Економија
Десет отсто од Германците се зависници од работата

Според новото истражување на Федералниот институт за стручно образование и обука (БИББ) и Техничкиот универзитет во Брауншвајг, околу десет отсто од вработените во Германија се работохоличари. Овие луѓе работат претерано и тешко се исклучуваат од работата и во слободното време. Можните долгорочни последици се повеќекратни, бидејќи зависноста од работа е проблем за сопственото здравје, се истакнува во студијата.
Беатрис ван Берк, коавтор на истражувањето, наведува дека знаците на работохолизам се неможноста да се исклучиме навечер или на одмор, бидејќи когнитивно сè уште сме на работа. Работниците кои се зависни од работата, покажа истражувањето, многу почесто од другите страдаат од физички или психосоматски заболувања – како што се замор, депресија и физичка исцрпеност.
„И ова е многу проблематично бидејќи од други студии знаеме дека физичката и емоционалната исцрпеност е поврзана со исцрпеност и депресија“, вели Беатрис ван Берк.
Според студијата, луѓето на менаџерски позиции се особено погодени кога станува збор за зависност од работа. Од нив 12,4 отсто се работохоличари, а само 8,7 отсто други работници спаѓаат во работохоличари. Зависноста од работата е „поизразена, колку е повисоко раководното ниво“. Вработените во земјоделството и хортикултурата исто така имаат поголем ризик од зависност од работа, „бидејќи во земјоделството работата и животот не се толку одвоени како во другите професионални области“.
Според Ван Берк, многу зависи и од организацијата во која се работи: „Особено во однос на прекумерната работа, важна е културата на компанијата. На пример, важно е да можеш да ги поминеш сите денови на одмор без проблеми, а не да одговарате на е-пошта по одредено време, да сметате дека е во ред да се јавите кога сте болни, кога се чувствувате очајно и кога ви треба време да се регенерирате“.
Компаниите кои не се однесуваат вака ја поттикнуваат зависноста од работа, се наведува во истражувањето. Исто така, опседнатоста со работата на некој начин е знак дека оваа личност не се грижи доволно за себе, а некој што се запоставува себеси и своето здравје тешко може да биде квалитетен и продуктивен работник.
Ваквиот однос кон работата всушност е многу штетен и обично не води до успешни деловни резултати, покажаа голем број студии.
“Живееме во култура која промовира работохолизам. Тоа се сфаќа како напорна работа која треба да се цени и која е од корист на секоја компанија. Но, нашите резултати покажуваат дека таквите луѓе не постигнуваат особено добри резултати. Она што е уште поважно е фактот дека работохолизмот ги уништува луѓето, тие се под стрес, повеќе се склони кон конфликти, имаат нарушено ментално здравје, а тоа често влијае и на нивното физичко здравје“, вели Мелиса Кларк, шеф на истражувањето чии резултати беа објавени во списанието за менаџмент во 2014 година.
Експертите открија дека нема врска помеѓу работохолизмот и поголемата ефикасност и подобрата заработка.
Истражувањето спроведено на Универзитетот во Берген испитало 16.426 вработени возрасни и утврдило врска помеѓу работохолизмот и сериозните психолошки нарушувања.
Поточно, резултатите се следни:
- 37,7 проценти од работохоличарите имаат АДХД (нарушување на дефицит на внимание).
- 33,8 отсто од нив страдаат од анксиозност
- 25,6 проценти од работохоличарите имаат OCD (опсесивно-компулсивно нарушување).
- 8,9 отсто од нив се депресивни.
„Работохоличарите имаат многу поголема веројатност да страдаат од различни психијатриски симптоми отколку оние кои не се работохоличари“, вели истражувачот Сесили Шу Андреасен.
„Пристапувањето кон работата на таков екстремен начин може да биде знак за некои подлабоки психолошки и емоционални проблеми. Сепак, сè уште не е познато дали работохолизмот ги предизвикува овие нарушувања или луѓето со овие нарушувања се повеќе склони да станат работохоличари“, заклучува Андреасен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Божиновска во Вруток: И покрај предизвиците Мавровскиот систем произведе 28% над планот

Министерката за енергетика, рударство и минерални суровини, Сања Божиновска, ја посети Хидроелектраната Вруток, во рамки на нејзините заложби за редовна проверка на сите енергетски капацитети во земјата. Оваа посета е дел од континуираните активности на Министерството за следење на состојбата на клучните енергетски објекти и подобрување на нивната ефикасност.
ХЕЦ Вруток, како најголема електрана во рамки на Мавровскиот хидроенергетски систем, игра стратешка улога во македонскиот електроенергетски систем. Со инсталирана моќност од 165,6 MW и просечно годишно производство од 350 GWh, Вруток е клучен фактор во обезбедувањето стабилност на снабдувањето со електрична енергија.
„Континуираниот надзор и инвестиции во хидроелектраните се суштински за енергетската безбедност на земјата. Нашата цел е да ја зголемиме ефикасноста, сигурноста и одржливоста на хидропотенцијалот што го имаме. Мавровскиот хидроенергетски систем е столбот на обновливото производство на електрична енергија во Македонија, и затоа е важно да се одржува со највисоки стандарди“, изјави министерката Божиновска.
И покрај предизвиците со ниската кота на Мавровското Езеро (2,74 m под нивото од 2023 г.), преку реорганизација и оптимално планирање, ХЕС „Маврово“ постигна производство од 493,27 милиони kWh во 2024 година – за 28% над планот. Ова придонесе за стабилно снабдување со енергија во земјата и задоволување на потребите во периоди на врвна потрошувачка.
Мавровскиот хидроенергетски систем, кој покрај ХЕЦ Вруток ги опфаќа и ХЕЦ Равен и ХЕЦ Врбен, со вкупна инсталирана моќност од 200 MW и годишно производство од околу 450 GWh, претставува еден од најголемите и најсложените во земјата. Водите што се влеваат во езерото се собираат од површина од над 500 километри квадратни од планининските масиви на Кораб и Шар Планина. Водата се пренесува со канали и цевководи долги над 130 километри. Со акумулација од 275 милиони кубни метри вода, овој систем е од критично значење за енергетската одржливост и балансирање на производството од обновливи извори
Во текот на посетата, министерката Божиновска се запозна со тековните активности за одржување и планираните инвестиции во модернизација на постројките. Во последните декади, системот беше предмет на три фази на ревитализација, со вкупна инвестиција од преку 60 милиони евра. Последната фаза од ревитализацијата, завршена во 2014 година, овозможи зголемување на инсталираната моќност за дополнителни 18,58 MW и годишното производство за 40 GWh. Дополнително, ревитализацијата придонесе за намалување на емисиите на CO₂ за 36.400 тони годишно.
Во наредните години, се планира реализација на третата фаза на ревитализација, Овие активности ќе осигурат продолжување на животниот век на објектите, зголемување на нивната сигурност и стабилност, како и дополнителни економски придобивки. Дополнителни приходи од околу 2,5 мил. евра од зголеменото производство и околу 2,5 мил. евра од системски балансни услуги.
Министерството за енергетика, рударство и минерални суровини ќе продолжи со стратегијата за развој на хидроенергијата, а во наредниот период се предвидени нови инвестиции за зголемување на ефикасноста на постоечките капацитети и подобрување на нивната стабилност. Со вакви активности, Министерството го потврдува својот фокус на енергетската транзиција и одржливо производство на електрична енергија.
Економија
УЈП: Поднесете ги ДДВ-04 пријавите навреме, избегнете дополнителни трошоци

Управата за јавни приходи ги повикува сите даночни обврзници да ги достават потребните документи до своите сметководители и навремено да ги поднесат ДДВ-04 пријавите за изминатиот даночен период. Крајниот рок за поднесување на ДДВ-04 пријавата е 25-ти февруари (вторник).
„До вчера до крај на работниот ден од очекуваните 7.396 ДДВ пријави, поднесени се 1.862 што претставува 25% од вкупниот број на ДДВ – 04 пријави за овој даночен период. Ова покажува дека значителен број на обврзници сè уште не ја исполниле својата законска обврска, односно остануваат да се поднесат уште 5.534 ДДВ – 04 пријави“, велат од УЈП.
Управата за јавни приходи апелира до сите даночни обврзници да ги исполнат своите законски обврски навремено, за да избегнат стрес, казни и дополнителни финансиски трошоци.
„Навременото поднесување на ДДВ-04 пријавата е од исклучителна важност за правилното усогласување со даночните прописи, одржување на финансиската стабилност на бизнисите и за развојот на економијата.
Даночните обврзници кои имаат потреба од дополнителни информации или поддршка можат да се обратат на:
Е-пошта: [email protected]
Телефонски броеви:
Од фиксна линија: 0800 33 000
Од мобилен телефон: 02 3253 200
Управата за јавни приходи и нејзините тимови во секое време стојат на располагање за да обезбедат информации со цел успешно исполнување на даночните обврски од страна на даночните обврзници“, се додава во соопштението на УЈП.
Економија
ССК: Поддршката на мали и средни компании со поволни кредити, ќе биде двигател на целокупната економија

Денес во просториите на Сојузот на стопански комори на Македонија се одржа средба помеѓу Претседателот Трајан Ангелоски и раководството на оваа комора и министерката за финансии Гордана Димитриеска-Кочоска, на која стана збор за потребата од поддршка на домашните мали и средни претпријатија за нивниот иден развој.
„Владата, како што е веќе познато, обезбеди 250 милиони евра поволни средства од унгарската Експорт-импорт Банка, со цел да ги поддржи домашните компании, особено во неизвесни услови на глобално ниво. За таа цел веќе ги дефиниравме условите и средствата се веќе достапни на компаниите. Тие средства се значаен поттик за реализација на инвестиции од страна на малите и средни претпријатија, кои се двигателот на нашата економија, а особено што условите под кои се пласираат преку банките, а кои Владата ги договори претходно, се поповолни од оние што се нудат од деловните банки. За истакнување е дека покрај ниската каматна стапка, значаен е и рокот на отплата до 15 години и грејс период до 3 години што ги охрабрува особено малите и средните претпријатија да влезат во реализација на посериозен инвестициски проект”, изјави министерката за финансии, Гордана Димитриоска-Кочоска.
Таа додаде дека средствата се веќе достапни и дека најважно е компаниите да подготват проекти и да аплицираат за поддршка. Со тоа ќе обезбедат средства за својот развој и за поттикнување на економската активност во целина.
„Сојузот на стопански комори (ССК) го смета унгарскиот кредит за еден од најповолните, обезбедувајќи значајна поддршка за бизнисите овозможување нов квалитетен инвестициски циклус. На средбата со министерката за финансии Гордана Димитриеска-Кочоска беше договорено бизнис-секторот да подготви листа со царински стапки за нивно усогласување со европските стандарди.Побаравме даночните процедури да се поедностават, и за царинските стапки кои треба да се хармонизираат, наидовме на големо разбирање”, изјави претседателот на ССК Трајан Ангелоски, на заедничката прес-конференција.
ССК го повтори својот став дека данокот за солидарност беше неоправдано воведен и нагласи дека ја ценат проактивноста на Владата во однос на ова прашање.
На средбата беше заеднички контатирано дека вакви средби на кои се споделуват информации за мерките на Владата се особено важни што на компаниите им дава насоки за условите за работа во иднина и дека овие средби се исто така можност да се разговара за одредени прашања кои претставуваат бариери во работењето на компаниите.