Европската Унија (ЕУ) може да воведе правила за да ги спречи компаниите да ги злоупотребат податоците коишто ги собираат, потврди Европскиот комесар за заштита на конкуренцијата, Маргрет Вестагер.
        
„Ако сакаме да го дефинираме пазарот, да утврдиме што е прифатливо, а што не, тогаш она што ни треба не е поголемо спроведување на законот за конкуренција. Ни треба регулатива“, рече Вестагер.Таа додава дека може да им се потребни и посеопфатни правила за да бидат сигурни дека начинот на кој компаниите ги собираат и користат податоците не им штети на основните вредности на општеството.
        
Нејзините коментари сугерираат дека ЕУ може да воведе нови правила што специфично ги опфаќаат технолошките компании и нивната употреба на податоци.За време на нејзиниот мандат, американските компании Гугл и Калком беа казнети со вкупно околу десет милијарди евра, откако судот откри дека тие ги блокирале конкурентите.

Министерката за труд и социјална политика Мила Царовска, министерот за информатичко општество и администрација, Дамјан Манчевски и директорката на Агенција за вработување, Билјана Јовановска денеска ги презентираа трите јавни огласи за обуки за ИТ вештини кои се дел од Оперативниот план за вработување за 2019 година.

„Наша цел е да ги надградиме вештините на невработените млади лица до 34 години и тоа во област за која има реална потреба на пазарот на труд. Оваа година за првпат мерките за вработување ги правевме заедно со сите засегнати страни за тие да бидат ефикасни и да дадат видливи резултати. За обуки за ИТ вештини имаме предвидено 35.1 милиони денари, ова е неколкукратно зголемување во однос на лани, кога беа издвоени 8.5 милиони денари. Ги охрабрувам сите заинтересирани млади да се пријават и да ги усовршат своите знаења и вештини. Посебно ги охрабрувам младите жени да ја искористат оваа можност и да се стекнат со нови знаења со кои ќе обезбедат сигурни вработувања со високи примања во софтерските компании каде што досега поголемиот дел од вработените се мажи“, истакна Царовска. 
Планираниот опфат на лица за 2019 година е 1.253 невработени млади лица до 34 години. Јавниот повик за учество во Програмата Обуки за развој на дигиталните вештини се објавува денеска и трае до исполнување на опфатот.

Министерот за информатичко општество и администрација Дамјан Манчевски, истакна дека Северна Македонија станува атрактивна ИКТ дестинација.,,Бројот на трговски друштва од ИКТ сектор изнесува околу 2021, од кои 145 се основани во текот на првата половина на 2019 година.
Бројот на вработени изнесува околу 18.000 лица.  Растот на пазарот во ИКТ индустријата во изминатите 5 години е 47%, а вредноста на пазарот на ИКТ е 862 милиони евра. Владата дополнително ги стимулира ИТ компаниите со други мерки, а како една од идните мерки ќе биде намалување на 3% на данокот на добивка”, информираше Манчевски.

Станува збор за неколку различни видови на обуки.Обуки за напредни ИТ вештини: Целта на мерката е преку обука да се задоволат потребите од напредни ИТ вештини, обуки за напредни ИТ вештини (со кофинансирање). Целта на мерката е преку обука да се задоволат потребите од напредни ИТ вештини и воведни Обуки за ИТ вештини (on line).Целта на мерката е преку обука да се задоволат потребите од основни ИТ вештини.

Директорката на Агенцијата за вработување Билјана Јовановска рече дека годинава очекува успешна реализација на обуките и очекува што повеќе апликации во агенцијата. 
„Обуките за напредни ИТ вештини ќе се спроведуваат од страна на тренинг провајдери низ целата територија на државата, зависно од пројавениот интерес кај невработените лица. На лицата кои ќе бидат вклучени во обуките ќе им бидат издадени ваучери за посетување на обука и за полагање на испит. Притоа, кандидатите треба да се пријават за полагање на испитот во рок од 3 месеци од завршувањето на обуката. На лицата кои редовно ќе посетуваат обука ќе им биде издадено Уверение за посетувана обука, а на лицата кои успешно и ќе го положат испитот ќе им биде издаден официјален акредитиран сертификат“, истакна Јовановска. 

Со обуките се нудат нови мрежни технологии и администрање на компјутерски системи, основите за дизајнирање и имплементација на ИТ инфраструктура на најкористената AWS Cloud платформа, практиките на објектно-ориентираното програмирање кое подоцна ќе биде основа за пишување на скриптите во процесот на автоматско тестирање, креирање стратегија на производ базирана на корисничко искуство, да дефинираат функционалности и интеракција во кориснички интерфејс, да изработат прототип на веб проект и да ја тестираат идејата.
Изминатите неколку години оваа мерка од оперативниот план дала одлични резултати и 50 % од обучените невработени лица во моментот се вработени. Од вкупно 202 лица коишто биле обучени во 2016 година во моментот работат 112, а од поминатата обука на 100 лица лани, сега во работен однос се 50.

Заменик претседателот на Владата задолжен за економски прашања, Кочо Анѓушев, во рамките на активностите за презентација на измените и дополните на Законот за финансиска поддршка на инвестициите и предлог – законот за субвенционирање на придонесите од задолжително социјално осигурување по основ на зголемување на плата, ги посети компаниите Руен Инокс Аутомобиле и Пејпер Мил во Кочани, кои последните години бележат раст на приходите и на бројот на вработени.

Двете компании се лоцирани во индустриската зона во Кочани, преземени од сегашните сопственици во незавидна состојба, а во последните години реализираат нови инвестиции со кои се унапредува технолошкиот развој и се зголемува нивната продуктивност.

По разговорите со сопственикот на компанијата Руен Инокс Аутомобиле, Славе Јорданов и посетата на производствените капацитети, вицепремиерот Анѓушев изрази задоволство што само за неколку години од руинирана фабрика, оваа фабрика станала респективен и конкурентен производствен капацитет.

„Оваа компанија секоја година ги зголемува производствените капацитети. Станува збор за една домаќинска организација и поставување на производствен процес. Има простор за дополнително подобрување, особено во осовременување на технологијата и машинскиот парк, но мора да се признае дека многу е направено за кус период. Преку мерките од Законот за финансиска поддршка на инвестициите, кои Руен Инокс Аутомобиле веќе ги користи и има потпишано договор во 2018 година, се дава можност токму за поврат на инвестиции кои се направени за модернизирање и осовременување на производствениот процес. Владата ќе продолжи да ги спроведува мерките за поддршка на компаниите, за нивниот раст и развој, понатамошно зголемување на обемот на производство, затоа што само со развој на компаниите и реалниот сектор можен е побрз и одржлив раст на економијата во државата“, посочи Анѓушев.

Сопственикот на Руен Инокс Аутомобиле, Славе Јорданов, изрази големо задоволство од мерките во Законот за финансиска поддршка на инвестициите и посочи дека поддршката добиена за реализирани инвестиции во 2017 година, е единствена позначајна поддршка која компанијата ја добила од страна на државата досега, како и дека е задоволен од економските политики кои ги спроведува Владата во насока на унапредување на конкурентноста на македонските компании.

Вицепремиерот Анѓушев се сретна и со менаџментот на компанијата Пејпер Мил, на кои им ги претстави мерките од Законот за финансиска поддршка на инвестициите, а особено се задржа на мерките за субвенционирање на повисоки плати.

„Инвестираме во човечкиот капитал, сметаме дека нема економија без квалитетен и мпотивиран кадар. Токму затоа со новите мерки ќе обезбедиме субвенционирање на сите оние компании кои ќе се охрабрат и ќе ги покачат платите на своите вработени. За покачување на платите од 600 до 6000 денари, компаниите ќе треба да го платат само данокот за личен доход, додека останатите давачки за задолжително социјално и здравствено осигурување ќе бидат покриени од страна на Владата. За тоа не треба посебни апликации, сето тоа ќе се прави со едноставни операции за време на уплата на примања на работниците преку клиентскиот софтвер МПИН на Управата за јавни приходи“, нагласи Анѓушев.

Компанијата Руен Инокс Аутомобиле се занимава со производство на делови за автомобили и нуди широк спектар на производи за европската камионска флота, а во моментот во компанијата работат над 200 лица. Пејпер Мил е дел од Unitrade Cluster, водечка компанија во регионот за рециклирање на хартија. Со своите активности во Северна Македонија започнаа во 2016 година, а во моментот имаат околу 100 вработени.