Економија
Милевски: Ќе се инвестираат над 10 милиони евра преку 19 ИПА-проекти во општините

По интензивниот период на подготовки и формално одобрување, денеска го означуваме почетокот на 19 нови проекти, сите финансирани од ИПА инструментот на Европската Унија, рече министерот за локална самоуправа Горан Милевски за време на конференцијата „ЕУ за општините“.
„Осум нови проекти од Програмата ‘ЕУ за општините’ и единаесет проекти од ИПА 2 Програмата за прекугранична соработка меѓу Северна Македонија и Албанија. Проектите, секој со просечна вредност од над 600.000 евра се однесуваат на подобрување на условите за заштита на животната средина, на зголемување на мобилноста, подобрување на социјалните услуги, воведување на е-услуги во општините. Ова е можност во секоја од општините Велес, Радовиш, Тетово, Аеродром, Скопје, Врапчиште, Охрид и Струмица, каде што ќе се имплементираат овие проекти, да се направи разлика во подобрувањето на локалните услуги од што најмногу корист треба да имаат граѓаните“, појасни Милевски.
ЕУ за општините е нова програма преку кој на општините им обезбедивме вкупно 5,5 милиони евра за финансирање на 8-те одобрени проекти. Кофинансирањето го обезбеди Министерството за локална самоуправа со поддршка и на Швајцарската агенција за развој и соработка, со што се создадоа услови за полесен пристап на општините до средствата од Европската Унија.
Исто така денеска ќе бидат потпишани и договорите за кофинансирање на 11 проекти за прекугранична соработка со Албанија од вториот и третиот повик. Вкупната вредност за двете држави е 10,7 милиони евра грант од Европската Унија. Половина од овие средства, преку проекти, ќе се реализираат во нашата држава. Националното кофинансирање од 15 насто за нашите проекти го обезбедува Министерството за локална самоуправа.
„Проектите се партнерски и тоа е нивната додадена вредност, ги имплементираат општини, установи, граѓански организации и со нив се подобруваат условите за живеење во Охрид, Битола, Могила, Демир Хисар, Маврово и Ростуша, Крушево, Ресен, Струга, Врапчиште и Боговиње. Вмрежувањето, партнерствата и градењето на капацитети се заеднички влог во нашата европска иднина, за што очекуваме уште поголема и подиректна поддршка и признание од Европската Унија“, додаде Милевски.
На конференцијата се обратија ЕУ амбасадорот Дејвид Гир, амбасадорката на Швајцарија Вероника Хулман, амбасадорот на Албанија, Фатош Река, претседателката на ЗЕЛС Данела Арсовска, А онлајн се вклучи Јасна Габрич, копретседавач со Заедничкиот консултативен комитет на локални и регионални власти меѓу Северна Македонија и Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски: Имаме раст на извозот, градежништвото и туризмот гарантираат раст на БДП и подобар стандард на граѓаните

Во одговор на новинарско прашање, претседателот на ВМРО-ДПМНЕ, Христијан Мицкоски, истакна дека увозот е многу помал за околу 8% во евра, или за 12-13% во долари, додека пак извозот е во пораст во евра 23%, додека пак во долари е 28%.
„Ако ги споредите првите два месеци април и мај од оваа година, со првите два месеци април и мај од 2024 година, длабоки анализи правиме, ќе видите дека за 80 милиони долари е намален трговскиот дефицит, а тоа е цели 13% и тоа ќе учествува во БДП. Ако на тоа се додаде растот на индустриското производство коешто е во просек за април и мај, првите два месеци од вториот квартал 5,5%, а само во мај 9,4%’’, истакна Мицкоски.
Мицкоски додаде дека растот на туризмот и градежништвото, ќе доведат до зголемување на животниот стандард на граѓаните, но и зголемување на бруто домашниот производ.
„Растот на туризмот повеќе од 20%, инвестициската активност повеќе од 15%, растот и бумот во градежниот сектор, сето тоа нас ни гарантира еден успешен резултат за БДП во вториот квартал којшто очекувам да продолжи и во третиот и четвртиот квартал’’, заклучи Мицкоски.
Економија
Македонската „Green Machines“ ја зацврстува дистрибутивната мрежа во САД

Green Machines на БРАКО, познат по своите иновативни еколошки возила за чистење на јавни површини, бележи сериозен раст на американскиот пазар со мрежа на реномирани дистрибутери низ повеќе од 30 американски сојузни држави.
Најнов партнер е компанијата Mar-co Equipment од регионот на Лос Анџелес, која стана ексклузивен дистрибутер за Јужна Калифорнија.
Моментално, Green Machines има дистрибутери во следниве американски држави:
Owen Equipment – Вашингтон, Орегон, Северна Калифорнија, Невада, Ајдахо, Монтана, Јута, Колорадо, Ново Мексико
Industrial Disposal Supply – Тексас
Mar-co Equipment – Јужна Калифорнија
United Rentals – достапен низ сите држави и територии на САД
Grainger – достапен низ целата територија на САД
Equipment Depot – Луизијана, Мисисипи, Кентаки, Индијана, Охајо, Пенсилванија, Масачусетс, Конектикат, Њу Џерси, Мејн, Вирџинија, Милвоки, Висконсин, Флорида, Орегон, Вашингтон
Van Keppel – Канзас, Арканзас, Илиноис, Висконсин, Ајова
Овој успех претставува уште еден доказ за конкурентноста на македонскиот индустриски производ и неговата технолошка супериорност. Со новите дистрибутерски партнери, Green Machines продолжува да ја шири својата глобална визија за почисти, поеколошки и поефикасни урбани средини.
ПР текст
Економија
Муцунски: Владините политики за извоз даваат резултати – раст од 23,44 отсто во мај

Министерот за надворешни работи и надворешна трговија, Тимчо Муцунски, утрово на социјалните мрежи сподели податоци за кои рече дека го потврдуваат ефектот од економските политики на Владата, при чија реализација значајна улога има и Министерството што го предводи. Статистиката покажува стабилни и позитивни трендови во извозот, дури и во услови на стагнација на европскиот пазар.
Според објавените податоци, македонскиот извоз во мај 2025 бележи раст од 23,44 проценти, додека за првите пет месеци од годината порастот изнесува 3,15 отсто. Во истиот период, увозот е зголемен за само 1 отсто, што упатува на стабилен трговски биланс и позитивно салдо.
„Податоците укажуваат на значително поголем извоз од увоз – што значи повеќе свеж капитал во државата, зајакната девизна позиција и дополнителен поттик за економски раст. Зголемениот извоз отвора нови работни места, го зајакнува домашното производство и ја зголемува конкурентноста на македонските производи“, напиша министерот Муцунски.