Министерот за економија, Крешник Бектеши, присуствуваше на потпишување договори за јавно- приватно партнерство по ЕСКО-модел за јавно осветление помеѓу општините Македонска Каменица и Чешиново-Облешево како корисници и ЕСКО-компанијата „Македонски телеком“ АД Скопје. Овој проект е дел од регионална програма за енергетска ефикасност во Република Северна Македонија, која ја поддржува енергетската ефикасност со фокус на јавниот сектор, преку Европската банка за обнова и развој (ЕБОР) за што е обезбедена финансиска поддршка од инвестициската рамка на Европската Унија за Западен Балкан.

„Со новиот Закон за енергетската ефикасност, кој од вчера официјално влегува во сила, нашата држава во целост ги имплементира соодветните прописи за енергетска ефикасност на Европската Унија. Уште поважно, новиот закон ќе овозможи реализација на потребните инвестиции и мерки во областа на енергетска ефикасност следејќи ги позитивните примери од земјите на ЕУ и регионот, каде што енергетската ефикасност донесува корист на повеќе нивоа како за граѓаните така и за економијата воопшто. Меѓу другото, законот ќе овозможи реализација на долгорочни договори за енергетски услуги од страна на друштва даватели на енергетски услуги – ЕСКО. Со ова законско решение се прецизираат одредбите и модел-договорите, кои овозможуваат реализација на проекти за подобрување на енергетската ефикасност, како за ефикасно осветление така и за други вложувања во енергетска опрема и инсталации, каде што, меѓу другото, опфатени се и реконструкции на згради“, истакна Бектеши по потпишување на договорите.

Координаторот на проектот, Здравко Стефковски, истакна дека ЕСКО-компаниите се дефинирани со новиот Закон за енергетската ефикасност, кој веќе е донесен и вчера стапи во сила.

„ЕСКО-компаниите ја носат целокупната инвестиција на висококвалитетна ЛЕД-технологија за улично осветление, а крајниот корисник, во овој случај општините, финансиски не учествуваат. Крајниот корисник, Општината, ја враќа инвестицијата на ЕСКО-компанијата исклучиво преку заштедата на енергија. Во тендерската постапка Општината ја избира онаа ЕСКО компанија која има уредна документација според тендерската документација и ќе понуди најголемата нето-финансиска добивка за Општината. Времето на враќање на инвестицијата изнесува во просек шест години, а понудениот животен век на светилките е 100.000 работни часа. За времетраење на договорот целокупното одржување на опремата, која е предмет на договорот, потпаѓа под ЕСКО-компанијата. По завршување на договорот, целокупната заштеда на енергија и опремата остануваат на крајниот корисник, т.е. Општината. Ако се земе предвид дека системот за улично осветление во просек работи 4.200 работни часа годишно, во тој случај светилките би требало да работат околу 23 години“, потенцира Стефановски.

Градоначалниците на општините Македонска Каменица и Чешиново-Облешево, Соња Стаменковска и Горанчо Крстев, им се заблагодарија на Министерството за економија и ЕБРД за можноста да учествуваат во ваков проект и да може да инвестираат во енергетски ефикасна инфраструктура во своите општини.