Тројца возачи биле приведени за една ноќ поради возење во алкохолизирана состојба, соопшти МВР.

Во Кичево, на улица Борис Кидрич, полицијата запрела „бмв“ управувано од 26-годишен жител на село Зајас, кој имал 2,08 промили алкохол во крвта.

Неколку часа подоцна, во Куманово, полициски службеници го задржале 34-годишен возач на „смарт“ со 3,43 промили.

Во Битола пак, на улица Македонска фаланга, бил приведен 41-годишен жител на Средно Егри со 1,68 промили, откако бил запрен во „мерцедес“ со битолски регистарски таблиички.

„По целосно документирање на случаите, против тројцата возачи ќе бидат поднесени соодветни пријави по член 297-а од Кривичниот законик – безобѕирно управување со моторно возило“, соопшти Министерството за внатрешни работи.

На граничниот премин „Ќафасан“ на македонско-албанската граница при обид за излез од државата, полицијата привела лице за кое имало изречена мерка за апсење од Основниот суд во Гостивар поради сторени кривични дела против безбедноста на луѓето и имотот во сообраќајот, соопшти денеска СВР Охрид.

Според информацијата, вчера во 14 часот на граничниот премин „Ќафасан“, на македонско-албанската граница, при обид за излез од земјата, лишен од слобода е З.Б.(62) од Гостивар.

– По извршени контроли, полициските службеници констатирале дека тој евидира со активна мерка „апси“ и дека има активна наредба од Основниот суд во Гостивар поради сторени кривични дела „тешки дела против безбедноста на луѓето и имотот во сообраќајот“ по член 300 и „безобѕирно управување со моторно возило“, по член 297 од Кривичниот законик, изјави портпаролот Стефан Димоски.

Лицето, додаде, е спроведено во казнено поправната установа „Затвор Гостивар“. 

Неготинец на возраст од 51 година се здобил со тешки телесни повреди вчера наутро при обид со мопед да заобиколи метален предмет што паднал од товарно возило, информираат од Секторот за внатрешни работи – Велес.

-Вчера во ОВР – Неготино е пријавено дека во 7:10 часот, на улица „Фемо Кулаков“, Д.Т., 51-годишен неготинец, управувајќи мопед со неготински регистарски таблици, паднал на коловозот откако се обидел да заобиколи метален предмет што паднал од товарно возило „мерцедес“ со кавадаречки регистарски ознаки, управувано од 36-годишниот Д.Ч. од Кавадарци, кое се движело по улицата, појаснија од СВР – Велес.

Повредениот бил пренесен во Општата болница – Кавадарци, каде му биле констатирани тешки телесни повреди. Увид на местото на несреќата извршила екипа од ОВР – Кавадарци.