Поради скапата струја и растот на берзанските цени на пченицата, меничарите најавуваат дека до крајот на ноември цената на лебот, брашното и печивата ќе порасне за најмалку 10 проценти.

Бараат субвенции за струја или да бидат додадени на регулираниот пазар.

Претседателот на Групација на мелничко-пекарската индустрија во Стопанската комора, Горан Малишиќ рече дека од голема корист би биле и ноќните вишоци што ги продава ЕСМ, зашто 75 отсто од производството на пекарската индустрија се изведува ноќе, пренесе Радио Слободна Европа.

„Во сегашната консталација, берзанската цена на пченицата како основна суровина повторно почна да расне. Од жетвата 2022 цената на француската берза е зголемена за околу 10 отсто, а и зголемувањето во Србија е исто така 10 проценти. Тоа значително ќе ја зголеми цената на брашното и на лебот со печивата за минимум 10 проценти во наредниот период од максимум 40 до 50 дена“, истакнува Малишиќ.

Додава дека залихите на пченица кај приватните субјекти, силоси и мелници се на историски најмал минимум поради намалената домашна жетва во 2022, но и неможноста на мелниците да набават пченица од увоз поради високата цена.

Лидерот на ВМРО-ДПМНЕ, Христијан Мицкоски го покани вицепремиерот задолжен за економски прашања Фатмир Битиќи утре да дојде на состанок во 12 часот во седиштето на неговата партија, со цел детално да му го објасни неговиот планот и концептот, кои „ќе значат закрепнување на економијата и помош на бизнисот”.

„Нудам концепт не само за оваа есен и зима туку и за следната година. Од сето ова политички поени не ме интересираат кога цената е иднината на Македонија и илјадници луѓе чии работни места се под знак прашање. Сакам вистински да се помогне, затоа што работите се пресериозни и поважни од суетата на било кој член на Владата“, вели Мицкоски.

Во објавата на социјалните мрежи, Мицкоски наведе дека побарал средба со Ковачевски за да го презентира концептот за ублажување на последиците од енергетската криза и спас на работни места и го повикал на дебата на тема енергетика/економија на медиум кој сам ќе го одбере, но дека премиерот го одбил тоа со изговор дека сега не било време.

Започна распределбата на картичките за „зелена нафта“, информираше на прес-конференција, Трајан Димковски од Комисијата за земјоделство, шумарство и водостопанство на СДСМ.

Околу 50.000 земјоделски стопанства, вели Димковски, ќе добијат 250 милиони денари или околу четири милиони евра за субвенционирана нафта за земјоделска механизација.

Распределбата ќе се одвива во цел месец октомври со цел земјоделците навремено да ја добијат оваа мерка која значи помали трошоци.

„Со субвенционирата нафта ги олеснуваме условите за работа на домашните земјоделци и поттикнуваме зголемување на домашното земјоделско производство. Тоа е особено важно во време на светска криза, кога се јавува недостиг на храна и земјоделски производи“, рече Димковски.

Истовремено, како што додаде, исплатени се субвенции за 6.396 млекопроизводители во вкупна вредност од над 153 милиони денари. Ова е субвенција за произведено и предадено кравјо, овчо и козјо млеко за периодот март, април и мај 2021 година, а веќе започна подготовката на налозите за исплата за јуни и јули. Висината на директните плаќања изнесува 3,5 денари по литар произведено и предадено кравјо млеко и 4,5 денари по литар за произведено и предадено овчо и козјо млеко во преработувачки капацитети.