Економија
Туристичките агенции бараат континуирана финансиска поддршка

Лиценцираните туристички агенции и водичи се со крајно лимитирана деловна активност и се соочуваат со многубројни предизвици и голема неизвесност. Туристичко-угостителската комора на Македонија апелира за континуитет на економските мерки кои дадоа резултати за да се спречи загуба на работните места и да се овозможи тие да се дел од петтиот пакет-мерки за економски спас.
Туристичките агенции апелираат да се продолжи со мерките за поддршка на секторот и да нема застој во исплата на финансиската поддршка за плати бидејќи тоа ќе има големо влијание врз задржувањето на работните места и опстанокот на оваа дејност, во која се вработени над 3.000 луѓе во речиси 500 регистрирани правни субјекти.
„Туристичкиот сектор во услови на многубројни бариери за транзит на границите предизвикано од кризата сè уште се наоѓа во исклучително тешка состојба поради што апелираме да се продолжат мерките за поддршка. За опстанок на секторот, неопходен е континуитет, односно да нема застој во обезбедување финансиска поддршка за исплата на плати. Овој сектор се соочува со ограничувања, но веруваме дека со соодветна и навремена финансиска помош од државата, поактивен однос на туристичките оператори и строго почитување на протоколите може да се надминат состојбите и да се зачуваат деловната активност и вработувањата додека да се подобрат состојбите“, изјави Ана Марија Алексова.
Таа посочи дека и за превозниците е од исклучителна важност да има промена на протоколите, односно да се дозволи зголемување на процентот на дозволена исполнетост на капацитет на автобусите.
„Бараме ограничувањето од 50 отсто на дозволената пополнетост на капацитетот на автобусите во меѓународниот и регионалниот превоз да биде зголемено на 75 отсто, со почитување на дополнителните протоколи за заштита, првенствено носење маски. Организирањето на превозот во вакви услови е на работ на рентабилноста, а за споредба, во воздушниот превоз е дозволено капацитетот да биде целосно исполнет“, истакнува Алексова.
Поради намалениот број на туристи и немањето туристички аранжмани, во исклучително неповолна состoјба се наoѓаат и туристичките водичи и придружници.
„На работ на егзистенција сме бидејќи немаме никаква работа, ниту приходи речиси цела година поради што бараме и со петтиот пакет-мерки да продолжи континуитетот на поддршката што ја добивме во форма на неповратна финансиска помош“, изјави Елвир Садиковиќ.
Според последните податоци на Заводот за статистика, бројот на туристите во ноември 2020 година во однос на ноември 2019 година е намален 66,6 %, а бројот на ноќевањата е намален 64,5 %. Во периодот јануари – ноември 2020 година, во однос на истиот период од претходната година, бројот на туристите е намален 61,2 %, и тоа кај домашните туристи има намалување од 20,3 %, а кај странските има намалување од 84,4 %. Туризмот е значајна гранка во националната економија и претставува голем потенцијал за поттикнување на нејзиниот раст, но се покажа за исклучително чувствителен на надворешни влијанија, како што е актуелниот случај на кризата предизвикана од глобалната пандемија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Одобрена финансиска поддршка од 50 милиони денари за радијата и телевизиите

Владата, во рамките на 48. седница, денеска донесе одлука за одобрување средства од буџетот во износ од 50.000.000 денари на Агенцијата за аудио и аудиовизуелните медиумски услуги (АВМУ) како поддршка за справување со кризата предизвикана од коронавирусот.
Како што информираат од владината прес-служба, овие средства се наменети за реализација на мерката 3 од петтиот пакет економски мерки, со која ќе им се обезбедат средства за финансиска поддршка на радиодифузерите за надомест на средства платени по основ на такси, давачки и надоместоци за вршење радиодифузна дејност и кои се документирани во финансиската евиденција на АВМУ.
Притоа се задолжува Генералниот секретаријат на Владата средствата од оваа одлука да ги уплати на наменска сметка на АВМУ.
Во согласност со одлуката, овие средства Агенцијата треба да ги искористи исклучиво за намената за која се доделени, односно за надоместување на средствата што не се реализирани по основ на наплата на такси, давачки и надоместоци за вршење радиодифузна дејност и кои се документирани во нејзината финансиска евиденција.
За искористувањето на средствата, Агенцијата ќе треба да достави извештај до Владата во рок од 15 дена од завршување на активностите.
Во извештајот ќе биде потребно поединечно да се набројат секој од радиодифузерите со висина на надоместокот што го должел и е покриен со средствата од оваа одлука, како и бројот на фактурата со кој тој бил задолжен.
Агенцијата е должна да достави примерок од извештајот и до Управата за јавни приходи за потребите на системот на данокот на додадена вредност и реализација на целите на данокот на додадена вредност.
При утврдени неправилности и ненаменско користење на средствата потребно е АВМУ средствата да ги врати во буџетот.
Економија
Средба на претседателот Пендаровски со стопанските комори

Претседателот Стево Пендаровски денеска ги прими претседателите на четирите стопански комори коишто се дел од Платформата за јавно-приватен дијалог.
Претседателите на коморите на претседателот Пендаровски му ги презентираа прогнозите и предизвиците со кои би се соочиле во 2021, со осврт на минатата исклучително тешка година, како на здравствена, така и на економска основа.
Претседателите на коморите информираа за своите анализи и очекувањата на бизнис-секторот, за динамиката по која ќе се одвива увозот и извозот на стоки и услуги.
На средбата се разговараше и за владините интервенции во вид на пакети за помош на бизнис-секторите погодени од Ковид-19.
Истовремено, коморите од Платформата за јавно-приватен дијалог посочија дека треба да се намали бројот на закони кои се носат по брза постапка, а коишто се однесуваат на стопанството. Во оваа насока, претседателот Пендаровски изрази подготвеност за консултација со која било од коморите при потпишување на указите на законите кои регулираат поединости во бизнис-секторот.
На средбата присуствуваа Бранко Азески, претседател на Стопанска комора на Македонија, Неби Хоџа од Стопанската комора на северозападна Македонија, Данела Арсовска, претседателка на Сојузот на стопански комори и Анета Антова-Пешева, претседателка на управниот одбор на МАСИТ.
Економија
Промовирана нова мобилна апликација за заштита на правата на потрошувачите

Институтот за стратешки истражувања и едукација ја промовираше новата мобилната апликација за заштита на правата на потрошувачите – Potroscuvaci MK која е достапна на македонски и албански јазик.
Претставникот на Институтот, Дарко Спасевски, ја нагласи потребата од континуирано градење на капацитетите и обуката на човечките ресурси како и поголемото учество на граѓанскиот сектор во телата на овие институции.
Христина Конеска-Бероска, претставник на Секретаријатот за европски прашања ја истакна важноста на заштитата на потрошувачите во претпристапните преговори со ЕУ.
На настанот се обрати и претставничката на проектот „Нордиска поддршка за напредок на Северна Македонија“ Шерифе Исмаили-Касапи која кажа дека заштитата на правата во Европската Унија се врши преку заштита на нивните економски интереси, како и со постојано едуцирање на граѓаните. Таа исто така нагласи и дека преку хармонизација на нашето законодавство со она на Европската Унија ќе се доближиме до ЕУ стандардите за заштита на потрошувачите.
Покрај мобилната апликација, беа промовирани и Извештајот од мониторингот на седум клучни институции за правата на потрошувачите како и други резултати од проектот „Чувар на правдата за потрошувачите“, пет водичи за правата на потрошувачите, новата веб страница www.zastitanapotrosuvaci.mk и други анализи и препораки за унапредување на политиките за заштита на потрошувачите.
- Книги2 месеци
Македонски лекар ја објави последната исповед на Јосип Броз Тито
- Македонија3 месеци
МЖСПП: Мечкиното грозје важен ресурс, кој треба грижливо да го собираме
- Црна хроника3 месеци
Млада девојка од Штип пронајдена мртва во нејзиниот дом
- Македонија3 месеци
(Видео) Отстранети два нелегално изградени објекта во општина Центар
- Македонија2 месеци
Возачот на „бентлито“ што „влета“ на плоштад казнет со 45 евра, објавена фотографија од записникот
- Регион2 месеци
(Видео) Прекината прес-конференција на градоначалникот на Бања Лука: „Луѓе ова е сериозен земјотрес“
- Регион2 месеци
(Видео) Снимен моментот на потресот во Петриња – луѓе не можат да се задржат на земјата
- Свет4 недели
Поради примање мито во Кина погубен поранешен државен функционер