Министерот за економија, Крешник Бектеши, на денешната прес-конференција информира за уште една мерка за поддршка на туризмот, која беше најавена во третиот сет мерки на Владата од програмата за Ковид-19 во рамките на Министерството за економија.
Бектеши истакна дека поддршката на домашниот туризам, кој е еден од најпогодените сектори од корона-кризата, е главен приоритет на Министерството за економија.

„Денеска, сакам да ве информирам дека почнуваме со уште една мерка за поддршка на туризмот. Министерството за економија до Владата предложи програма со која ќе се субвенционираат настани што ќе се организираат во категоризирани угостителски објекти во државата. Мерката предвидува покривање 50 отсто од трошоците, но не повеќе од 30.000 денари од апликант за организирање обуки, семинари, конференции во домашни туристички капацитети од страна на сите здруженија, компании, како и институции, кои планираат да организираат во рамките на своите активности“, истакна Бектеши и потенцира дека мерката предвидува покривање на трошоците само за изнајмување на просторот за организирање на обуката, конференцијата или настанот во домашните хотелско-угостителски објекти.

„За реализација на оваа програма Министерството за економија ќе објави јавен повик за доделување субвенции за кофинансирање на трошоците за организација на настани, а за нејзина реализирање обезбедени се 15 милиони денари или 245 илјади евра. Еден апликант може да поднесе најмногу до 3 (три) барања за кофинансирање на трошоците за организација на настани. Апликантот до Министерството за економија доставува барање со прилог резервација на сала за обуки, семинари, конференции и слично и договор со угостителскиот објект со прилог фактура и краток опис за настанот. Министерството за економија потпишува договор со организаторот на настанот и во рок од 7 дена по потпишувањето одобрените средства се префрлуваат на сметка на организаторот на настанот, појасни министерот Бектеши.

Министерот рече дека тековно се реализираат и другите мерки во рамките на Министерството за економија за поддршка на туристичко-угостителскиот сектор.

„Сакам да информирам дека во завршна фаза е платформата domasiedoma.gov.mk и pushimenevend.gov.mk преку која ќе се реализира мерката за ваучери за домашен туризам на Министерството за економија. Платформата ќе биде оперативна до крајот на неделата. Преку оваа платформа Министерството за економија ќе ги испрати ваучерите за домашен туризам на сите граѓани што ги исполнуваат условите. Ваучерот, кој ќе содржи QR-код, ќе биде испратен по имејл, кој граѓаните го имаат доставено до Управата за јавни приходи“, рече Бектеши и појасни дека мерката предвидува сите вработени граѓани, кои имаат приходи што не надминуваат 15.000 денари месечно, да добијат ваучер од 6.000 денари, кој ќе може да го искористат во домашните туристички објекти, но и платежна картичка од 3.000 денари, која ќе може да ја користат во сите угостителски објекти во државата.

„Граѓаните ќе може и на платформата да проверат дали се на листата, односно дали ги исполнуваат условите за ваучер за домашен туризам, а исто така ќе може да изберат каде, односно во кој туристички и угостителски капацитет во државата ќе може да го употребат. На платформата ќе бидат објавени понудите на сите катагоризирани туристичко-угостителски објекти во државата, односно капацитетите со кои располагаат за да примат туристи“, потенцира министерот.

Граѓаните ваучерите за одмор во домашните туристички капацитети ќе може да ги користат од 15 јули до 15 декември 2020 година, а предвидено е да опфати над 115 илјади граѓани.