Сè повеќе Европејци сè потешко врзуваат крај со крај поради растот на цените кои ги намалуваат нивните приходи, се наведува во извештајот на Европската статистичка служба. Уделот на граѓани кои имаат потешкотии да ги покријат основните трошоци е зголемен во вториот квартал во однос на претходните три месеци во осум од 10-те земји на Европската Унија опфатени со истражувањето, објави Евростат.

Намален е само во Словенија и Финска. Податоците до Евростат ги доставија Белгија, Бугарија, Ирска, Франција, Италија, Луксембург, Австрија, Словенија, Словачка и Финска. Според нив, најтешко било во вториот квартал во Бугарија, каде дури 39,8 отсто од испитаниците многу тешко или тешко врзувале крај со крај.

Словачка, Италија и Франција се исто така вклучени во групата земји со повеќе од 20 отсто од испитаниците кои тешко ги покриваат основните трошоци.

Нивниот удел беше најмал во Финска, и изнесуваше 11 проценти. Истражувањето покажало дека дури 40,5 отсто од Финците многу лесно или лесно ги покриваат основните трошоци. Следуваат Австрија и Франција, каде нешто помалку од една четвртина од испитаниците немале проблеми со финансирањето на основните потреби.

Претседателот на Владата на Република Северна Македонија, Димитар Ковачевски, заедно со министерот за транспорт и врски, Благој Бочварски, и заменик-директорот на Јавното претпријатие за државни патишта, Благојче Трпевски, беше на увид на делницата Дреново – Фариш и пробивање тунел на експресниот пат Дреново – Фариш. Втората делница од овој експресен пат е половина завршена и досега сите рокови се запазени. Тунелот кај Фариш, кој беше еден од најтешките делови на оваа траса, е со две цевки, од кои едната е целосно пробиена, а на другата цевка градежните работи течат со предвиденото темпо.

„Северна Македонија денес е во голем инвестициски циклус, целта на Владата е патната инфраструктура во државата да ја подигне на значително повисоко ниво бидејќи, инвестирајќи во патишта, автопати, делници, експресни патишта, инвестираме во развој на економијата во Северна Македонија. Откако успеавме да ги надминеме сите проблеми што ги носеше автопатот Кичево – Охрид, сега градежните активности таму се одвиваат со несмалено темпо, се градат и автопатите Скопје – Блаце, Гостивар – Кичево, Тетово – Гостивар, Требениште – Струга – Ќафасан, Прилеп – Битола, целата оваа патна инфраструктура ја прави Северна Македонија да биде регионално поврзана. Граѓаните веќе ги чувствуваат придобивките од новата патна инфраструктура на експресните патишта: Штип – Радовиш завршена е првата фаза од патот Штип – Крупиште. Во овој момент активно тече изградбата на експресните патишта и Градско – Дреново, Крупиште – Кочани, Ранковце – Крива Паланка. Мојата заложба како премиер е Северна Македонија да биде инфраструктурно поврзана со модерни патишта со цел регион, тоа значи стабилност, тоа значи економски напредок, а само така ќе има квалитетен живот за сите граѓани“, изјави Ковачевски.

Премиерот додаде дека во државата почнаа да се менуваат работите бидејќи оваа земја има европска перспектива, а граѓаните заслужуваат живот според европски правила и европски стандард.

„ЕСМ продажба“ ги испрати по пошта договорите за снабдување по субвенционирана цена до речиси сите јавни основни и средни училишта што поднесоа пријави и кои ги исполнуваа условите, а за чии броила „ЕВН дистрибуција“ одобри снабдување. Тече испраќањето на договорите и на правните субјекти од прехранбената индустрија и тоа за оваа категорија ќе биде завршено до крајот на утрешниот ден. Најмал број пријавени субјекти произлегуваат од водостопанската дејност, кои исто така ќе ги добијат договорите, соопштија од компанијата.

„Субјектите за кои ‘Дистрибуција’ не одобрува снабдување на нивните броила или на дел од нивните броила се известуваат телефонски од страна на ‘ЕСМ продажба’ со цел субјектите да преземат мерки во однос на причините утврдени од ‘Дистрибуција’, а кои се пречка за тоа. Напоменуваме дека бројот на таквите случаи е мал.

„ЕСМ продажба“ нагласува дека сите субјекти пријавени за дополнително снабдување по одлуката на Владата, а кои ги исполнуваат условите и чии броила се одобрени од ‘Дистрибуција’, ќе бидат снабдувани од ‘ЕСМ продажба’ од 1.12.2022, без оглед дали до тој датум ќе им пристигнат договорите по пошта или ќе им пристигнат по наведениот датум. Субјектите се веќе ставени во системот на ‘ЕСМ продажба’ и треба да ги прават своите пресметки за производниот и работниот процес врз основа на новата цена на електричната енергија што ќе ја плаќаат, а тоа е 80 е/MWh за прехранбената индустрија за основните производи и 95 е/MWh за училиштата и водостопанствата“.

Од 1 јануари 2023 година на субвенционирано снабдување ќе бидат приклучени сите субјекти што дополнително ќе се пријават во следниот период, како и оние што при првото пријавување немале комплетни документи и кои ќе ги комплетираат.