Министерот за транспорт и врски, Благој Бочварски, престојува во работна посета во Брисел, каде што учествува на министерскиот Совет на транспортната заедница за Западен Балкан, чиј домаќин се Европската комисија и комесарката за транспорт, Адина-Јоана Вален.

На Советот се разговараше за напредокот на имплементацијата на акциските планови во делот на патниот и железничкиот транспорт, транспортното олеснување и подигнување на безбедноста на патиштата во земјите од Западен Балкан.

Во своето обраќање Бочварски ја потенцира стратешката определба на Владата за изградба на патниот и железничкиот Коридор 8, со посебен акцент на доизградбата на железничкиот крак Исток – Запад за постигнување на ТЕН-Т-стандардите на транспортната мрежа.

Тој го нотира Коридор 8 како значаен правец за регионалната интеграција и побара од Европската комисија тој да биде вметнат во единствениот европски коридор за Западен Балкан.

„Имајќи предвид дека и во железничкиот и во патниот Коридор 8 недостигаат делници што треба да се изградат, односно надградат, за да бидат на ниво на барањата на ТЕН-T-мрежата, ова бара време, но и огромни финансиски средства. Поддршката од ЕУ, поконкретно од Европската комисија, е суштинска. И во оваа пригода ја бараме вашата поддршка во реализирање на нашето барање за влез на нашите коридори во основната ТЕН-Т-мрежа, особено на западниот дел од Коридорот 8. Нотираме дека регионалната соработка во Западен Балкан е координирана и во однос на реализација за ТЕН-Т, Коридорот 8 е на високо ниво“, изјави Бочварски.

Како дел од акцискиот план, тој го истакна воспоставувањето сигурен и безбеден транспорт преку изготвениот нацрт-закон за формирање агенција за безбедност, како и воспоставувањето на интелигентниот транспортен систем на Коридорот 10. За таа цел, побара техничка и финансиска помош од Европската Унија.

„Исклучително би ценеле, доколку ни се овозможи, техничка помош за Агенцијата за безбедност за континуирана и одржлива поддршка во воспоставувањето и функционирањето на целокупниот систем за безбедност на патиштата во земјата на принципот на т.н. Safe system approach. Во исто време би сакал да потенцирам и за огромната потреба од финансиска поддршка во смисла на поголем пристап до грант-средства, особено за сложените регионални инфраструктурни проекти“, истакна Бочварски.

Во рамките на министерскиот Совет се потпиша и декларација за воспоставување поблиска соработка во транспортниот сектор меѓу ЕУ, земјите од Западен Балкан и Грузија, Молдавија и Украина како чекор понапред во развојот на меѓународниот транспорт во Европа.