Економија
Новото „пежо 2008“ го освои престижното италијанско признание „Ауто Европа“

Триумф за новото „пежо 2008“! Најновиот модел на брендот Peugeot е избран за „Ауто Европa 2021“ од страна на UIGA, Италијанскиот сојуз на автомобилски новинари.
Имено ова е 6-ти модел на PEUGEOT кој ја освои оваа престижна награда, откако „пежо 207“ беше крунисан во 2007 година, 3008 во 2010 година, 208 во 2013 година, 2008 во 2014 година и 308 во 2015 година. Денес оваа награда е доделена на новата генерација на „пежо 2008“, модел кој е исто така многу успешен на италијанскиот пазар каде веќе освои над 20.000 клиенти.
За првпат, покрај членовите на UIGA, на гласањето учествуваа одреден број инфлуенсери, но и јавноста, кои овозможија да се одберат најдобрите од седумте финалисти. Наградата „Ауто Европа“ е наменета за водечки автомобил што е предодреден да стане еден од најголемите играчи на италијанскиот пазар за следната година избран меѓу 15 кандидати, произведен во Европа во најмалку 10.000 примероци.
Новото „пежо 2008“ се истакнува со својот особено иновативен и впечатлив стил. Неговото технолошко ниво достојно за повисоките сегменти и новиот иновативен PEUGEOT i-Cockpit® 3D, го развиваат уште повеќе возачкото искуство. Подеднакво иновативен е и концептот „Power of Choice“, благодарение на кој е можно да се избере помеѓу 100% електричен мотор или од опцијата со внатрешно согорување.
Салваторе Интернуло, Бренд Менаџер на Peugeot во Италија:
„Оваа награда уште еднаш ја потврдува прецизноста на индустрискиот проект на PEUGEOT, кој, со своите платформи и наметлив дизајн, потекнува од новиот автомобилски концепт. Тој е остар автомобил со врвен квалитет, но пред сè со многу високо ниво на технолошка иновација, исто така поврзан со 100% електричен мотор.
Во Италија, за само неколку месеци, 20.000 клиенти веќе го избраа новото „пежо 2008“. Со оваа нова фаза, брендот PEUGEOT значително го зголемува својот имиџ и пазарен удел на италијанскиот пазар“.
(ПР-текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Поевтинуваат секојдневните плаќања за граѓаните и за компаниите, извести Народната банка

Активностите на Народната банка за намалување на надоместоците на банките за електронските плаќања заради нивна поголема достапност и користење веќе имаат видливи резултати за граѓаните и за компаниите. По интензивната комуникација и по намалувањето на трошоците за користење на Македонскиот интербанкарски платен систем – МИПС, банките ги подложија на ревизија своите тарифници намалувајќи ги надоместоците за извршување на платежните услуги, извести Народната банка.
Сите банки веќе усвоија нови тарифници со значително намалени надоместоци за платежни трансакции со платни налози. Имено, надоместоците за плаќањата коишто граѓаните ги извршуваат преку МИПС се намалени во просек за околу 50%, додека електронските плаќања на граѓаните коишто се извршуваат во рамките на истата банка (т.н. интерни плаќања) стануваат бесплатни во најголемиот дел од банките. Надоместоците коишто компаниите им ги плаќаат на банките исто така се намалени. Така, електронските плаќања на компаниите во МИПС стануваат поевтини во просек за околу 30%, додека електронските интерни плаќања за околу 55%. Општо земено, банките преминуваат кон поевтини и фиксни надоместоци по трансакција, коишто се однапред познати и не зависат од износот на плаќањето. Новите поевтини надоместоци се веќе во примена кај дел од банките, а останатите банки планираат да започнат со примена на намалени надоместоци најдоцна до октомври оваа година, велат од НБ.
Овие промени се дел од пошироката визија на Народната банка за дигитализација и модернизација на платниот систем. Поевтините услуги го поттикнуваат користењето на електронските плаќања, ја зајакнуваат довербата во финансиските институции и придонесуваат кон општествено одговорно работење на банкарскиот сектор, се додава во соопштението.
Економија
СДСМ: Инфлација од 4,4 проценти беснее и во август, власта не носи ниту една мерка

Растот на трошоците за живот не запира, статистиката повторно регистрира зголемување на инфлацијата и цените на мало, реагираат од СДСМ.
Како што истакнуваат, според најновите податоци на Државниот завод за статистика, инфлацијата на годишно ниво, односно август 2025 година споредено со август 2024 година, бележи зголемување од 4,4%. Најголемо зголемување има на трошоците за храна и безалкохолни пијалаци од 6,2 %.
„Во истиот период, цените на мало поскапеле за 4,1%. Дури за 6,7% се зголемени цените на мало за прехранбени производи.
Ова е реалноста која ја живеат македонските граѓани – животот станува сѐ поскап, инфлацијата ја јаде куповната моќ.
Ова е резултатот од погрешните и аматерски економски политики на владата предводена од Христијан Мицкоски.
Колку и да сака премиерот Мицкоски да прикаже дека во државата добро се живее, статистиката не лаже, граѓаните ја чувствуваат сиромаштијата на свој грб.
Оваа влада покажа дека ниту има стратегија, ниту капацитет да ја заузда растечката инфлација. Жално е што владата на ВМРО-ДПМНЕ покажа дека нема желба да им помогне на граѓаните и да преземе конкретни мерки за заштита на животниот стандард“.
Според опозициската партија, додека граѓаните прават математики како да го протуркаат месецот, власта се расфрла со народни пари за свои луксузи и партиски интереси.
„Нема пари за повисоки плати, но има пари за милионски тендер за скапа опрема за промоција и организирање на настани.
СДСМ постојано предупредува на растечкиот тренд на инфлацијата и понуди конкретни решенија за раст на платите и намалување на цените, кои владејачкото мнозинство не ги прифати. Сега повторно бараме владата да преземе итни мерки за заштита на животниот стандард, граѓаните не смеат да бидат жртва на погубните политики на оваа власт“.
Економија
Поскапуваат бензините и дизелот

Од ноќеска на полноќ цените на бензините и на дизелот ќе се зголемат за еден денар, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 10.9.2025 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 76,00 (денари/литар)
Моторен бензин ЕУРОСУПЕР БС – 98 78,00 (денари/литар)
Дизел гориво ЕУРОДИЗЕЛ БС (Д-Е V) 69,50 (денари/литар)
Масло за горење Екстра лесно 1 (ЕЛ-1) 69,00 (денари/литар)
Мазут М-1 НС 37,148 (денари/килограм)
Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се намалува за 1,245 ден/кг и сега изнесува 37,148 ден/кг.