Економија
(Видео) Димитриеска-Кочоска: Владата на СДСМ и ДУИ нѐ турна во фискален амбис
„Владата на СДСМ и ДУИ не турна во фискална провалија. Сите валкани работи од владеењето на СДСМ/ДУИ ги исфрли објавата на Бруто домашниот производ за 2023 година од страна на Државниот завод за статистика од пред некој ден. Расипничкото трошење на државните пари – на парите на граѓаните и бизнисите, корупцијата во јавните набавки, криминалите кои ги правеа со буџетските средства во изминативе години СДСМ и ДУИ, на крајот од нивниот мандат се откриени преку бројки, кои сведочат за погубната состојба на македонската економија, на државниот буџет и јавниот долг“, рече Гордана Димитриеска Кочоска, потпретседател на ВМРО-ДПМНЕ.
„Во 2023 година македонска економија има реален раст од – внимавајте, само 1% а планираа 2,9%. Растот којшто го испорачаа е за три пати понизок од она што го планираа. Растот е погубен и најнизок од сите земји во регионот кои пораснаа со Црна Гора 6,6%, Албанија 3,5%, Хрватска 2,8% и Србија 2,5%.
Остварија реален пад од 17% на бруто-инвестициите, а планираа раст од 5%. Викаа дека инвестициите ќе го носат растот. Кои инвестиции прашуваме? Ни камче не помрднаа во нивниот мандат!
Неиспорачувањето на реален раст на економијата и грешката во проекција за БДП дефлаторот придонесе за низок годишен раст од само 4,7% на номиналниот БДП, а не од 11,4% – колку што планираа. Ова ги измести соодносите на јавниот долг како процент во БДП и на буџетскиот дефицит како процент од БДП. И што е резултатот?
Фантастични 62% од БДП се искачи јавниот долг на крајот од 2023 година и ја надмина границата утврдена со Мастришките критериуми на ЕУ од 60%. Неверојатни 8,5 милијарди евра е состојбата на долгот на крајот на 2023 година или оваа власт дополнително не задолжи за 3,8 милијарди евра за само 7 години! Остварија огромен буџетски дефицит од 4,9% од БДП во 2023 година, а планираа 4,6% од БДП. Длабоко го прекршија фискалното правило за буџетски дефицит од 3% од БДП кое стои во Закон и тоа втора година по ред. Каде е новоформираниот ФИСКАЛЕН СОВЕТ да интервенира? Да укаже на оваа огромна неправда за граѓаните.
И внимавајте, уште не задолжуваат, и тоа, со силно темпо од почетокот на годинава. За два и пол месеци на 2024 година имаат креирано НОВ долг на домашен пазар на хартии од вредност од 237 милиони евра! Одат до крај да ја уништат економијата.
Толку од европското однесување на СДСМ и ДУИ. Нѐ презадолжија.
Алармиравме, алармиравме и алармиравме уште од 2020 година. Ја искористија позицијата под изговор за стабилизација на кризи и си трошеа, крадеа, а за тоа се задолжуваа без мерка.
А што стабилизираат и испорачаа? Најнизок просечен економски раст во македонската историја од само 1,6%. Внимавајте 1,6% просечен раст на БДП којшто е малку поголем од оној кој го имавме во транзицијата. Па и другите земји беа во кризи, а како успеаа да растат повеќе од нас, па како наспроти нас имаат и помал раст на јавниот долг?
Кај се сега сите „сценаристи“ на грчкото сценарио од пред седум години да викаат дека сме презадолжени, дека идеме во банкрот?
Тогаш да потсетам, имавме понизок јавен долг од сегашниов за 80% или тогаш имавме долг од 4,7 милијарди евра, наспроти 8,5 милијарди евра денес. Сценариото од пред седум години денес е реалност, а главните сценаристи се СДСМ и ДУИ.
Каде е НАРОДНАТА БАНКА, барем еднаш, да алармира за фискалната недисциплина, која во континуитет ја нарушува каматната политика? Народната банка ги поскапува каматите за бизнисите и населението да не трошат, за да се стопира инфлацијата, ама оваа власт си троши без контрола. Каде е Народна банка јасно да застане зад ова презадолжување на ВЛАДАТА? Ги нема.
Македонија е во стагфлација, а оваа власт не фрли во должничко ропство.
Оставаат опасна економска катастрофа. Оставаат и 1,8 милијарди евра обврски за плаќање на камати во наредните 5 години, или 360 милиони евра годишно, пари со кои можеа да се изградат патишта, училишта, градинки, да се зголемат плати, пензии.
Ги презадолжија идните неродени генерации, младите, пензионерите, просветните работници, здравствените работници, бизнисите кои го полнат буџетот итн. А, за што се потрошија парите на граѓаните и бизнисите? Допрва ќе има одговори и одговорности“, изјави Гордана Димитриеска Кочоска, потпретседател на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
БРАКО ќе промовира ново електрично возило на саем во Минхен
БРАКО ќе претстави ново електрично возило од својот бренд Грин Машинс на светскиот саем IFAT, кој следната недела ќе се одржи во Минхен.
Возилото беше развивано две години од страна на инженерскиот тим за развој на БРАКО/Грин Машинс и е сосема ново техничко и функционално решение во програмата за производство на возила за одржување урбана хигиена.
Моделот 720 ZE работи на електричен погон и e со технологија од последната генерација, со вградени мотори во задните тркала и управување на сите четири тркала, поголем контејнерски простор, широка кабина за две лица, 360⁰ камера и оптимизиран начин на чистење.
Се очекува новиот модел да отвори уште повеќе пазари во светот, каде се бараат возила за одржување хигиена од овој габарит и перформанси.
Моделот 720 ZE беше најавен како концепт на саемот IFAT во 2022 гoдина и тимот за развој планираше да го развие во следните две години, во што и успеа и создаде возило кое е целосно замислено, проектирано и произведено во погоните на БРАКО.
Возилото во завршна фаза беше претставено пред гостите на прославата на 20-годишнината на Феро Инвест и БРАКО пред шест месеци, а сега во Германија ќе ја доживее својата светска промоција.
(ПР)
Економија
Почна пријавувањето за директни плаќања по програмата за финансиска поддршка во земјоделството за 2024 година
Министерството за земјоделство, шумарство и водостопанство заедно со Агенцијата за финансиска поддршка во земјоделството и руралниот развој ги информира земјоделските стопанства, дека во период од 10 мај до 1 јули ќе можат да поднесат барања по Програмата за финансиска поддршка во земјоделството за 2024 година.
Во наведениот период земјоделските стопанства можат да поднесуваат барања за: растително производство по обработлива земјоделска површина со поледелски и градинарски култури, за одржување на постоечки површини со овошни и лозови насади како и површина за производство на сертифициран семенски и саден материјал, сточарско производство за обележани грла говеда, овци и кози, за маторици, презимени пчелни семејства како и за заклани говеда во кланица, како и за органско земјоделско производство.
Земјоделските стопанства своите барања ги поднесуваат во електронскиот систем на АФПЗРР, а доколку имаат потреба од помош или поддршка можат да се обратат во подрачните единици на МЗШВ.
Аплицирањето е преку линкот www.ipardpa.gov.mk – Директни плаќања е-субвенции. Со отварање на овој линк, во полето „Известувања/упатства“ достапни се деталните упатства за поднесување на барањето, Листата на потребни документи како и Програмата и Уредбата за директни плаќања во кои детално се претставени условите и висината на финансиската поддршка.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.