Денеска стапи на сила ограничувањето на цената на руската нафта од 60 долари за барел договорено од ЕУ, Г7 и Австралија, како и ембаргото за увоз на руска нафта во ЕУ, со неколку исклучоци.

Одлуката за ограничување на цената на руската нафта на 60 долари за барел овозможува таа да се продава на трети земји користејќи танкери од земјите на Г7 и ЕУ, нивните осигурителни компании и кредитни институции, но само доколку нафтата се продава по цена под 60 долари.

Со оглед на тоа што клучните светски компании за превоз и осигурување се лоцирани во земјите од Г7, ограничувањето на цената може да ѝ отежне на Москва да продава нафта за повисока цена, оценува „Ројтерс“.

Но, Москва предупреди дека нема да ја почитува одлуката, дури и ако треба да го намали производството.

Александар Новак, потпретседателот на руската влада задолжен за енергетика, рече дека „работат на механизми за забрана на употребата на инструментот за ограничување на цените, без оглед на нивото на кое е поставен, бидејќи таквото мешање може дополнително да го дестабилизира пазарот“.

Од друга страна, Украина побара цена од 30 долари за барел, но Западот стравува дека прениската цена може да доведе до тоа Русија да ја повлече суровата нафта од пазарот, што би довело до голем скок на цените.

Украинскиот претседател Володимир Зеленски изјави во саботата дека ограничувањето на цената на руската нафта на 60 долари не е сериозно и тешко дека ќе ја одврати Русија од војната во Украина. Зеленски се пожали дека светот покажал слабост поставувајќи ја границата на 60 долари, што според него ќе го зголеми буџетот на Русија за 100 милијарди долари годишно.

„Овие пари ќе одат за дестабилизација на токму оние земји кои во моментов се обидуваат да избегнат сериозни одлуки“, рече тој.

Ограничувањето ќе го разгледуваат ЕУ и Г7 на секои два месеца.

Ембаргото на ЕУ за увоз на руска нафта беше договорено во јуни како дел од пакетот санкции против Русија поради нејзината инвазија на Украина.

Исклучоците се однесуваат на Унгарија, Словачка и Чешка, три земји членки на ЕУ кои се особено зависни од руската нафта поради нивната географска локација и неможноста да го заменат тој увоз за кратко време.

За два месеца, на 5 февруари, стапува на сила ембаргото за нафтените деривати.

Вечерва завршуваат сервисните и ремонтните активности на генераторот и на другата опрема во ТЕЦ Неготино, и утре во 7.30ч почнуваат активностите за ставање на електраната во функција на производство информира ЕСМ.

„Во договорот со економскиот оператор кој ги изведуваше работите беше наведен 15 декември како датум за завршување на зафатите. Но, со засилен интензитет на работа на економскиот оператор, и зголемен ангажман на вработените рокот е скратен за 10 дена. Во услови на енергетска криза тоа ќе значи економски и енергетски бенефит. Во сервисните и ремонтните активности беа вклучени економскиот оператор Монтинг Инженеринг, вработените во ТЕЦ Неготино, АД ЕСМ, РЕК Битола и консултанти од производителот од Украина. Генераторот е произведен во 1975г и во ТЕЦ Неготино е ставен во употреба во 1978г. Ова е прво отворање и големо ремонтирање на генераторот“, се наведува во соопштението од ЕСМ.

Предлог Буџетот за 2023 година е инфлаторен и неразвоен. Наместо со раст на економијата се фалат со социјална помош и други социјални трансфери, велат од ВМРО-ДПМНЕ преку соопштение.

„Народот од владата чека конкретни резултати, кои ќе значат отворање на нови работни места, развој на економијата и повеќе пари за сите, а тоа не се постигнува со инфлациски буџет и со промашени приоритети.

Во делот на таканаречените капитални инвестиции. СДС секоја година се фали дека наредната година ќе прават градежна офанзива. И тоа секогаш завршува со ниту 50% реализација на предвидените капитални инвестиции.

Ниту еден километар автопат нема направено оваа Влада на СДС 6 години. Ниту една болница, ниту еден објект од општественк значење.

6 години една нова поголема странска инвестиција нема. Се што се отвора во зоните се реинвестиции на веќе постоечките, кои беа дојдени во државата за време на ВМРО-ДПМНЕ.

6 години не може да се направи ниту Клиничката болница во Штип, која беше оставена во фаза на карабина, ниту Клиничкиот центар во Скопје за кој имаше готов проект.

6 години објектите за ФИНКИ и Факултетот за физичко образование, спорт и здравје во дворот на УКИМ се во фаза на карабина, оставени да пропаѓаат.

6 години автопатот Кичево – Охрид не е мрднат од мртва точка.

6 години нема никаков развој. 6 години Македонија тоне со СДС. Затоа потребни се предвремени парламентарни избори и промена на власта“, се наведува во соопштението на ВМРО-ДПМНЕ.