Премиерот Зоран Заев денеска во Ресен го означи почетокот на манифестацијата „Преспански јаболкобер 2021“, со што почна годинешната берба на јаболката во Преспа.

„Владата и Министерството за земјоделство шумарство и водостопанство ги креираат сите неопходни политики за поддршка на земјоделството, па така и за стимулирање и развој на овоштарството. Тоа го правиме во континуитет во двата мандата на оваа Влада. Во 2018 година 20 отсто ги зголемивме субвенциите за одржување овошни насади за земјоделците со развоен капацитет, а субвенцијата за предадени јаболка се зголеми од 2 на 3 денари за килограм“, истакна Заев.

„Оваа Влада нема да ги остави земјоделците и овоштарите и секогаш ќе биде во дослух со нивните потреби и реални очекувања. Ние знаеме да го цениме и вреднуваме нивниот труд и придонес за нашата економија. Затоа носиме одлуки што секогаш ќе бидат на страната на земјоделците и овоштарите“, потенцира премиерот.

Посочи дека оваа година и покрај корона-кризата и глобалната економска криза, државата ги исплати субвенциите за овоштарство во износ од речиси 9,5 милиони евра, а реализацијата на Програмата за финансиска поддршка на руралниот развој за 2021 година бележи висок степен на реализација од почетокот на годината.

„Оваа година почна проектот со Светската банка – проектот за модернизација на земјоделството, кој е со вкупна вредност од 46 милиони евра и содржи огромна развојна компонента за земјоделството, со сериозен позитивен импакт врз вкупната домашна економија“, нагласи Заев.

Министерот за земјоделство, шумарство и водостопанство, Аријанит Хоџа, истакна дека Министерството и Владата континуирано го поддржуваат овоштарството и како една од мерките, покрај зголемените субвенции, се и картичките за зелена нафта.

„Конкретно во Ресен се доставени речиси 2.000 картички. Дополнителни придобивки овоштарите имаат и од воведувањето на мерките за мотивација на младите земјоделци и руралните жени, а од особено значење е и усогласувањето на нашата правна регулатива со европската. Конкретно во делот на здравјето на растенијата, што подразбира и намалена употреба на агрохемиски средства, односно помалку пестициди, токму Ресен е пример на успешна интегрална заштита на јаболката и сѐ помала употреба на производите за заштита на растенијата, која во последните 10 години е намалена 30 %“, рече Хоџа.

Туризмот во светски рамки беше една од најпогодените индустрии од пандемијата на Ковид-19 во изминатите две години, но главниот фокус на Владата на Република Северна Македонија преку Министерството за економија како надлежна институција за развој на туризмот беше да се поддржи овој сектор со конкретни мерки и активности. Според сите показатели оваа година, ние ги постигнавме очекуваните резултати. Туристичката сезона беше успешна, рече министерот за економија, Крешник Бектеши, на обраќањето по повод Светскиот ден на туризмот – 27 Септември, кој Министерството за економија традиционално го одбележува секоја година.

„Имајќи ги предвид бројките на туристи и ноќевања, можеме да кажеме дека мерките што се имплементирани дадоа видливи резултати. Според последните статистички податоци, во периодот јануари – јули 2021 година, во однос на истиот период од претходната година, бројот на туристите е зголемен 56,6 %. Во истиот период регистрирани се речиси 320 илјади туристи во земјата, кои оствариле над еден милион ноќевања. Како главни проекти што придонесоа за зголемување на бројот на туристи беа кампањата ‘Дома си е дома“’ и ваучерите за домашен туризам, а кај странските туристи безбедносниот печат (safe travel stamp)“, рече Бектеши.

Тој потсети дека секторите туризам и угостителство и оваа година беа поддржани со директни грантови од страна на Владата сѐ со цел надминување на оваа криза и закрепнување од последиците на пандемијата.

„Можеме да резимираме дека имавме успешна сезона благодарение на политиките и мерките што беа донесени од страна на Владата на Република Северна Македонија во консултација и соработка со приватниот сектор“, рече тој.

Во својот говор го пренесе годинешното мото на Светската туристичка организација за Светскиот ден на туризмот, кое гласи „Туризам за инклузивен раст“ и потенцира дека ова е можност да се види подалеку од статистиката за туризмот и да се признае дека зад секоја бројка стои човек.

„Затоа оваа година ние како Министерство за економија од присутните претставници на коморите и здруженијата конкретни очекуваме предлози и мерки за инклузивен раст и развој на туризмот во нашата земја во постковид-периодот со цел надминување на сите предизвици“, изјави министерот во своето обраќање.

Тој на сите претставници од туристичко-угостителскиот сектор во државата им го честиташе Светскиот ден на туризмот – 27 Септември и им посака успешна работа и плодна година.

Малопродажните цени на бензините „евросупер БС-95“ и „евросупер БС-98“ се намалуваат 1,00 денат/литар, а малопродажните цени на „евродизелот“ (Д-Е V) и на екстра-лесното масло за домаќинство (ЕЛ-1) се зголемуваат 1,00 денар/литар.

Малопродажната цена на мазутот М-1 НС се зголемува 0,599 денари/килограм и сега ќе изнесува 39,780 денари/килограм.

Од 28.9.2021 година, од 00.01 часот, максималните цени на нафтените деривати ќе изнесуваат:

Моторен бензин „евросупер БС-95“ – 72,00 (денара/литар)

Моторен бензин „евросупер БС-98“ – 74,00 (денари/литар)

Дизел-гориво „евродизел БС“ (Д-Е V) – 63,00 (денари/литар)

Масло за горење екстра-лесно 1 (ЕЛ-1) – 65,00 (денари/литар)

Мазут М-1 НС – 39,780 (денари/килограм)