Министерот за финансии, Фатмир Бесими, заедно со вицепремиерот за економски прашања, Фатмир Битиќи, министерката за образование и наука, Мила Царовска, министерот за транспорт и врски, Благој Бочварски, министерката за труд и социјална политика, Јагода Шахпаска, министерот за животна средина и просторно планирање, Насер Нуредини, заменик-министерот за земјоделство, шумарство и водостопанство, Трајан Димковски, и членовите на меѓуресорската работна група за подготовка на програмата на економски реформи 2022 – 2024, го одржаа вториот состанок во рамките на процесот на подготовка на програмата.

На состанокот имаше дискусија за предлог-реформските мерки што ќе бидат вклучени во програмата за 2022 – 2024, а ќе бидат насочени кон зелена транзиција, дигитална трансформација, подобрување на деловното опкружување и намалување на неформалната економија, како и унапредување на човечкиот капитал.

Предложените мерки, кои ќе бидат дел од ПЕР 2022 – 2024 година, произлегуваат од препораките што се дел од усвоените заклучоци на годинашниот дијалог за економски политики одржан во јули 2021 година со претставниците на земјите членки на ЕУ, Западен Балкан и Турција, како и оценката на ЕК за програмата на економски реформи 2021 – 2023.

Се дадоа препораки за подобрување на првиот нацрт-текст на предлог реформските мерки. Тие во наредниот период ќе бидат разгледувани во рамките на советодавната мисија на ЕК и дадени на консултации со јавноста.

Ова е континуиран процес што се спроведува заедно со ЕУ и претставува подготовка за учество во процесот на економски и фискален надзор на државите членки на ЕУ со цел спроведување на клучните реформски процеси во земјата, кои ќе го интензивираат дијалогот со ЕУ.

Програмата на економски реформи ја прикажува усогласеноста на среднорочната макроекономска и фискална рамка со секторските структурни реформи за промовирање на конкурентноста и растот. Целокупниот процес на подготовка на документот го координира Министерството за финансии со учество на релевантните државни институции. Програмата треба да биде доставена до ЕК најдоцна до 31 јануари 2022 година.

Продолжува соработката меѓу Државниот завод за индустриска сопственост и Стопанската комора на северозападна Македонија. Директорот на ДЗИС, Горан Герасимовски, и извршниот директор на СКСЗМ, Дрилон Исени, денеска имаа средба на која се прецизираа идните активности.

Со цел подигнување на јавната свест за заштита на правата од индустриска сопственост, експерти од Државниот завод ќе ги посетуваат фирмите членки на Комората. Притоа ќе се објаснуваат бенефитите и процедурите за заштита на трговска марка, како и другите права од индустриска сопственост. Заштитата на правата е основата за успешен развој на секој бизнис. Дополнително, стопанствениците ќе се информираат за можностите за пристап и користење на меѓународните електронски бази, велат од двете институции.

Во рамките на досегашната соработка на овие две тела одржани се работилници за заштита на правата од индустриска сопственост во повеќе градови во Северозападниот Регион и посетени се 57 компании.

Вицепремиерот за економски прашања, Фатмир Битиќи, заедно со градоначалничката на Битола, Наташа Петровска, изврши увид во активностите на потпроектот „Зголемена туристичка понуда на Пелагонискиот Регион преку реставрирање и адаптирање на Офицерскиот дом заедно со партерното уредување“, кој се спроведува во рамките на Проектот за локална и регионална конкурентност, кофинансиран од Владата на Република Северна Македонија и Делегацијата на Европската Унија, а со техничка поддршка од канцеларијата на Светската банка.

Овој потпроект вклучува реставрација и адаптација на Офицерскиот фом во Битола, негово партерно и хортикултурно уредување, промотивни активности, како и градење на капацитетите на чинителите со кои се подобрува развојот на туризмот во Пелагонискиот Регион.

„Денес, правиме увид во завршните работи и сите заедно можеме да се увериме во неговата архитектонска убавина и импозантност, како и да се гордееме дека овде во нашата Битола има ваков репрезентативен објект на кој многумина може да ни завидуваат. Оваа инвестиција е само дел од реализираните активности во рамките на Проектот за локална и регионална конкурентност, кој има цел да ги подобри туристичките потенцијали во 10 дестинации во земјата. Реконструкцијата на објектот и неговата околина чини вкупно 58.792.610,00 денари, од кои 52.913.349,00 денари беа обезбедени од Проектот за локална и регионална конкурентност, а Општина Битола учествуваше со 5.879.261,00 денар. Објектот е реставриран според сите стандарди, почитувани се неговите историски специфики, а слободно можеме да го сместиме меѓу културно-историските богатства на нашата земја. Објектот го одразува духот на овој град, град богат со историја и култура, на битолчани кои се надалеку познати по својот космополитизам и богата градска традиција. Наша заложба како Влада е рамномерен регионален развој бидејќи секој град, секој дел од нашата земја е еднакво важен и треба да се развива. Битола е важна за сите нас и се надевам дека повторно ќе се видиме на заедничка радост“, изјави Битиќи.

„Реставрацијата на Офицерскиот дом му даде ново руво на еден од најпрепознатливите објекти во нашиот град, со што тој повторно ќе стане место што го привлекува интересот на локалните жители и туристите. Ова ќе биде дом на уметноста, во него ќе има низа културни настани, ќе биде отворен за настани на разни организации, на бизнис-заедницата, но и за музејски поставки, кои ќе бидат флексибилни зашто градот изобилува со археолошки наоди, кои се наоѓаат во подрумските простории на нашиот Музеј, некои од нив артефакти, кои ниту битолчани ги немаат видено“, изјави Наташа Петровска, градоначалничка на општина Битола.

Според надлежните, проектот за локална и регионална конкуретност е водечки проект за развој на туризмот во државата преку кој се поддржани 57 потпроекти, кои ги спроведуваат општини, микро и мали претпријатија, како и асоцијации што работат во областа на туризмот во сите 10 туристички дестинации во земјата. Целта на проектот е да го зголеми учеството на туризмот во локалниот економски развој преку подобрување на инфраструктурата, унапредување на капацитетите за сместување и угостителство, збогатување на туристичката понуда и зголемување на конкурентноста на туристичкиот сектор.