Економија
Андонов: Секој треба да направи мала промена во домот и работното место за да заштедиме струја

Државната администрација денес доби уште една честитка и благодарност за заштедената струја изминативе два месеца. Откако вчера ги пофали министерот за економија Крешник Бектеши, денеска на прес-конференција јавно им се заблагодари советникот за енергетика во Кабинетот на премиерот, Виктор Андонов. Со објаснување дека владините заложби за штедење струја не се само декларативни туку работат со факти, Андонов кажа дека втор месец по ред државните институции заштедуваат струја. Заштедата во месец октомври во споредба со истиот месец лани кај сите државни институции е 24 отсто, а заштедата во Владата 32 отсто.
„Сакам да се заблагодарам на сите колеги вработени во Владата и на сите вработени во државните институции кои покажаа висока свесност за состојбата. Бројките покажуваат резултати со заштеда втор месец по ред“, рече советникот Андонов и повика на рационално однесување и во следниот период.
„Овие заштеди се многу важни за да имаме стабилен енергетски систем и да ја намалиме оптовареноста. Посебно сега во услови на зима. Секој од нас е важна алка во овој процес. Секој од нас треба да направи мала промена во својот дом и на своето работно место. Да заштедиме електрична енергија што ќе значи многу за стабилноста на енергетскиот систем. Да погледнеме само како една Германија и останатите европски развиени земји се справуваат со кризата и ќе ни биде јасно дека ова што секојдневно го зборуваме е важен сегмент за ублажување на последиците од светската енергетска криза. Ова време бара рационално и сериозно однесување од сите“, рече советникот Андонов.
И тој, како и министерот Бектеши вчера уверуваше дека состојбата со електроенергетскиот систем е стабилна и покрај ремонтите во РЕК Битола И ТЕЦ Неготино.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.