Авиокомпаниите од азиско-пацифичкиот регион поради коронавирусот ќе загубат 27,8 милијарди долари, додека пак побарувачката за авиобилети во тој регион ќе се намали за 13 отсто, покажуваат проценките на Меѓународното здружение на авиопревозници.

Со оглед на тоа дека проценките на растот се проектирани на 4,8 проценти, вкупниот пад на профитот ќе изнесува 8,2 отсто. Загубата на приходот ќе изнесува 27,8 милијарди долари за авиокомпаниите во азиско-пацифичкиот регион, а најголема загуба ќе забележат компаниите од Кина, чии пад на профитот само на домашниот пазар се проценува на 12,8 милијарди долари.

Според податоците, компаниите кои работат надвор од тој регион ќе изгубат 1,5 милијарди долари, под претпоставка дека падот на побарувачката е ограничен само на азиските пазари.

Загубата на глобално ниво ќе изнесува 29,3 милијарди долари, што пак значително ќе ги намали проценките на глобалниот раст за оваа година.

Проценките се, како што се наведува во соопштението, слични на тие за време на епидемијата на САРС. Тогаш 6-месечниот остар пад беше проследен со еднакво брзо опоравување, а во 2003 година САРС беше одговорен за падот на приходите од 5,1 отсто на азиско-пацифичките авиокомпании. Ова се важи доколку се задржи епидемијата претежно во Кина. Ако епидемијата се прошири на азиско-пацифичкиот пазар, тогаш влијанието на авиокомпаниите од другите региони би било поголемо.

Царинската управа во соработка со Државниот пазарен инспекторат, денеска во две акции во Скопје и Тетово заплени 113 килограми тутун и 415 кутии цигари.

Од Царинската управа информираат дека службените лица при вршење на претресот во Тетово биле брутално нападнати од страна на поголема толпа луѓе, кои ѝ се познати на полицијата, и против нив ќе биде поведена соодветна пријава.

„Сериозноста на проблемот и обемот на штетите што нелегалната трговија со тутун и тутунски производи го предизвикува бара од нас континуирани напори за да го спречиме нелегалниот промет на акцизни добра. На овој начин не само што ја штитиме конкурентноста, го спречуваме неплаќањето давачки кон државата, дополнително придонесуваме за заштита на здравјето на луѓето, што може да биде загрозено со употреба на непроверени производи пуштени во промет на нелегален начин“, велат од Царината.

Цигарите и режениот тутун се акцизни производи за кои се плаќа акциза, а кога ќе се најдат во малопродажба, тие мора да бидат обележани со контролни маркички. Акцизите учествуваат со речиси 22 отсто во вкупните даноци што ги прибира државата, а во буџетските приходи акцизите учествуваат со 13 отсто, од кои над 5 отсто се од цигари и тутунски производи. Соодветно на тоа, станува збор за значаен извор на приходи во буџетот на државата.

Од денес граѓаните имаат можност да се информираат за јавниот долг преку новата алатка за транспарентност javendolg.open.finance.gov.mk, која ја изработи Министерството за финансии со поддршка на ИРИ и УСАИД. На страната детаљно се прикажани долгот, неговото движење по години, раздолжувањата, повлекувањата за 2020 и како ќе се финансира.

Министерката за финансии, Нина Ангеловска, на јавната презентација на платформата посочи дека преку целосна фискална транспарентност граѓаните ќе може да ги препознаат непотполните и лажни вести кои се злоупотребуваат за политичко поентирање.

„Силно се залагам за фискална транспарентност и едукација на даночните обврзници, граѓаните за јавните финансии, клучните буџетски документи, што сметам дека е особено важно за млади демократии како нас. Без разлика на економското познавање на граѓаните, податоците се прикажани и систематизирани на едноставен и разбирлив начин сè со цел да бидат јасни за широката публика. Со ваквото лесно разбирливо претставување на податоците за јавниот долг, убедени сме дека ќе придонесеме кон намалување на заблудите што постојат во однос на задолжувањето, нивото и одржливоста на јавниот долг, а воедно ќе придонесеме и кон финансиска едукација на широката јавност“, рече министрката Ангеловска.

Платформата се состои од пет дела: јавниот долг и компонентите од кои се состои, движењето на долгот по години, финансирањето на јавниот долг во 2020, издавањето хартии од вредност и едукативен дел.

На страницата се достапни податоци за средствата што ќе се повлекуваат на домашниот и странскиот пазар во текот на 2020 година, но и дека треба дома и во странство да се отплатат стари долгови во износ од над 700 милиони евра.

Во насока на зголемување на фискалната транспарентност, на платформата се објавуваат податоци, кои претходно не биле објавени, како долгот на јавните претпријатија за секое одделно, како и очекуваното задолжување, раздолжување на претпријатијата во 2020 година.

Исто така, детаљно се објаснети инструментите за финансирање на долгот – државните хартии од вредност и еврообврзниците.

Платформата е достапна на македонски, англиски и на албански јазик, таа ќе се ажурира на месечно и тримесечно ниво во согласност со објавата на разни категории податоци. Инаку, ова е трета алатка за транспарентност пуштена од страна на Министерството за финансии во последната половина година по „Отворени финансии“ и „Реализација на капитални расходи по буџетски корисници“.