Економија
Бектеши-Азески: Правиме напори бизнисот да добие доволни количини на електрична енергија со порационални цени

Работиме на обезбедување дополнителни количини на електрична енергија за потребите на стопанството. Во изминатиот период сме во директни преговори со Србија и со Албанија, во рамки на Отворен Балкан, а изминатиот период владина делегација предводена од премиерот Ковачевки беше во Софија и Атина со што веќе имаме договори за обезбедување на суровини за зголемување на домашното производство, како и дополнителни количини на електрична енергија, кажа министерот за економија Крешник Бектеши по денешната работна средба со претседателот на Стопанската комора на Северна Македонија, Бранко Азески.
На средбата присуствуваа и претставници на 10-те најголеми компании потрошувачи на енергија во земјата.
На работната средба како што информираше министерот Бектеши и претседателот на Комората Азески е договорено компаниите да достават конкретни предлози до Владата кои ќе бидат инкорпорирани во новиот пакет мерки за поддршка на домаќинствата и стопанството кои се подготвуваат и ќе бидат објавени до крајот на месецот.
„Работиме да им обезбедиме на компаниите доволни количини на електрична енергија, а со преговорите коишто интензивно ги водиме правиме максимални напори цената на електричната енергија да биде порационална од онаа што е на светските берзи“, кажа Бектеши.
Министерот потенцираше дека регионалниот пристап на кој работиме во моментов со соседните земји е најдобриот начин за да се справиме со една од најтешките зими кои нè очекуваат не само нас туку и цела Европа.
„ЕСМ ќе ги покрива целосно потребите за електрична енергија за домаќинствата и за микро и малите компании кои се на регулиран пазар, а ние се обидуваме со обезбедување дополнителни количини на електрична енергија да им излеземе во пресрет на големите компании кои се на отворен пазар или околу 1.500 фирми кои се од огромно значење за економијата“, кажа Бектеши и му се заблагодари на Азески за континуираниот придонес на Стопанската комора во разговорите и заедничко изнаоѓање решенија за справување со енергетската криза.
Претседателот на Стопанската комора на Северна Македонија Бранко Азески истакна дека соработката со Владата во последните месеци е на највисоко ниво, а суштината е да се помогне таму каде е тоа најпотребно.
„Во изминатиот период имавме една многу добра размена на мислења во коишто ние правиме подготовки за концепирање на пакетот на мерки за поддршка на бизнисот кои се очекува да бидат објавени на 28 септември“, кажа Азески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
МЗШВ: Во четвртиот квартал од 2025 година ќе биде објавен јавниот повик за претприемачите во прехранбената индустрија

Министерството за земјоделство, шумарство и водостопанство ја информира јавноста дека во четвртиот квартал од оваа година ќе биде објавен Јавниот повик 02/2025 за користење на средства од ИПАРД Програмата 2021-2027, мерка 3 – „Инвестиции во основни средства за преработка и маркетинг на земјоделски и рибни производи”.
Оваа мерка претставува исклучителна можност за македонските претприемачи во прехранбената индустрија да ги унапредат своите капацитети и да станат поконкурентни на домашниот и меѓународниот пазар.
Мерката 3 – „Инвестиции во основни средства за преработка и маркетинг на земјоделски и рибни производи”од ИПАРД Програмата овозможува финансиска поддршка за модернизација на преработувачките капацитети, инвестиции за преработка и маркетинг на земјоделски и рибни производи, како и усогласување со европските стандарди. Преку оваа мерка се поддржува зголемувањето на конкурентноста на земјоделското производство и земјоделско-прехранбениот сектор во целина.
Средствата за оваа мерка се обезбедени преку Инструментот за претпристапна помош за рурален развој на Европската Унија (ИПАРД Програмата за периодот 2021 – 2027 година).
Министерството ги повикува сите заинтересирани да започнат со навремена подготовка на потребната документација и да ги следат официјалните објави на Агенцијата за финансиска поддршка во земјоделството и руралниот развој.
Економија
Издадени првите лиценци за батериски систем за складирање на електрична енергија од обновливи извори

Регулаторната комисија за енергетика, водни услуги и услуги за управување со комунален отпад (РКЕ) ги издаде првите лиценци за батериски систем за складирање на електрична енергија од обновливи извори на компанијата ЕНЕРГО СОЛАР СИСТЕМИ.
Станува збор за два батериски системи со вкупна инсталирана моќност од 2 600 kW, што се инсталирани во склоп на две различни фотонапонски електроцентрали кои се веќе изградени и во функција.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава. Во РКЕ очекуваме голем број сопственици на ФЕЦ да поднесат барање за инсталирање на “сториџи“, но исто така очекуваме интерес да појават и компании кои би биле самостојни оператори на складишта само со батериски системи. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар. Истите можат да даваат услуги на операторот на електропреносниот систем за балансирање на истиот, како и одржување на одредени параметри на мрежата во пропишани граници. Складирањето на енергија во периоди кога има вишок и нејзино користење во периоди кога потребите од електричната енергија се зголемуваат се очекува дека ќе влијае и врз намалување на вкупните трошоци во системот.“ посочи Марко Бислимоски, претседател на РКЕ.
Условите, постапката и потребната документација за добивање на лиценца за складирање на електрична енергија се уредена во Законот за енергетика и Правилникот за лиценци, .
Економија
Владата усвои измени: Се укинува ослободувањето од ДДВ за онлајн пратки во вредност до 22 евра

Со цел зајакнување на домашната економија, поддршка на локалните компании и создавање нови работни места, Владата усвои измени и дополнувања на Законот за данок на додадена вредност, со кои се укинува ослободувањето од ДДВ за онлајн пратки во вредност до 22 евра. Законските измени веќе се во собраниска процедура, а нивното спроведување се очекува да има директни позитивни ефекти врз економијата и работењето на домашните компании.
Со оваа мерка, околу 4 милиони денари месечно, колку што во одредени периоди изнесува прометот кон странските онлајн платформи, ќе се пренасочат кон домашното стопанство. Овие средства ќе придонесат за развој на локалните компании, отворање нови работни места и исплата на повисоки плати на вработените.
Ова претставува значаен чекор во заштита и поддршка на домашната економија, особено во услови на зголемена глобализација и дигитална трговија.
Дополнително, измените ќе помогнат во намалување на сивата економија, имајќи предвид дека досегашниот систем овозможуваше злоупотреби – односно увоз на стоки ослободени од данок кои понатаму се продаваат на домашниот пазар.
Со оваа измена, државата испраќа јасен сигнал на поддршка за домашните компании кои создаваат додадена вредност и вработуваат граѓани во земјата, велат од Министерството за финансии.