Економија
Бочварски и Николовски од Крива Паланка: Градот го живее своето модернизирање, инвестираме во изградба на квалитетна патна и железничка инфраструктура

Министерот за транспорт и врски, Благој Бочварски, заедно со министерот за земјоделство, шумарство и водостопанство, Љупчо Николовски, заменик-министерот за информатичко општество и администрација, Александар Бајдевски, и градоначалникот на општина Крива Паланка, Сашко Митовски, денеска изврши увид во активностите за реконструкцијата на главната улица Св. Јоаким Осоговски во општина Крива Паланка.
Ако претходно Североисточниот Регион од минатите влади беше заборавен, денес оваа Влада посветено реализира големи инфраструктурни проекти, со кои силно се развива овој регион инвестирајќи во патната и железничката мрежа, нови фабрики и многу значајни проекти за целата држава.
„Работиме на изградбата на експресниот пат Ранковце – Крива Паланка, инвестицијата е повеќе од 62 милиона евра. Исто така, во завршна фаза е проширувањето на државниот пат од Крива Паланка до Деве Баир, инвестиција од 12 милиони евра. Активно ја градиме пругата од Куманово до Крива Паланка , каде што на првите 2 фази веќе работиме на терен, инвестиција од над 200 милиони евра, а до крајот на годината очекувам да се распише и јавен повик за изградба и на третата фаза од тука па сè до Деве Баир, најтешката делница од оваа пруга, со што вкупната инвестиција на источниот крак од железничкиот Коридор 8 ќе надмине 700 милиони евра. И ова се најголемите проекти и инвестиции што се работеле до сега во Крива Паланка и што е уште позначајно, многу локални компании и граѓани се ангажирани како логистика во нивната изградба“, изјави министерот за транспорт и врски, Благој Бочварски.
Овие години во Крива Паланка се случува урбана револуција. Инвестициите во изградба и реконструкција на градските улици не се само обична инфраструктура, тие се артерии на прогресот, поврзувањето и развојот на градот.
Од денеска почна реализација на еден од главните капитални проекти за градот, реконструкција на главната улица Св. Јоаким Осоговски. Со новото решение целосно се реализира и регулира нормалниот тек на сообраќајот за моторните возила, се воведуваат нови паркинг-позиции и комплетно се реализира пешачкиот сообраќај со изградба на широки и модерни тротоари за правилно движење на пешаците. Со решението Крива Паланка го добива првиот кружен тек како современо решение за надминување на сообраќајните метежи и овозможување побрз и полесен проток на возилата.
„Градот го живее своето модернизирање. Европскиот лик на Крива Паланка е секојдневие за жителите и сите посетители на градот. Позитивните промени што се случуваат му носат на градот многу поволности, кои се отсликуваат со забрзан економски развој, унапредување на туризмот, но и транспортот и движењето на стоките. Остануваме посветени на реализација на нашата идеја за Крива Паланка. Вложуваме и ќе продолжиме уште поактивно да вложуваме во стратешки инвестиции, кои значат развој на Крива Паланка, подобар живот за граѓаните и подобар стандард за сите. Зборот е збор, го дадовме и го исполнуваме. И сега и во иднина“, изјави министерот за земјоделство, шумарство и водостопанство, Љупчо Николовски.
Во рамките на денешната посета на општина Крива Паланка, двајцата министри, заедно со градоначалникот на општина Крива Паланка, изврши увид во реконструкцијата и на пет улици во населбата Илинденска, инвестиција реализирана со средства на Општина Крива Паланка.
Со финансиска поддршка од Владата за Општина Крива Паланка обезбедени се и средства во вредност од 26,6 милиони денари за реконструкција на трите главни моста над Крива Река. Преку овој проект предвидена е реконструкција на Шанин мост во вредност од 10.800.000 денари, Виолетов мост во вредност од 6.200.000 денари и Осички мост во вредност од 9.600.000 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Николоски: Голем раст на градежништвото и транспортот

Бруто домашниот производ порасна за 3.4% во април, мај и јуни. Особено ми е драго што секторите градежништвото, транспорт и складирање силно растат! Тие се двигатели на македонската економија! Во вториот квартал секторот градежништво порасна за 7.3%, објави вицепремиерот и министер за транспорт Александар Николоски на својот фејсбук профил.
„Голем раст на градежништвото, транспортот и складирањето.
Премиерот Христијан Мицкоски објави одлични вести за македонската економија – во месеците април, мај и јуни бруто домашниот производ порасна за 3.4% . Особено ми е драго што секторите градежништвото, транспорт и складирање силно растат! Тие се двигатели на македонската економија!
Во вториот квартал секторот градежништво порасна за 7.3%, уште посилен раст од тој во првиот квартал од 7.1%, додека секторот транспорт и складирање порасна за 6.0% .
Со засилената активност во делот на изградба на патишта, инвестиции во железници и проекти од локално значење растот во третиот квартал ќе биде уште посилен благодарение на вредните работници кои работат во секакви временски услови и јасните политики и стратегија на Владата и Министерството за транспорт.
Ја градиме Македонија“, напиша вицепремиерот Николоски.
Економија
Славески од Глобалниот форум на АФИ: Финансиската вклученост е предуслов за одржлив раст и за стабилност

„Секој човек има право на фер и квалитетни финансиски услуги, а финансиската едукација е клучот за стабилен систем и за заштита на граѓаните“ – порача гувернерот на Народната банка, д-р Трајко Славески, на Глобалниот форум за политики на Алијансата за финансиска инклузија (АФИ), којшто се одржува во Намибија.
Во своето воведно обраќање пред регионалната иницијатива за Источна Европа и Централна Азија (ECAPI), гувернерот нагласи дека финансиската вклученост претставува темел на сеопфатниот економски раст и благосостојбата на општествата. „Само финансиски писмени граѓани можат да носат исправни одлуки за штедење, задолжување и за инвестирање, а со тоа придонесуваат и за стабилноста на целиот финансиски систем“, рече Славески.
Тој нагласи дека дигитализацијата и финтек-иновациите отвораат огромни можности за поширок пристап до финансиски услуги, но носат и нови ризици – како што се нови типови измами, злоупотреби на лични податоци и ризик од презадолжување на домаќинствата. „Во дигиталната ера е неопходно развивање ефикасни иницијативи за финансиска едукација и алатки за различни целни групи – од младите до постарите генерации“, истакна гувернерот.
Во обраќањето тој се осврна и на активностите на Народната банка во областа на финансиската вклученост. Посочи дека нашата земја оваа година стана членка на Единствената област за плаќања во евра (СЕПА), што ќе овозможи побрзи, поевтини и посигурни трансакции за граѓаните и за компаниите. Покрај тоа, се работи на воведување основна сметка за плаќање со фиксeн и пристапeн надоместок, наменета особено за ранливите категории граѓани. „Намалувањето на банкарските надоместоци и воведувањето нови механизми за заштита на потрошувачите се важни чекори за повисока вклученост“, нагласи Славески, додавајќи дека во подготовка е и втората Национална стратегија за финансиска едукација и финансиска инклузија.
„Да се биде дел од големото семејство на АФИ за нас претставува и чест и обврска за постојана размена на искуства и знаења. Народната банка и во иднина ќе биде целосно посветена на овој процес“, истакна гувернерот, изразувајќи благодарност за поддршката и соработката со АФИ и со институциите од регионот. На Глобалниот форум, заедно со гувернерот, учествуваат и главната економистка Анета Крстевска и советничката на гувернерот Весна Стојчевска.
Гувернерот Славески учествуваше и во панел-дискусијата на Глобалниот форум за политики на Алијансата за финансиска инклузија (АФИ), посветена на зголемувањето на вклученоста на жените на пазарот на труд. Во своето излагање, Славески нагласи дека сеопфатниот раст е незамислив без родова еднаквост и еднакви економски можности. „Според Глобалниот извештај за родовиот јаз за 2024 г., иако разликите во пристапот до образованието и здравството речиси исчезнаа, најголемиот јаз останува во економската и политичката застапеност на жените“, истакна тој, повикувајќи на проактивни светски политики. Воедно, тој ги претстави активностите на Народната банка во оваа област, меѓу кои и улогата на институцијата како национален координатор за спроведување на Кодексот за финансирање на жените претприемачи (We Finance Code − WeFi Code) – светска рамка за затворање на родовиот јаз во финансирањето на женските бизниси, поддржана од Светската банка, ЕБОР и од други меѓународни партнери.
Членството на Народната банка во Алијансата за финансиска инклузија е со поддршка на Европскиот фонд за Југоисточна Европа (ЕФСЕ) и Европската банка за обнова и развој (ЕБРД).
Економија
Дурмиши: Преку мерката за зелени инвестиции отворени се речиси 400 работни места во приватниот сектор

Министерот за економија и труд, Бесар Дурмиши, заедно со директорот на Агенцијата за вработување, Сељатин Бељули, и постојаниот претставник на УНДП, Армен Григорјан, денеска го посети ресторанот „Ксантика“, кој е еден од успешните примери на зелени инвестиции и создавање нови работни места.
За време на посетата министерот истакна дека преку Мерката 8 – „Создавање нови работни места преку зелени инвестиции“, досега се отворени речиси 400 нови работни места во приватниот сектор.
„Досега 228 компании инвестираа во зелени решенија – фотонапонски панели, енергетска ефикасност и модерна опрема. Компаниите вложија над 200 милиони денари сопствени средства, што е повеќе од државната поддршка. Тоа покажува дека политиката на Владата не е само субвенција, туку катализатор за приватен капитал и за зелена економија,“ рече министерот Дурмиши.