Економија
АХВ: Граѓаните да не го посетуваат ресторанот „Мир“, затворен е поради нехигиена

Агенцијата за храна и ветеринарство поднесе кривична пријава против сопственикот на ресторанот „Мир“ во прилепското село Ораовец, кој е лоциран на вештачко езеро, поради сомневање за сторено кривично дело симнување службен печат или знак, односно поради отстранување службен знак – лепенка „Затворено од Агенцијата за храна и ветеринарство“. Лепенката е поставена од инспекторите за храна на Агенцијата по извршената вонредна инспекциска контрола на 4 септември годинава.
„Како одговорна институција за безбедноста на храната и здравјето на потрошувачите апелираме до граѓаните да не го посетуваат овој угостителски објект бидејќи тој не е под контрола на инспекциските служби на АХВ и тој е ризичен за нивното здравје. Доколку се решат на тоа, посетата ќе биде на нивна лична одговорност. Ресторанот ‘Мир’ ДООЕЛ не е регистриран од АХВ“.
Со извршените три инспекциски контроли (вонредна контрола на 17 август, контролен инспекциски увид на 29 август и извршен вонреден инспекциски увид на 4 септември), од страна на инспекциските служби на АХВ утврдено е дека ресторанот не ги исполнува основните услови за хигиена на храна, односно во него нема безбедна вода за пиење, подготовка и хигиена (на храна и општа хигиена на гостите) бидејќи тој е исклучен од градската водоснабдителна мрежа. За констатираните недоследности со контролите, покрај изречените парични казни, поведената прекршочна постапка, издадено е и решение за забрана за вршење угостителска дејност во ресторанот, кое сопственикот не го почитува, а поради што, и по последната спроведена вонредна инспекциска контрола поставен е службен знак – лепенка „Затворено од Агенцијата за храна и ветеринарство“, кој тој самоволно ја отстранил“, соопшти Агенцијата за храна и ветеринарство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
За четири дена доставени повеќе од 2.500 пријави за самовработување

Во салата на кино „Манаки“ во Битола денеска беа презентирани мерките од Оперативниот план за вработување за 2025 година.
Пред голем број на граѓани претставниците од министерството за економија и труд, Агенцијата за поддршка на претприемништво и Агенцијата за вработување ги презентираа мерките од Оперативниот план, со акцент на трите подмерки од мерката за самовработување (претприемништво), каде јавните повици се објавени и сите заинтересирани можат да аплицираат до 20 јуни.
„Со мерките за самовработување на сите невработени лица им даваме финансиска поддршка за отворање на сопствен бизнис, која се движи од 7.000 до 10.000 евра, а со здружување на две лица од 14.000 до 20.000 евра. Имаме исклучително голем интерес за овој јавен повик и за само четири дена се пријавени повеќе од 2.500 лица. Ги повикувам сите лица кои се заинтересирани да аплицираат во било кој од 30-те Центри за вработување при Агенцијата за вработување низ државата“, кажа заменик-министерот за економија, Марјан Ристески.
Во рамки на јавните повици од мерката 1 „Поддршка за самовработување (претприемништво)“, во тек се три јавни повици со кои се дава можност на повеќе од 1700 лица да отворат сопствен бизнис и со истите се предвидени:
– Финансиска поддршка во форма на грант до 7.000 евра за основање и започнување на бизнис за лица постари од 29 години.
– Финансиска поддршка во форма на грант до 10.000 евра за основање и започнување на бизнис за млади лица до 29 години.
– Финансиска поддршка за здружување на две лица во ДОО, каде истата изнесува од 14.000 до 20.000 евра, зависно од целните групи.
Економија
Укинувањето на царините за стоките од САД не е само трговска одлука, туку и дипломатски чекор, вели Стојанова

Со новите измени и дополнувања на Законот за царинските тарифи, Собранието ќе даде зелено светло на планот на Владата да се намалат царинските давачки на голем број суровини и репроматеријали што се користат во домашната индустрија и во енергетиката, изјави Дафина Стојаноска, пратеничка од ВМРО-ДПМНЕ.
„Списокот со 70-ина производи, кој е составен на транспарентен и инклузивен начин, во соработка со Стопанската комора, вклучува намалување до 50 % на царинските стапки што важат во ЕУ, како и укинување на царините за увоз од САД. Овие измени ќе значат пониски трошоци за домашното производство, а со тоа зголемена конкурентност на странските пазари, нови инвестиции и повеќе вработувања“, рече таа.
Укинувањето на царините за стоките по потекло од Соединетите Американски Држави, пак, додаде Стојаноска, не е само трговска одлука, туку и дипломатски чекор, со кој испраќаме сигнал за зголемена подготвеност за соработка со нашите стратешки партнери и поддршка за слободната трговија.
„Со оваа законска измена македонските компании ќе станат поконкурентни, ќе се намалат цените за производство и ќе се зголеми извозот, со што директно ќе влијае на растот на економијата. Ова е само еден чекор од поширокиот план за економски раст. Клучна измена со која се посветуваме на економијата во пракса, а не само на хартија“, рече Стојаноска.
Економија
Цените на нафтата го забележаа најголемиот скок во последните неколку години поради стравот од војна

Глобалните цени на нафтата пораснаа за повеќе од 4 проценти забележувајќи го најголемиот дневен процентен пораст од март 2022 година поради стравувањата дека потенцијалното проширување на конфликтот на Блискиот Исток би можело да предизвика големи прекини во снабдувањето со енергија.
Цената на „Брент“, меѓународниот референтен стандард, се зголеми за 4,3 проценти, на 72,40 долара за барел, а американската референтна нафта West Texas Intermediate (WTI) скокна за 5 проценти, на 71,40 долар за барел.
Според „Ројтерс“, ова се најголемите еднодневни скокови за двете референтни цени на нафтата од март 2022 година кога почна војната во Украина.
„Остриот пораст на цените на ‘Брент’ ги одразува не само тековните ризици за снабдување туку и растечкото чувство дека потенцијалната ескалација на конфликтот би можела да трае за разлика од претходните краткотрајни епизоди меѓу Израел и Иран“, рече Ахмад Асири, истражувачки стратег во „Пеперстоун“.
Нервозата на пазарите дополнително се потврдува со движењата на американските берзи, пренесува „Танјуг“.