Економија
Бектеши: Со Албанија ќе реализираме проекти за изградба на инфраструктура за снабдување со гас и во обновливи извори на енергија

Министерот за економија, Крешник Бектеши, во рамките на втората меѓувладина седница на владите на Северна Македонија и Албанија со своите колеги Белинда Балуку, министер за инфраструктура и енергетика на Албанија, и Едона Биљаљи, државен министер за заштита на претприемаштво на Албанија, потпиша два меморандума за соработка.
Меморандум за соработка во енергетиката и меморандум за соработка за развојот на претприемаштвото и конкурентноста на малите и средните претпријатија и стартапи.
Земајќи ги предвид поволните услови на двете земји за проширување на енергетската соработка, како и важноста и бенефициите од билатералната соработка во енергетскиот сектор и енергетските ресурси за заемна корист и во согласност со принципите на легислативата на ЕУ и договорот за основање на енергетска заедница, со меморандумот за соработка во енергетиката е предвидено да се интензивира билатералната соработка во енергетскиот сектор во согласност со националните политики и стратегии на Северна Македонија и Албанија.
Целта на меморандумот за соработка во енергетиката е да создаде рамка за соработка меѓу двете страни за подготовка и реализација на заеднички енергетски проекти, кои главно се однесуваат на инфраструктурата за природен гас и ТНГ-терминалот во Валона, како и обновливите енергии.
Исто така, преку него ќе се реафирмираат волјата и подготвеноста на страните за долгорочно планирање на инфраструктурата и координиран развој на поврзаноста Албанија – Северна Македонија, со фокус на подобрување на енергетската безбедност во регионот на Западен Балкан и сигурно снабдување со енергија.
По стапувањето во сила на овој меморандум, ќе се формира мешовит комитет, составен од експерти од двете страни, со цел гарантирање и ефикасно спроведување на активностите за соработка во рамките на овој меморандум.
Целта на меморандумот за соработка за развојот на претприемаштвото и конкурентноста на малите и средните претпријатија (МСП) и стартапите е да се зајакне соработката меѓу Северна Македонија и Албанија овозможувајќи меѓусебна размена на информации и споделување искуства поврзани со прашања што се однесуваат на претприемаштвото и подобрување на екосистемот за МСП и за стартапите.
Со овој меморандум двете земји ќе соработуваат во делот на приближување на националните и регионалните политики во усогласување со правото на Европската Унија и поттикнување регионална соработка и развој во однос на претприемаштвото и подобрување на екосистемот за МСП и за стартапите и ќе работат на развој на административни капацитети за имплементација на стратегиите на двете страни во опфатените области.
Со меморандумот е предвидено организирање заеднички активности и учество на конференции, форуми, самити или работилници, како и изготвување проекти во области кои заеднички ќе бидат определени за да аплицираат за дополнителни финансиски ресурси за регионална соработка со цел да се зголемат областите прифатливи за двете страни.
Во своето обраќање на заедничката меѓувладина седница министерот Бектеши потенцира дека Република Северна Македонија и Република Албанија имаат голем простор за соработка во енергетскиот сектор со проектите што почнаа да се реализираат во Албанија, каде што се предвидува да биде дел и Северна Македонија.
„Со колегите од Албанија работиме за да се забрза имплементацијата на проектот за трансмисија, што ќе даде дополнителна можност енергетските пазари на Северна Македонија и Албанија да се интегрираат и заедно да ја имаат првата берза за електрична енергија овде во регионот. Исто така, надлежните министерства треба да го решат и прашањето за олеснување на процедурите за увоз на земјоделски производи. Нашите две земји ќе ја продолжат соработката со единствена цел да се интегрираат во олеснувањето на трговијата“, изјави министерот Бектеши.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Нови правила за одобрување возила од 1 септември

Министерството за енергетика, рударство и минерални суровини (МЕРМС) одржа работен состанок со над 40 овластени застапници и импортери на возила во Македонија.
На средбата присуствуваа министерката Сања Божиновска, директорот на Државниот пазарен инспекторат Влатко Стојкоски, претставници на Биро за метрологија и Царината како и професорот Дарко Данев кој ги презентираше измените во постапките за одобрување на возила, кои ќе стапат на сила од 1 септември 2025 година.
Овие измени се однесуваат на постапките за: одобрување на тип на возило, единечно одобрување на возило, идентификација и оцена на техничката состојба и издавање на потврди за исполнетост на техничките барања за возилата.
Клучната промена е тоа што, по 17 години од донесувањето на Законот за возила, истиот конечно ќе почне да се применува согласно европските стандарди.
„Го зајакнуваме системот на доверба меѓу институциите и импортерите, со јасни правила и навремена услуга за граѓаните. Ова е значаен чекор за приближување кон европските стандарди и подобрување на квалитетот на услугата која ја добиваат нашите граѓани“, изјави министерката Божиновска.
Клучни промени во постапките за одобрување на возила:
· Одобрување на тип на возило за сите негови варијанти и изведби според WVTA документот, освен ако импортерот не побара поинаку.
· Единечно одобрување ќе се врши исклучиво за возила за кои не е одобрен типот во РСМ и немаат одобрение за тип во ЕУ преку Биро за метрологија. Возила со претходно одобрен тип во ЕУ или во РСМ немаат потреба од посебна постапка за единечно одобрување и директно одат во постапка за идентификација и оцена на техничката состојба.
· Импортерите имаат обврска да издаваат потврди за исполнетост на техничките барања за сите возила за кои постоиевропско одобрение на тип (WVTA) или национално одобрување на тип. За останатите возила за кои немаат возила не постои одобрение на тип во РСМ или не постои одобрение на тип во ЕУ, импортерите немаат обврска да ги издаваат потврдите, ваквите возила ќе обезбедуваат потврди од независни институции прифатени од Бирото за метрологија.
· Грубата пресметка вели дека 1,3 милиони евра годишно досега оделе за TÜV потврди кои не требало да се бараат и тоа најголемиот дел од средствата оделе кај странски компании на кои им се плаќало – процесот сега ќе се регулира преку овластените застапници, домашни македонски компании.
· Роковите за одобрување на тип во Бирото за метрологија ќе бидат скратени двојно, за побрза и поефикасна постапка.
· Цените на услугите од Биро за метрологија ќе се регулираат со нов правилник.
· Потврдите за исполнетост на техничките карактеристики кај застапниците ќе чинат 40-50 евра.
Министерството нагласува дека соработката со застапниците е клучна за успешна примена на Законот и изграден функционален систем на доверба.
„Градиме партнерски однос со импортерите како клучен елемент во процесот на усогласување со европските стандарди. Граѓаните треба да се чувствуваат заштитени и поддржани при секоја постапка за одобрување на возила“, додаде министерката Божиновска.
Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.