Економија
Анѓушев во Штип: Со дополнителни мерки стимулираме побрз и одржлив раст на економијата
Вицепремиерот задолжен за економски прашања, Кочо Анѓушев, пред претставници на компаниите членки на регионалната комора од Штип и околината ги претстави измените и дополнувањата на Законот за финансиска поддршка на инвестициите и на предлог-законот за субвенционирање на придонесите за задолжително социјално осигурување поради зголемување на плата, кој само пред неколку дена е поставен на Единствениот национален електронски регистар на прописи (ЕНЕР).
Соодветно на последните податоци издадени од Заводот за статистика и Народна банка кои укажуваат на развивање на економијата во позитивна насока, а за тоа показ е растот на бруто-домашниот производ од 4,1 процент во првиот квартал и од 3,1 отсто во вториот квартал на 2019 година, Владата оцени дека е вистински момент, со дополнителни стимулативни мерки реалната економија, која е носител на економскиот раст, дополнително да се раздвижи.
„Разменивме мислење и посебно ставивме акцент на два закони кои се важни за економијата. Тоа е Законот за финансиска поддршка на инвестициите, којшто беше донесен мината година, а оваа година е изменет за да се олеснат условите и критериумите за стопанствениците. На барање на стопанството го изменивме и модифициравме Законот за финансиска поддршка на инвестициите, така што дозволена е толеранција до 5%, во поглед на намалување на вработените во годината во која се аплицира, го проширивме опфатот на компании, вклучени се фирмите од информатичкиот сектор, како и фирмите што се регистрирани како трговски или некоја друга гранка, фирмите што се од земјоделството, доколку реализираат инвестиции во преработувачка индустрија. Така што Законот е за поддршка на индустријата. Затоа упатувам апел и повик до сите стопанственици кои ги исполнуваат условите, аплицирајте за овој закон и ќе бидете помогнати во своите инвестиции, искористете ги мерките, државата сака да помогне во делот на тоа што веќе сте го направиле како инвестиција, да ви врати дел од средствата, бидејќи средствата во буџетот се резервирани токму за таа намена“, истакна вицепремиерот.
Вицепремиерот со стопанствениците од Штипскиот Регион разговараше и за мерките планирани со Законот за субвенционирање на придонесите од задолжително социјално осигурување поради зголемување на плата, кои исто така се произлезени како барање и потреба на стопанството.
„Законот за субвенционирање на придонесите од задолжително социјално осигурување поради зголемување на плата е во фаза на разгледување, а очекуваме да биде донесен во парламентот и токму затоа бидејќи овој закон сè уште е во фаза на разгледување, пред да биде донесен во парламентот потребно и корисно е да слушнеме дополнителни сугестии и измени кои се секогаш добредојдени. Ова ќе биде апсолутно едноставна мерка, посебно во делот на апликацијата и на имплементација од страна на компаниите и нема потреба од никакви посебни апликации освен постојниот пин, затоа веруваме дека ќе побуди голем интерес, а ќе има уште поголем ефект. Овие средби и директните контакти и разговори со стопанствениците се посебно корисни затоа што вака може да видиме како да помогнеме во растот на економијата бидејќи јас лично ценам дека врз база на приватната инвестиција и приватниот сектор и стопанство може да се постигне реален, одржлив раст и долгорочен раст на економијата во државата, а ние сме целосно посветени на таа цел“, заврши вицепремиерот Анѓушев.
Според претседателот на Стопанската комора, Бранко Азески, ова е најпогодниот момент кога е економските показатели на земјата се во пораст преку една аргументира конструктивна дискусија заедно да се најдат најдобрите решенија за унапредување на стопанството, зголемување на економската активност на терен. Компаниите искажаа доверба кон предлозите коишто доаѓаат од економските ресори во Владата дека ќе се помогне стопанството и неговиот развој, потенцираше Азески.
Градоначалникот на општина Штип, Благој Бочварски, истакна дека општината ќе продолжи и понатаму да биде поддршка на бизнис-секторот како врска меѓу бизнисот и владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.
Економија
Се намалува мазутот, цените на дизелот и бензините остануваат непроменети
Регулаторната комисија за енергетика, водни услуги и услуги за управување со комунален отпад донесе oдлука со која се врши намалување на малопродажните цени на нафтените деривати во просек за 0,53 % во однос на одлуката од 7.5.2024 година.
Од 10.5.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 86,00 (денари/литар)
Моторен бензин ЕВРОСУПЕР БС-98 – 88,00 (денари/литар)
Дизел-гориво ЕВРОДИЗЕЛ БС (Д-Е V) – 74,50 (денари/литар)
Масло за горење екстра-лесно 1 (ЕЛ-1) – 74,00 (денари/литар)
Мазут М-1 НС – 44,609 (денари/килограм)
Малопродажната цена на „мазутот М-1 НС“ се намалува 1,223 денар/кг и сега ќе изнесува 44,609 денари/кг.
Малопродажните цени на бензините ЕВРОСУПЕР БС-95 и ЕВРОСУПЕР БС-98, како и на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) не се менуваат.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините 2,939 %, кај дизелот 1,523 %, кај екстра-лесното масло 1,341 % и кај „мазутот“ намалувањето е 3,608 %.
Курсот на денарот во однос на доларот во изминатиот период по кој беа формирани цените со претходната пресметка е понизок 0,015 %.
Економија
Одлуката за осигурување автомобили е еднострана и штетна за бизнис-секторот и економијата во државата, реагира Комората на северозападна Македонија
Стопанската комора на северозападна Македонија ја квалификува одлуката на Комисијата за осигурување автоодговорност како неодржлива за благосостојбата на бизнисот и стопанството.
„Многу бизниси мора да се потпрат на употребата на возила за извршување на своите активности, како што се транспорт на стоки, услуги или вработени. Повисоките цени на полисата за осигурување автомобили може да имаат пошироки макроекономски ефекти со намалување на довербата и трошењето на потрошувачите, кои се клучни двигатели на економскиот раст“, се истакнува во реакцијата на Комората.
Деловното опкружување, како што оценуваат, станува обесхрабрувачки за домашните компании, но и за странските инвестиции, оставајќи долгорочни последици, но и спротивно на законодавниот систем на ЕУ, кој сè уште му дозволува на Министерството за финансии да одлучува за премиите за осигурување автомобили, што е спротивно на acquis на ЕУ.
„Со оваа одлука на Комисијата за самоодговорност се ограничуваат одговорностите на другите релевантни фактори, како што се компаниите, со кои цените на самоодговорноста се целосно контролирани од државата“, потенцираат од Стопанската комора на северозападна Македонија.