Економија
Ангеловска-Бежоска и Тевдовски на форумот на Централна и Источна Европа на „Евромани“
Гувернерката на Народната банка на Република Македонија, Анита Ангеловска-Бежоска, и министерот за финансии, Драган Тевдовски, утре и задутре ќе учествуваат на 24. форум на Централна и Источна Европа, што го организира „Евромани“ во Виена, Австрија. Овој форум е еден од водечките настани од областа на финансиите на кој редовно присуствуваат повеќе од илјада учесници – гувернери на централни банки, министри за финансии, директори на финансиски институции и инвеститори. Традиционално, во дискусиите и анализите на учесниците вниманието е насочено кон најважните прашања за пазарите во Централна и Источна Европа (ЦИЕ).
Гувернерката Ангеловска-Бежоска ќе биде еден од четирите говорници на првата панел-дискусија посветена на монетарната политика, во чиј фокус ќе бидат импликациите од крајот на квантитативното олеснување во глобални рамки, дивергенцијата на каматните стапки во САД и Европа и изгледите за економскиот раст во регионот. Истовремено, високите претставници на повеќе централни банки ќе говорат и за регионалната инфлација и перспективите на девизниот пазар, за импликациите од структурните промени на платните системи, како и за улогата на банките во монетарната политика. Во програмата на форумот е предвидено оваа панел-дискусија да следува по воведното обраќање на гувернерот на Австриската централна банка и член на Советот на гувернерите на Европската централна банка, Евалд Новотни.
Во рамките на форумот ќе се дискутира и за други прашања важни за економиите во ЦИЕ, при што внимание ќе им биде посветено и на иновациите во банкарството и на прашањата поврзани со иднината на банкарските системи. Одделно ќе се говори и за актуелните состојби на релација пазари на капитал – корпорации – банкарски систем, влијанието на нефункционалните кредити во регионални и глобални рамки и програмите за одржување на стабилноста на регионалните банкарски системи. Според програмата, на форумот ќе бидат опфатени и прашања за економскиот раст во ЦИЕ и одговорот на монетарната политика, можните влијанија на глобалните трговски војни, новите пазари во Европа и актуелните состојби со пазарите на капитал во ЦИЕ и развојот на пазарот на зелени обврзници. Гувернерката на НБРМ активно ќе се вклучи и во дискусијата за некои од овие прашања.
Овој традиционален форум на „Евромани“, поради вонсериски големиот број учесници, важи за редок настан од таков формат, кој овозможува поврзување на економистите заинтересирани за регионот на ЦИЕ – како на претставници на институциите носители на политики така и на претставници на банкарскиот сектор, учесници на финансиските пазари и на инвеститори. Во рамките на своето учество гувернерката Ангеловска-Бежоска ќе оствари повеќе работни состаноци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.