Економија
Бесими – Светската банка: Подготвуваме решенија за инвестиции на компаниите во зелена и дигитална трансформација
Министерството за финансии заедно со Светската банка (СБ) работи на воспоставување инвестициски фондови во земјата за поддршка на компании во сферата на зелената и дигиталната трансформација. Решенијата што се во фаза на подготовка, а се дел од нацрт-студијата подготвена од нивна страна, беа дискутирани на средба на министерот за финансии, Фатмир Бесими, со Мисијата на Светската банка за иновации и конкурентност предводена од Масимилијано Паолучи, постојан претставник на СБ во земјата.
Станува збор за инвестициски фонд за микро, мали и за средни претпријатија за инвестиции за зелена и дигитална трансформација во ФИТР, како и стратешки инвестициски фонд за поддршка на инвестиции во ТИРЗ и инфраструктурата во зоните.
Воспоставувањето на овие фондови произлегува од потребата за финансиска поддршка на компании што се во фаза на основање и компании на кои им требаат средства за развој, но не може да ги обезбедат во традиционалниот банкарски сегмент, како и за инвестиции на компаниите во проекти за намалување на штетното влијание врз животната средина и енергетската ефикасност.
Инвестициите во иновации, нови производи, дигитална трансформација, проширување на нови пазари, модернизација на опремата, подобрување на продуктивноста и воведување еколошки стандарди во производството ќе придонесат за закрепнување на претпријатијата во постковид-периодот и придонес кон забрзан економски раст.
Двата фонда се дел од предвидените финансиски инструменти во планот за забрзан економски раст на Министерството за финансии, со кој ќе се поддржат инвестиции од јавниот и приватниот сектор, а во насока на достигнување просечни годишни стапки на раст од над 5 %. Приоритетни области се подобрување на конкуреноста на економијата и подобрување на квалитетот на живот, а се насочени во повеќе приоритетни области, како што се зелена економија, дигитализација, иновации и технолошки развој, развој на физичка инфрастуктура и човечки капитал, како и социјална кохезија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Грин Машинс на БРАКО доби златен медал на Меѓународниот технички саем во Пловдив
Златен медал во категоријата „Мобилни машини“ добија возилата на Грин Машинс на Меѓународниот конкурс за иновативни производи со висок квалитет на Техничкиот саем во Пловдив, Бугарија.
Жири составено од специјалисти од бугарската Државна агенција за метрологија и технички надзор, го оцени македонскиот производ, електричното возило GM 500 ZE, со највисоки оценки во неговата категорија, во присуство на изложувачи од 25 земји кои изложуваа во области од машинство, енергетика, дигитални технологии, тешка техника, еколошко градежништво, хибридни транспортни средства и беспилотни летала.
GM 500 ZE работи на електричен погон и користи последна генерација на литиум-јонски батерии со нула емисија на СО2 и нула загадување на околината.
Грин Машинс произведува технолошки врвни возила на електричен и водороден погон, како и возила на класичен погон, наменети за одржување хигиена во урбани средини.
Велешката фабрика на настанот изложи три свои возила GM 955, GM 500 ZE и GM 400 ZE.
Возилата на Грин Машинс се барани и високоценети на светскиот пазар поради нивната технолошка напредност, ефикасноста во работењето и модерниот дизајн.
ПР
Економија
Анакиев: Државниот инспекторат за земјоделство на „Денови на кочанскиот ориз“
Денеска директорот на Државниот инспекторат за земјоделство Васе Анакиев, присуствуваше на манифестацијата „Денови на кочанскиот ориз“ во с. Оризари, кочанско, каде што со симболично зажнејување на оваа житна култура официјално се означи почетокот на годинешната жетва на ориз.
Манифестацијата е поддржана од Министерството за земјоделство, шумарство и водостопанство, а е во организација на Општина Кочани.
Од разговорите со земјоделците првичните информации говорат дека ќе има зголемен род, богата жетва и согласно тоа квалитетот ќе биде добар. Инспекторите од ДИЗ ќе бидат постојано на терен и ќе го следат претстојниот откуп, со што се гарантира заштита на производителите.
Во однос на загриженоста на производителите во однос на државните резерви на увозен ориз, според информации на инспекторатот, министерот за земјоделство Трипуновски информираше дека нема простор за загриженост бидејќи во Република Македонија сериозна количина на увозен ориз нема, и онаа количина што е во минимални рамки, се контролира во однос на квалитетот и безбедноста.
Во својата изјава министерот се осврна и на тоа дали домашниот ориз ќе се откупува за стокови резерви при што посочи -„Веќе со заклучок на Влада задолжена е Агенцијата за стокови резерви да ги измени сите правилници, уредби и програми и нормално да се предвидат средства за 2025-та година каде што оризот согласно Законот за стокови резерви ќе се откупува за чување за потребите на државата“.
Економија
Трипуновски од Кочани: Оваа година ќе имаме богата жетва и зголемен принос на ориз
Министерот за земјоделство, шумарство и водостопанство, Цветан Трипуновски денеска присуствуваше на манифестацијата „Денови на кочанскиот ориз“ во с. Оризари, општина Кочани.
„Денес се наоѓаме во Оризари, општина Кочани на манифестацијата „Денови на кочанскиот ориз“, со што започнува и жетвата на оваа култура. Ние како Министерство ја поддржуваме оваа манифестација се со цел да ја продолжиме традицијата и да го афирмираме постоењето на оваа битна житна култура за нас како држава“, истакна министерот Трипуновски.
„Се надевам дека ќе имаме успешна жетва и дека ќе имаме богат род и квалитетен ориз од реколта 2024 година“, посочи Трипуновски.
Во својата се изјава министерот се осврна и на тоа дали домашниот ориз ќе се откупува за стокови резерви при што посочи -„Веќе со заклучок на Влада задолжена е Агенцијата за стокови резерви да ги измени сите правилници, уредби и програми и нормално да се предвидат средства за 2025-та година каде што оризот согласно Законот за стокови резерви ќе се откупува за чување за потребите на државата“.
Тој додаде дека од разговорите со земјоделците првичните информации говорат дека ќе има зголемен род, богата жетва и согласно тоа квалитетот ќе биде добар.
„Првичните информации говорат дека и рандманот ќе е исто така висок, што значи дека ќе имаме богата жетва и ќе имаме зголемен принос на ориз. И квалитетот ќе биде многу подобар од претходните години“, истакна министерот Трипуновски.
„Согласно информациите кои што ги добив од Државниот земјоделски инспекторат во Република Македонија сериозна количина на увозен ориз нема, и онаа количина што е во минимални рамки, морам да кажам дека ја контролираме согласно квалитетот и безбедноста да биде запазена. Меѓутоа она што е наш приоритет како Влада е да работиме и работиме во интерес на земјоделците се со цел да го заштитиме домашното производство“, посочи тој.
Министерот укажа дека останатата количина на ориз од минатата реколта е во многу помала количина. И во разговор со компаниите веќе започнаа да го откупуваат и ланскиот ориз.
„Работиме земјоделците да имаат откупена количина на ориз по рентабилна цена која што ќе значи стимул за наредниот период да се произведува. Ние како Министерство и како Влада ќе го следиме процесот. Нормално ќе го следиме и во делот на откупот од страна на компаниите дали се почитуваат сите законски норми се со цел да нема злоупотреба и манипулација на трудот на земјоделците од овој регион“, нагласи Трипуновски.