Економија
(Видео) Антовски: На криминалите во РЕК „Битола“ им нема крај

На скандалите и криминалите во РЕК „Битола“ никако да им дојде крајот. По нашето обелоденување на криминалниот тендер за ископ на јаглен додека невешто се трудат да ги оправдаат своите афери, ги повикуваме да објаснат како ги поделиле 7-те милиони евра повеќе, изјави на денешната прес-конференција Стевче Антовски од ВМРО-ДПМНЕ.
Тој наведе дека РЕК „Битола“ склучува коруптивен договор во висина од 20.000.000 евра на тендерот со еден понудувач, „Марковски компани“, а само за споредба, кога имало конкуренција за истата намена во 2021 година, РЕК „Битола“ платил 13.000.000 евра, што е за 7.000.000 евра помалку.
Бројките се немилосрдни. Кога имало конкуренција, цените биле далеку пониски. Еве, на пример, во минатото кога имало негативно наддавање за тендер, цената на јагленот по GJ (гига-џул) достигнувала 99 денари/GJ (единечна цена во која се наплаќа донесениот јаглен во сооднос квалитет и количина). Напротив, кога немало наддавање во 2021 година, цената била неверојатни 130 денари на тендерот што го договориле во четири очи со фирмата што ја фаворизираат. За истата услуга во 2022 година, цената достигнала до 153 денари со ДДВ, повторно на тендер што е договорен во четири очи!
Ете затоа тендерите стануваат сè поскапи, а РЕК „Битола“ тоне сè повеќе, рече Антовски.
Антовски додаде дека лакомоста на раководството на РЕК „Битола“ не завршува тука. Криминалот е многу поголем при реализација на овие тендери кога истиот камион неколкупати поминува на вага со товарениот материјал, без да го истовари на депониите за јаглен, т.е. истиот товар се наплаќа и фактурира неколкукратно, па оваа цена неколкукратно ја надминува цената за GJ.
Тој додаде дека договорите што ги објавуваат сведочат за тоа како преку семејната фирма на синдикалниот лидер Менде Фидановски, „Компакт МСФ“ ДООЕЛ Битола, се испумпуваат народни пари од РЕК „Битола“. Фирмата учествува на тендер во РЕК „Битола“ и го добива тендерот. За тоа сведочат договорите од 21.6.2022 година и од 26.8.2022 година. Разликата од оние договори од 2020 година е што тогаш тие се потпишувани од сопругата на Менде, а во 2022 година од синот бидејќи како награда сопругата на Менде веќе е вработена во РЕК „Битола“.
Антовски ги повикува истражните органи да реагираат по допрен глас за лица што ги крадат нашите и вашите пари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дурмиши за новата потрошувачка кошничка: ќе служи за градење политики поврзани со минималната плата и ќе се усогласи со европските стандарди

На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Економија
Трипуновски: Откупните цени за пиперката се зголемени – прва класа ќе се откупува по 45 денари за килограм

Откупните цени за пиперката се зголемени – прва класа ќе се откупува по 45 денари за килограм, изјави министерот за земјоделство, шумарство и водостопанство, Цветан Трипуновски.
„На состанокот се договорија откупните цени по класи за пиперката. За прва класа откупната цена на пиперката изнесува 45 денари, за прва-втора класа е 35 денари, за втора класа откупната цена изнесува 20 денари, а за трета класа откупната цена ќе биде 15 денари”, појасни министерот.
Тој посочи дека тоа се почетните цени со кои што ќе започне откупот на пиперката за реколтата 2025 година.
„Пиперката во Македонија се одгледува во два региони – струмичкиот и прилепскиот регион. Бербата треба да биде во договорен период за да не се соочиме со зголемена количина на берба на пиперка во текот на денот и да имаме застој во откупот”, додаде министерот Трипуновски.
Министерот истакна дека оваа година откупните цени за пиперката се зголемени во однос на минатата година.
„Текот на откупот ќе го следиме преку Државниот инспекторат за земјоделство. Како Министерство стоиме на располагање, а трендот на зголемување на земјоделското производство треба да продолжи и понатаму”, посочи тој.
Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.