На пакетот финанскиска помош за компаниите како дел од четвртиот сет економски мерки се осврна министерот за транспорт и врски, Благој Бочварски, кој присуствуваше на 15. традиционален собир на транспортери во организација на Асоцијацијата „Макам транс“.

Министерот потенцира дека мерките се носат за да им се олесни работата на транспортните компании во време на ковид-кризата.

„Продолжуваме со поддршката за исплата на плати, која важи и за последниот квартал од годината, односно и за октомври, ноември и декември. Поддршката ќе биде одредена според намалувањето на приходите кај компаниите. Колку е поголем падот на приходите опфатени со оваа мерка, толку поголема ќе биде поддршката од државата за исплата на платите и таа ќе се движи од досегашните 14.500 до 21.776 денари. Би сакал да информирам дека на предлог на Министерството за транспорт и врски, ќе се изврши пролонгирање на важноста на лиценците за плус една година дополнително, без надомест. Ова сметаме дека е многу важно за да ги намалиме трошоците“, истакна министерот Бочварски.

Тој информира дека за 2021 година, според квотата на базни дозволи со кои располага Министерството за транспорт и врски, обезбедени се 1.440 годишни дозволи за возила со Евро 6-стандард и 2.280 месечни дозволи за возила со Евро 5-стандард.

„И, уште една работа за која сакам да се осврнам, а тоа е што во соработка со вашата Асоцијација прифативме измена на уредбата која е во владина процедура и која го решева моментот на нераспределани годишни дозволи. И во наредниот период заеднички ќе продолжиме да работиме, веќе разговаравме да формираме работна група, во која учество ќе земат и заинтересираните асоцијации од областа на превозот на патници и превозот на стока и заеднички ќе пристапиме кон изменување на законската и подзаконската регулатива во овие области“, се обрати министерот Бочварски пред присутните транспортери.

Германски правобранител го казни шведскиот моден синџир H&M со 35,3 милиони евра за собирање податоци од приватниот живот на вработените.

„Надзорот бил насочен кон неколку стотици вработени, кои работеле во сервисен центар во баварскиот град Нирнберг“, се вели во соопштението на хамбуршката комисија за заштита на податоците и слобода на информациите.

Уште од 2014 година раководството на H&M во Нирнберг собирало голема количина податоци за приватните животни околности на вработените, вклучувајќи здравствени дијагнози, семејни проблеми и верски убедувања. Деталите често биле евидентирани и дигитално чувани во системот, односно биле достапни на најмалку 50 други менаџери во компанијата, соопштено е во рамките на истрагата.

H&M објави дека инцидентот открил практики за обработка на приватни податоци на вработените, кои не биле во согласност со упатствата и инструкциите на компанијата.

Компанијата во соопштението им се извини на вработените и објави дека ќе ја анализира одлуката на хамбуршкиот правобранител.

Четвртиот пакет-мерки, вреден 470 милиони евра, донесен од Владата предводена од СДСМ, е континуитет на досегашните мерки, но содржи и нови мерки, што значат спас на работните места, поддршка на компаниите, особено на најпогодените од кризата, истакна на прес-конференција портпаролката на СДСМ, Богданка Кузеска.

Како што посочи, една од низата мерки е и зголемувањето на грејс-периодот кај бескаматните кредити од „Ковид-1“.

Со оваа мерка преку Развојната банка на постојните корисници на кредитни линии ќе им бидат обезбедени дополнителни 3 месеци грејс-период пред да почнат со исплата на ануитетите од земените кредити. Покрај одложувањето на бескаматните кредните, предвидено е и дополнително одложување на отплатата на кредитите за компаниите до крајот на годината.

Во новиот сет мерки преку Европската инвестициона банка, за поддршка на домашните компании, обезбедени се и нови 100 милиони евра поволни кредити од Развојната банка, кои ќе бидат пласирани во јануари 2021 година, со исклучително ниска камата.

Кузеска појасни дека со новиот сет мерки продолжува и намалувањето на казнената камата за јавни давачки за половина, односно од 0,03 на 0,015 % и таа ќе важи до крајот на годината.

Продолжува и мерката одложување на плаќањето аконтација на данокот на добивка. Оваа мерка предвидува одложување на плаќањето на аконтациите на данокот на добивка до март 2021 година за компании што имаат пад на приходи поголем од 40 %.

„Во време на сериозна здравствена и економска криза државата застанува зад секој граѓанин и зад секој приватен субјект кој е погоден од кризата. Владата предводена од СДСМ и премиерот Зоран Заев и натаму ќе продолжи со потребната поддршка за сите. Заедно ќе ги надминеме негативните последици врз економијата предизвикани од корона-кризата“, изјави Кузеска.