полски државјанин, во рачна ташна сместена на совозачкото седиште, биле пронајдени 18.500 евра, за кои не поседувал документ за потекло и потврда за пријавени готови пари на влез во Република Македонија. Согласно законските прописи, на патникот му биле вратени 10.000 евра, износ што нерезидент може слободно да го изнесе од државата, а 8.500 евра биле привремено задржани.

Во вториот случај, при личен претрес на двајца македонски државјани кои патувале со македонски автомобил, во преден џеб од јакната на сопатникот во возилото биле пронајдени 6.000 евра, за кои не поседувал документ за потекло. Согласно законските прописи, на патникот му биле вратени 2.000 евра, износ што резидент може слободно да го изнесе од државата, а 4.000 евра биле привремено задржани.

Во третиот случај, при личен претрес на македонски државјанин, кој управувал македонски автомобил, во паричник сместен во заден џеб од неговите панталони, биле пронајдени 5.000 евра за кои не поседувал документ за потекло. Согласно законските прописи, на патникот му биле вратени 2.000 евра, износ што резидент може слободно да го изнесе од државата, а 3.000 евра биле привремено задржани.

При личен претрес на македонски државјанин кој управувајќи македонски автомобил се пријавил за излез од државата на граничниот премин Табановце автопат биле откриени 3.500 евра. Во внатрешен џеб од јакната на возачот биле пронајдени 5.500 евра, за кои не поседувал документ за потекло. Согласно законските прописи, на патникот му биле вратени 2.000 евра, износ што резидент може слободно да го изнесе од државата, а за сторениот прекршок е поднесено барање за поведување прекршочна постапка.

При контрола на автомобил со привремени германски таблички, управуван од албански државјанин, пријавен за влез во државата на граничниот премин Табановце автопат биле откриени 14,5 литри разни алкохолни пијалаци (Jim Beam од 0,7 л, Јohnnie Walker Red label од 0,7 л, Gorbatschow од 0,7 л, Three Sixty од 0,7 л, Jegermeifter Winterkrauter од 0.7 л  и други). Непријавените пијалаци, пронајдени во куфер, сместен во багажникот на возилото се привремено задржани, а против возачот е поведена соодветна постапка.

Во царинските испостави Табановце автопат – отсек за стоково царинење и Деве Баир – отсек за стоково царинење, пак, откриени се по еден обид за избегнување плаќање на увозни давачки со погрешно декларирање на вредноста на стоката.

Во првиот случај, увозник од Скопје, со две царински декларации во царинската испостава Табановце автопат – отсек за стоково царинење, пријавил за увозно царинење мандарини, со потекло од Хрватска.  Поради сомневање дека декларираната царинска вредност на стоката е нереално ниска, била извршена проверка во базата за царинска вредност на Царинската управа, од каде било утврдено дека идентична стока во приближно исто време била увезена по повисока вредност од декларираната, врз основа на што се изготвени два записници за царинска вредност и пресметани се дополнителни увозни давачки во вкупен износ од околу 34 илјади денари.

Во вториот случај, во царинската испостава Деве Баир – отсек за стоково царинење, увозник од Скопје пријавил за увозно царинење 23.240 кг средства за перење, средства за миење садови и омекнувачи со ознаки на заштитени трговски марки. Нереално ниската декларирана вредност на производите, била причина царинските службеници да се посомневаат дека се работи за фалсификати на заштитени трговски марки поради што истите биле привремено задржани и била поведена постапка за утврдување на нивната оригиналност. Откако било добиено известување дека производите се оригинални, бил изготвен записник за утврдување на царинската вредност и биле пресметани дополнителни увозни давачи во износ од околу 140 илјади денари.

Во царинската испостава Скопје 1 е откриен обид за избегнување на плаќање на увозни давачки со погрешно тарифирање на стока.

Увозник од Скопје пријавил за увозно царинење моторно возило декларирано во тарифна ознака за товарно возило. При извршена контрола на документите и физички преглед на возилото, било утврдено дека истото треба да се распореди во тарифна ознака за патничко (вклучувајќи и комбинирано) моторно возило.  Врз основа на новоутврдената тарифна ознака,  пресметани  се дополнителни увозни давачки  во износ од околу 20 илјади денари.

Во текот на минатата недела, на железничката станица Гевгелија исто така е откриен еден обид за нелегален влез на патници во државата. При контрола на товарен воз со празни вагони, пријавен за влез во државата, биле откриени 5 илегални мигранти со потекло од Сирија, Алжир и Мароко. Мигрантите се предадени на полициската служба од железничката станица, за понатамошна постапка./крај/мф/бс