Владата на денешната седница, разгледувајќи ја актуелната економска состојба и влијанието на глобалните ценовни шокови врз домашниот пазар, донесе одлука за продолжување на мерката за намалување на акцизите на нафтените деривати, со важност до 04 мај.

Со оваа одлука се задржува намалувањето на акцизата за дизел горивото во износ од 4 денари по литар, како и намалувањето на акцизата за безоловните бензини од 95 и 98 октани во износ од 2 денари по литар. Оваа интервенција има директен фискален и пазарен ефект, којшто се рефлектира во значително намалување на малопродажните цени на горивата, со што се ублажува притисокот врз трошоците на живот и се амортизираат инфлаторните импулси.

„Со продолжувањето на оваа мерка, Владата јасно демонстрира проактивен и одговорен пристап во управувањето со кризата, при што приоритет останува заштитата на животниот стандард на граѓаните и одржувањето на економската стабилност.

Дополнително, имајќи ги предвид стабилизациските ефекти од досегашните мерки и тековните движења на цените, Владата донесе одлука за измена на Одлуката за примена на повластена даночна стапка на додадена вредност. Согласно оваа измена, повластената стапка од 10% ќе продолжи да се применува за бензините, додека за останатите производи се врши враќање на редовната стапка од 18%.

Оваа мерка претставува внимателно балансиран пристап меѓу потребата за таргетирана поддршка на граѓаните и обезбедувањето на фискална одржливост, при што Владата останува целосно посветена на континуирано следење на состојбите и навремено преземање на соодветни економски политики.

Согласно нашите пресметки очекуваме Регулаторна комисија за енергетика да донесе одлука со која ќе се изврши дополнително намалување на малопродажните цени на нафтените деривати во просек за околу 1,5 денар по литар. Истовремено, останува во сила и претходно договорениот механизам со нафтените компании, согласно кој се обезбедува дополнително намалување од 3 денари по литар за дизел горивото и 2 денари по литар за бензините. Со ова, се постигнува кумулативен ефект на намалување на цените, кој директно се рефлектира во намалување на трошоците за транспорт и во ублажување на инфлаторните притисоци врз економијата“, соопшти владината прес-служба.

Портпаролката на Социјалдемократски сојуз на Македонија (СДСМ), Богданка Кузеска, оцени дека економијата бележи пад и дека граѓаните се соочуваат со влошен животен стандард.

„Помина 60 дена од почеток на кризата на Блискиот Исток а Мицкоски не презеде мерки за заштита на стандардот на граѓаните“, рече Кузеска, додавајќи дека и по најавите за мерки по Велигден, „повторно излажа, наместо мерки продолжија поскапувањата“.

Таа истакна дека, и покрај намалувањето на цените на нафтата, цените на храната и основните производи останале високи. „Скапите цени на храната и на основните производи секојдневно ги празнат џебовите на граѓаните“, рече Кузеска.

Според податоците на Државен завод за статистика, како што наведе, зеленчукот поскапел за над 38%, овошјето за над 10%, а продажните цени во земјоделството за 23%. Додаде дека веќе два месеци растат и цените на месото, зејтинот, маслото и јајцата.

„Ова не се обични бројки туку секојдневие на граѓаните со празни фрижидери и празни џебови“, изјави Кузеска.

Од СДСМ наведоа дека предложиле мерки како намалување на ДДВ за храна на 0%, намалување на акцизите, намалување на ДДВ за горивата на 5% и намалување на патарините, оценувајќи дека Владата ги најавува истите мерки „во фази – доцна и половично“.

Кузеска посочи дека во други земји се преземаат мерки за поддршка, додека „само кај нас Мицкоски не презема ништо“.

„Мицкоски се фали со ‘трета економија во Европа’, а во реалноста – тотален дебакл на економијата“, рече таа.

Според неа, платите остануваат најниски во Европа, инвестициите се намалуваат, а фабрики се затвораат. „Странските инвестиции паднаа за 60% од 1,2 милијарди евра во времето на СДСМ на само 467,5 милиони евра сега“, изјави Кузеска, додавајќи дека 180 милиони евра е долгот за поврат на ДДВ кон компаниите.

Таа рече дека десетици фабрики се затворени и дека над 1.500 работници останале без работа во изминатиот период.

„Реалноста боли. Народот осиромашува. Потребни се итни мерки – веднаш за намалување на цените, поддршка на ранливите граѓани и поддршка на економијата“, порача Кузеска.

Вицепремиерот и министер за транспорт Александар Николоски соопшти дека Меѓународен аеродром Скопје останува лидер во регионот, со раст од 32 проценти во споредба со истиот период лани.

„Меѓународниот аеродром Скопје останува лидер во регионот со раст од 32 % споредбено со истиот период минатата година“, напиша Николоски, повикувајќи се на податоци пренесени од специјализираниот авио-портал EX-YU Aviation News.

Тој посочи дека во првите месеци од годинава македонските аеродроми бележат раст од 30 проценти по број на патници и околу 20 проценти по број на операции, што, според него, ги потврдува политиките на Владата за развој на авиосообраќајот.

Во објавата се наведува дека годинава се воведени нови авиолинии од Скопје кон Неапол и Будимпешта, како и од Охрид кон Милано и Братислава, додека во јули се најавуваат линии од Охрид кон Катовице и Вроцлав, како и од Скопје кон Палермо и Алгеро.

„За речиси две години од работа на оваа Влада се воведоа 24 нови авиолинии кон европските центри, што е рекордна бројка“, наведува Николоски.

Тој информира дека во тек е проект за реконструкција, надградба и проширување на Аеродром Св. Апостол Павле во Охрид, со цел зголемување на капацитетите за патници и операции.

Николоски најави дека годинава се очекува бројот на патници да надмине 3,5 милиони, а следната година да достигне и до 4 милиони.

Во однос на состојбата со горивата, тој посочи дека таа е стабилна и дека авиосообраќајот се одвива непречено.