Економија
Бектеши: Патувањето од Пелагонија до Скопје ќе се скрати 60 километри

Министерот за економија, Крешник Бектеши, заедно со вицепремиерот и министер за политички систем и односи со заедниците, Садула Дураку, и директорот на Јавното претпријатие „Македонијапат“, Беким Мемеди, извршија увид на градежните работи за рехабилитација на патот за Гостиражни – Црнилиште – Петле во општина Долнени.
Вкупната должина на овој патен правец, кој ги поврзува општина Чашка и општина Долнени, е 11 километри, а инвестицијата изнесува 80 милиони денари.
„Денеска сме присутни да извршиме увид во реконструкцијата на овој патен правец, кој е многу важен и е долгогодишно барање на жителите од овој регион. Тоа барање сега веќе е реалност. Ова е инвестиција од 80 милиони денари и ќе ги поврзува општините Долнени и Чашка и истовремено ќе го скрати патувањето на сите жители што би патувале во Скопје. Само во еден правец се скратува патувањето до главниот град за 60 километри. Ние како Влада сме посветени на изградба на инфраструктурата. Нашата главна цел е да обезбедиме квалитетен и подобар живот на сите граѓани. Од минатата година интензивно работиме на изградба на инфраструктурата во целата држава. Интензивно се вложува во изградба на нови патишта и реконструкција и рехабилитација на старите кои со децении биле заборавени“, изјави министерот за економија, Крешник Бектеши.
Директорот на ЈП „Македонијапат“, Бемим Мемеди, информира дека асфалтирањето на патот од селото Црнилиште до Чашка е почнато пред неколку дена, а првата фаза ќе биде завршена до крајот на месецот.
„Овој патен правец е во должина од 11 километри од Црнилиште до реката Бабуна во општина Чашка, првата фаза е во должина од 7 километри, кој ќе биде целосно тампониран и асфалтиран, а реконструкцијата и изградбата на втората фаза ќе почне следната недела. Според проекциите, до крајот на месецот треба да заврши изградбата на првата фаза, но сепак се работи за тежок проект од големо значење и тежок за изработка, очекуваме дека до крајот на годината целосно ќе биде завршена реконструкцијата на целиот пат“, изјави директорот Мемеди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
(Видео) Стојаноски: Растот на реалната плата е двојно поголем за една година со ВМРО-ДПМНЕ отколку 7 со СДС, а инфлацијата е 30 отсто помала

„Растот на реалната плата е двојно поголем за една година со ВМРО-ДПМНЕ отколку за 7 со СДСМ, а инфлацијата е 30% помала. Имено во период јули 2024 до јули 2025 растот на реалната плата e 6.7%, додека во период јули 2017 до јули 2024 растот бил само 3.5%“, рече Бојан Стојаноски, пратеник на ВМРО-ДПМНЕ.
„Реалната плата е вистинската куповна моќ на платата, не номинален износ, туку вредностен.
Растот на реалната плата во време на ВМРО-ДПМНЕ покажува неколку работи: Дека инфлацијата е намалена, дека растот на економијата е забрзан, дека потрошувачката е зголемена, дека производството расте и дека довербата во економијата е голема.
Бројките јасно покажуваат дека инфлацијата е стабилизирана и под контрола. Во период јули 2024 до јули 2025 просечната стапка на инфлација е 3.6%, додека во период од јули 2017 до јули 2024 просечната стапка на инфлацијата е 4.8%.
Бројките се многу јасни. Во време на СДСМ добро им одеше само на неколкумина бизнисмени блиски до власта, кои беа главни тендераши. Во време на ВМРО-ДПМНЕ економијата оди напред, има раст и развој кој е сеопфатен и го чувствува секој граѓанин“, изјави Бојан Стојаноски, пратеник на ВМРО-ДПМНЕ.
Економија
Позначајни движења кај каматните стапки на банките и штедилниците

Годишен раст на просечната каматна стапка на вкупните депозити од 0,28 п.п., при што во јули таа изнесува 2,21%, извести Народната банка.
Просечната каматна стапка на вкупните кредити бележи годишен пад од 0,55 п.п. и изнесува 4,91%.
Најновото соопштение за позначајните движења кај каматните стапки на банките и штедилниците е достапно на следната врска.
Економија
Министерството за енергетика: Нов закон за рударство, транспарентен процес, ќе се прифатат конструктивните предлози

Министерството за енергетика, рударство и минерални суровини (МЕРМС) ја истакнува транспарентноста и вклученоста како основни принципи во подготовката на новиот Закон за рударство. Законот уште во рана фаза беше јавно објавен на платформата ЕНЕР со цел да биде достапен за увид и анализа од сите засегнати страни, а јавната расправа резултираше со исклучително голем одзив.
Јавноста имаше можност во период од 30 дена да го разгледа првичниот текст на Законот за рударство, кој беше јавно објавен на платформата ЕНЕР. Јавниот увид траеше до 28 август 2025 година, а во овој период пристигнаа бројни мислења, предлози и забелешки од компании, институции, стручната и граѓанската јавност, информираат од таму.
„Јавната расправа ни овозможи вредни препораки и забелешки за Нацрт-законот. Паралелно започнуваме со следната фаза од усогласување на законскиот предлог. Ги разгледуваме сите доставени предлози и забелешки и ќе организираме работни средби со оние кои се изјасниле за предлог-текстот. Нашата цел е да добиеме усогласено, јасно и спроведливо законско решение кое ќе обезбеди заштита на животната средина, висока безбедност при работа и предвидлива инвестициска рамка,“ изјави министерката за енергетика, рударство и минерални суровини Сања Божиновска.
Со ова, како што е истакнато, Министерството уште еднаш потврдува дека е отворено за дијалог, соработка и заедничко креирање на законски решенија, со единствена цел – модерна и правична рамка за рударството во Македонија. Во наредниот период, МЕРМС ќе ги разгледа детално сите пристигнати предлози и ќе ги прифати оние кои се во насока на подобрување на законското решение, во интерес на државата и граѓаните.
Министерството, додаваат од оваа иституција, останува цврсто определено во подготовката на законот да се води според највисоките европски стандарди, со цел да обезбеди современа и одржлива рамка за развој на рударството.
„Финалниот закон ќе овозможи: одржлива експлоатација и преработка на минерални суровини според највисоки стандарди, засилена контрола и транспарентност во сите процеси, задолжителни мерки за рекултивација и заштита на локалните заедници, јасна и правично поставена регулатива за сите учесници во секторот.
Министерството нагласува дека инсистира на строга примена на правилата и нулта толеранција за прекршувања, во интерес на безбедноста, заштитата на животната средина и добросостојбата на локалните заедници.