Директорот на некогашната Дирекцијата за безбедност и контраразузнавање (ДБК), Зоран Верушевски приведен е во петокот доцна вечерта, под сомнение дека нелегално поседувал оружје, за детска порнографија и други кривични дела.

Информацијата ја објави телевизија Алфа, а полицијата за во сабота најави повеќе детали.

Според неофоцијални информации, извршени се претреси во становите на Верушевски во Скопје и во Струга и му бил заппленет неговиот компјутер.

Верушевски, по приведувањето, веднаш е однесен пред истражен судија и јавен обвинител.

Разузнавачот Верушевски во времето на владеењето на СДСМ важеше за еден од главните луѓе од доверба на тогашниот лидер на партијата, Бранко Црвенковски.

Во 2006 година Зоран Верушевски беше именуван за „советник одговорен за безбедносни прашања“ во македонската амбасада во Рим.

Верушевски имаше проблем со однесувањето на неговиот син, Александар, против кого имаше неколку кривични пријави за нелегално поседување на оружје, за нарушување на јавниот ред и мир, за крадење на службеното возило на неговиот татко, за обид за убиство, за изнуда, газење човек со автомобил…

Тој беше осуден на две години затвор, но Црвенковски, како претседател на државата донесе одлуката за неговото помилување. /крај/