Управата за јавни приходи информира дека пилот фазата на националниот систем за е-Фактура успешно се спроведува во реални услови и веќе покажува мерливи резултати кои ја потврдуваат активната подготoвка на деловната заедница за новиот модел на дигитално фактурирање.

До овој момент, за тестирањето се најавени 148 компании, од кои 57 успешно се регистрирани во системот. Од нив, 15 компании активно го користат системот и имаат креирано и доставено 1.115 е-фактури, при што 396 фактури се успешно верификувани преку платформата.

„Овие показатели ја потврдуваат функционалноста и стабилноста на решението во пилот фазата. Компаниите кои се приклучуваат во тестирањето обезбедуваат рана техничка подготвеност пред задолжителната примена на системот, директна поддршка при интеграција, како и можност преку своите повратни информации да придонесат кон финалното унапредување на функционалностите. Раното приклучување овозможува полесна адаптација на ERP и интерните ИТ системи, како и навремена подготовка за целосната имплементација“, велат од УЈП.

Управата за јавни приходи ги повикува ИТ компаниите, ERP провајдерите и економските оператори со сопствени ИТ решенија активно да се приклучат во пилот фазата, да го тестираат API интерфејсот и со своите повратни информации да придонесат кон создавањето на стабилен, сигурен и практичен систем за е-фактурирање кој ќе одговара на реалните потреби на бизнис-заедницата.

Корисни линкови за вклучување во тестирањето:

Техничка документација: https://efakturawiki.ujp.gov.mk

Регистрација и доделување привилегии: https://eujptest.ujp.gov.mk/ureg

Тест платформа: https://efakturatest.ujp.gov.mk

Сугестии и забелешки: [email protected]

„Aктивното учество на компаниите во пилот фазата претставува значаен чекор кон партнерско креирање на модерен, сигурен и ефикасен систем на дигитално фактурирање, кој ќе овозможи поедноставени деловни процеси, намалени административни трошоци и повисоко ниво на транспарентност во економските текови. Управата за јавни приходи ги охрабрува сите заинтересирани економски оператори навремено да се приклучат во тестирањето и да придонесат кон успешна национална имплементација и дополнително унапредување на системот додека сè уште е во тест фаза“, велат од УЈП.

„Алкалоид“ продолжува со зајакнување на меѓународното присуство на eден од најпрепознатливите македонски брендови за бебешка нега „Бекутан“, овојпат преку влез на пазарите во балтичкиот регион, проширувајќи ја успешната глобална приказна преку малопродажната мрежа на „Лидл“.

Со внимателно планиран пласман, производите на „Бекутан“ отсега ќе бидат достапни и за потрошувачите во Летонија и во Литванија, со што се отвора ново поглавје во меѓународниот развој на брендот, зацврстувајќи го неговото позиционирање на европскиот пазар.

Присуството во 111 продажни објекти – 36 маркети во Летонија и 75 во Литванија – претставува јасен показател за обемот и значењето на првиот пласман во овој дел на Европа. Ваквиот развоен исчекор претставува дополнителна потврда за конкурентноста на македонскиот бренд и за неговата способност целосно да одговори на високите стандарди на европскиот пазар.

Реализацијата на проектот е остварена во партнерство со „Лидл“ Македонија, што претставува значаен стратешки напредок во процесот на интернационализација и пример за успешно поврзување на домашниот пазар со европската малопродажна инфраструктура.

Вклучувањето на „Бекутан“ во оваа програма на „Лидл“ претставува силен доказ за стандардите што доследно ги одржува брендот со децении – бескомпромисен квалитет, развој заснован на експертиза и доверба стекната меѓу генерации потрошувачи. Токму овие фактори го позиционираат „Бекутан“ како конкурентен европски бренд со јасен потенцијал и капацитет за одржливо присуство и надвор од традиционалните пазари.

Приказната за „Бекутан“, кој со децении ја гради својата препознатливост врз темелите на сигурноста и нежноста, денес допира до повеќе од дваесет меѓународни пазари. Од Соединетите Американски Држави и Германија, па сè до Скандинавија и Блискиот Исток, брендот континуирано ги потврдува својот углед и довербата на глобално ниво.

Како еден од најпрепознатливите македонски брендови во регионот и пошироко, од своето лансирање во 1978 година со пет основни формулации „Бекутан“ денес прерасна во портфолио со повеќе од 60 типови производи и со повеќе од 100 форми на пакувања, сите клинички и дерматолошки тестирани и развиени заедно со педијатри, неонатолози и дерматолози.

(ПР)

Министерот за европски прашања, Беким Сали, учествуваше на министерскиот состанок посветен на Механизмот за прилагодување на јаглерод на граница (CBAM), каде ја истакна посветеноста на Северна Македонија кон европските цели за декарбонизација и усогласување со климатското и енергетското законодавство на ЕУ.

Состанокот беше организиран од Европската комисија со цел да се информираат земјите од Западен Балкан за најновите случувања поврзани со спроведувањето на Механизмот за прилагодување на јаглерод на граница (CBAM), кој стапи во сила на 1 јануари 2026 година и има директни импликации врз процесот на проширување и енергетските сектори во регионот.

Тој нагласи дека Владата во јануари 2026 година го усвои нацрт-Законот за климатска акција, со кој се поставува правната основа за системот за мониторинг, известување, верификација и акредитација на емисиите, како клучен чекор кон воведување на јаглеродно ценообразување.

Сали посочи дека земјата активно работи и на интеграцијата на електроенергетскиот пазар со европскиот систем, што е важен дел од постепеното вклучување во заедничкиот европски пазар на електрична енергија.
Во однос на CBAM, министерот истакна дека Северна Македонија ги поддржува целите на механизмот, но дека е неопходно да се земат предвид специфичните карактеристики на земјите кандидати и договорните страни на Енергетската заедница, особено поради нивната изложеност на ценовни разлики и техничките предизвици во прекуграничната трговија со електрична енергија.
Тој повика на внимателна и постепена имплементација, вклучително и продолжување на транзицискиот период, со цел да се избегнат несакани ефекти врз регионалните пазари и да се поддржи интеграцијата на обновливите извори на енергија.
Министерот Сали подвлече дека Северна Македонија останува силно посветена на европската зелена агенда и на постепено воведување на инструменти за јаглеродно ценообразување, со крајна цел целосно интегриран, безбеден и декарбонизиран европски енергетски пазар.