Економија
Бочварски на средба со жителите на кавадаречко Мрежичко и Рожден, заврши првата фаза од рехабилитацијата на регионалниот пат

Министерот за транспорт и врски, Благој Бочварски, заедно со директорите на ЈП за државни патишта, Ејуп Рустеми, на ЈП за одржување магистрални и регионални патишта, Костадин Ацевски, придружувани од пратениците од Кавадарци, Панчо Минов и Даниела Колева, ги посети Мрежичко и Рожден, каде што заврши рехабилитацијата на дел од регионалниот пат, кој ги поврзува овие населени места.
Градежните работи од првата фаза на рехабилитацијата на регионалниот пат од Мрежичко кон Рожден ги изврши ЈП за одржување магистрални и регионални патишта.
На средба со локалното население министерот Бочварски потврди дека и в година ќе се обезбедат средства за продолжување на рехабилитацијата на овој регионален пат, а жителите се заблагодарија за поддршката бидејќи со овој проект се решава едно повеќегодишно барање на локалното население од овој регион.
„Тоа што го ветивме заедно со директорите Рустеми и Ацевски, денеска е исполнето. Ме радува што ве гледам во толкав број, нашето присуство денеска тука заедно и со пратениците од Кавадарци е само потврда на нашите цврсти заложби и уште еден доказ дека за нас зборот што им го даваме на жителите е врвен приоритет. Свесен сум од колкаво значење е овој патен правец за вас, затоа пристапивме со негова брза реализација. Минатата година го рехабилитиравме и патот кон населеното место Мушов Гроб, со што сметам дека со овие нови патни правци значително ја подобривме безбедноста за патување и го олеснивме вашето секојдневно функционирање. Благодарам за убавиот пречек и посакувам да се гледаме и во наредни пригоди за вакви убави работи“, истакна министерот Бочварски пред присутните граѓани.
Дополнително, Општина Кавадарци добива силна поддршка од централната власт, каде што досега се реализираа реконструкции на повеќе локални улици во градот, а во делот на комуналната инфраструктура се реализира многу значаен проект вреден повеќе од 2 милиона евра, со кој се изврши реконструкција на фекалната и на атмосферската канализација на повеќе улици во Кавадарци.
Министерството за транспорт и врски продолжува со силната градежна офанзива во целата земја, изградбата и модернизацијата на целокупната патна инфраструктура останува примарен фокус и оваа градежна сезона.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
За четири дена доставени повеќе од 2.500 пријави за самовработување

Во салата на кино „Манаки“ во Битола денеска беа презентирани мерките од Оперативниот план за вработување за 2025 година.
Пред голем број на граѓани претставниците од министерството за економија и труд, Агенцијата за поддршка на претприемништво и Агенцијата за вработување ги презентираа мерките од Оперативниот план, со акцент на трите подмерки од мерката за самовработување (претприемништво), каде јавните повици се објавени и сите заинтересирани можат да аплицираат до 20 јуни.
„Со мерките за самовработување на сите невработени лица им даваме финансиска поддршка за отворање на сопствен бизнис, која се движи од 7.000 до 10.000 евра, а со здружување на две лица од 14.000 до 20.000 евра. Имаме исклучително голем интерес за овој јавен повик и за само четири дена се пријавени повеќе од 2.500 лица. Ги повикувам сите лица кои се заинтересирани да аплицираат во било кој од 30-те Центри за вработување при Агенцијата за вработување низ државата“, кажа заменик-министерот за економија, Марјан Ристески.
Во рамки на јавните повици од мерката 1 „Поддршка за самовработување (претприемништво)“, во тек се три јавни повици со кои се дава можност на повеќе од 1700 лица да отворат сопствен бизнис и со истите се предвидени:
– Финансиска поддршка во форма на грант до 7.000 евра за основање и започнување на бизнис за лица постари од 29 години.
– Финансиска поддршка во форма на грант до 10.000 евра за основање и започнување на бизнис за млади лица до 29 години.
– Финансиска поддршка за здружување на две лица во ДОО, каде истата изнесува од 14.000 до 20.000 евра, зависно од целните групи.
Економија
Укинувањето на царините за стоките од САД не е само трговска одлука, туку и дипломатски чекор, вели Стојанова

Со новите измени и дополнувања на Законот за царинските тарифи, Собранието ќе даде зелено светло на планот на Владата да се намалат царинските давачки на голем број суровини и репроматеријали што се користат во домашната индустрија и во енергетиката, изјави Дафина Стојаноска, пратеничка од ВМРО-ДПМНЕ.
„Списокот со 70-ина производи, кој е составен на транспарентен и инклузивен начин, во соработка со Стопанската комора, вклучува намалување до 50 % на царинските стапки што важат во ЕУ, како и укинување на царините за увоз од САД. Овие измени ќе значат пониски трошоци за домашното производство, а со тоа зголемена конкурентност на странските пазари, нови инвестиции и повеќе вработувања“, рече таа.
Укинувањето на царините за стоките по потекло од Соединетите Американски Држави, пак, додаде Стојаноска, не е само трговска одлука, туку и дипломатски чекор, со кој испраќаме сигнал за зголемена подготвеност за соработка со нашите стратешки партнери и поддршка за слободната трговија.
„Со оваа законска измена македонските компании ќе станат поконкурентни, ќе се намалат цените за производство и ќе се зголеми извозот, со што директно ќе влијае на растот на економијата. Ова е само еден чекор од поширокиот план за економски раст. Клучна измена со која се посветуваме на економијата во пракса, а не само на хартија“, рече Стојаноска.
Економија
Цените на нафтата го забележаа најголемиот скок во последните неколку години поради стравот од војна

Глобалните цени на нафтата пораснаа за повеќе од 4 проценти забележувајќи го најголемиот дневен процентен пораст од март 2022 година поради стравувањата дека потенцијалното проширување на конфликтот на Блискиот Исток би можело да предизвика големи прекини во снабдувањето со енергија.
Цената на „Брент“, меѓународниот референтен стандард, се зголеми за 4,3 проценти, на 72,40 долара за барел, а американската референтна нафта West Texas Intermediate (WTI) скокна за 5 проценти, на 71,40 долар за барел.
Според „Ројтерс“, ова се најголемите еднодневни скокови за двете референтни цени на нафтата од март 2022 година кога почна војната во Украина.
„Остриот пораст на цените на ‘Брент’ ги одразува не само тековните ризици за снабдување туку и растечкото чувство дека потенцијалната ескалација на конфликтот би можела да трае за разлика од претходните краткотрајни епизоди меѓу Израел и Иран“, рече Ахмад Асири, истражувачки стратег во „Пеперстоун“.
Нервозата на пазарите дополнително се потврдува со движењата на американските берзи, пренесува „Танјуг“.