Економија
(Видео) Димитриеска Кочоска: Mесто 1,2 милијарди евра помош, во стопанството завршиле само 350 милиони

„Големата лага во низата на лаги на Зоран Заев ја разобличи Заменикот претседател на владата задолжен за економски прашања, Фатмир Битиќи.Конечно некој имаше доблест да признае дека вкупниот износ на мерките е 350 милиони евра и со тоа се докажа дека 1 милијарда и 200 милиони евра помош за граѓаните и стопанството е само во главата на Зоран Заев и на малкумина негови послушници“, изјави Гордана Димитриеска Кочоска, член на ИК на ВМРО-ДПМНЕ.
Според неа, партијата уште со носењето на вториот ребаланс укажала дека помошта за 2020 година нема да биде поголема од 350 милиони евра, што се докажа како точно.
„Како одговорна опозиција уште на самиот почеток кажавме дека владата треба брзо да реагира и да обезбеди средства со цел да му помогне на стопанството при што потпишав над 1 милијарда евра кредити кои требаше да завршат во стопанството. Власта да не се скрие зад Собранието, парите од еврообврзницата стигнаа во јуни кога се издаде еврообврзницата со најголем износ во историјата на македонската економија. Имаа и вонредна состојба, нели за тоа беше прогласена?
Дали е ова најголемиот доказ дека владата иако ги имаше сите механизми да му помогне на стопанството и населението, во тоа време беше фокусирана како да обезбеди поткуп на гласачи, а стопанството беше во втор план. На дел од населението му дадоа еднократна помош, но затоа денес тоа исто население има поскап живот, поскапе струјата поскапе лебот, поскапеа сите продукти потребни за преживување, секој ден гледаме по различни општини како се носат одлуки за поскапување на водата. Вака ли го помогнаа населението кое допрва ќе се соочува со потежок живот поради порастот на цените на сите продукти?Лошото за Македонија допрва доаѓа. Буџетот не се поли согласно проекциите, наплатата е помала, фирмите имаат проблем со ликвидност, сега се уште имаат одложени отплати на кредити, но денот кога ќе треба да почнат да враќаат ќе дојде, додаде таа.
Димитриеска Кочоска вели дека треба да се забрани вработување во јавната администрација (онаа која беше преполнета во 2016) се трошат десетици милиони евра за ова. „Се расфрлаат пари за непродуктивни цели. Државата наместо да внимава како троши, троши расипнички.Банките во Македонија се изложени на историски највисоко ниво кон државата од рекордни 450 милиони евра позајмени пари на државата само за 2020 а кон стопанството 250 милиони евра.
И покрај сите пари кои владата ги зема и го зголеми јавниот долг за 1 милијарда евра, за стопанството и населението издвоија 350 милиони евра.И за крај прашувам, ако СДСМ вели дека помошта која што ја дале на стопанството е 1 милијарда и 200 милини евра, а Фатмир Битиќи вели 350 милиои евра каде завршија оние 850 милиони евра?“, додаде таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.
Економија
Финансиска и енергетска стабилност како приоритет – средба на министерката Божиновска со гувернерот Славески

На работната средба на министерката за енергетика, Сања Божиновска, со гувернерот на Народната банка, Трајко Славески, се разговараше за тековните енергетски проекти и нивните финансиски импликации врз компаниите и економијата.
Во фокусот на разговорот беа влијанијата на новите регулативи за декарбонизација и зелената енергетска транзиција на Европската Унија, кои носат значајни предизвици, но и можности за развој на обновливите извори на енергија во нашата земја, како и нивното значење за домашните компании и целокупната економија. Беше нагласено дека за компаниите е потребна поддршка во приспособувањето кон овие промени, за да се намалат финансиските оптоварувања и да се зачува конкурентноста на домашниот пазар.
Гувернерот Славески и министерката Божиновска се согласија дека финансискиот сектор е главен поддржувач на транзицијата кон поголема енергетска одржливост, соодветно соработката помеѓу Министерството за енергетика и Народната банка е значајна за креирање на мерки кои ќе ја поддржат економијата во целина, особено во услови на глобални економски предизвици.
На средбата беше истакнато дека развојот на енергетскиот и рударскиот сектор е од клучно значење за зајакнување на финансиската независност на земјата и обезбедување енергетска стабилност која ќе ги штити интересите на граѓаните и компаниите и ќе обезбеди отпорност на земјата кон надворешни економски шокови.
Во наредниот период ќе се работи на конкретни иницијативи и политики за олеснување на пристапот до финансиски средства за инвестиции во зелена енергија и технолошки модернизации, со цел да се поддржи економскиот раст и одржливоста, но за да се обезбедат ефективни решенија кои ќе ги поддржат компаниите во процесот на прилагодување, како и стабилноста на националната економија.
Економија
Божиновска: Меѓународни експерти за енергетика и Германското друштво за меѓународна соработка со поддршка за енергетскиот форум

Министерката Сања Божиновска оствари работна средба со Давид Оберхубер, директор на Германското друштво за меѓународна соработка (GIZ) во нашата земја.
Средбата беше фокусирана на зајакнување на тековната соработка меѓу министерството и ГИЗ, со посебен акцент на подготовките за претстојниот 14. Меѓународен форум за енергија за одржлив развој кој ќе се одржи од 28 до 30 октомври 2025 година во Скопје, под мотото „Од цели до акција: Напојување на иднината со одржлива енергија“
Настанот е организиран од Министерството за енергетика, рударство и и минерални суровини, во партнерство со Програмата за развој на Обединетите нации (УНДП) и петте регионални комисии на Обединетите нации.
ГИЗ, како долгорочен партнер на Македонија во областа на одржливиот развој и енергетиката, ја потврди својата подготвеност да даде активна поддршка на настанот – преку мобилизација на меѓународни и домашни експерти, како и учество во концептуализација и организација на тематски панел-дискусии, информираат од кабинетот на министерката.
Во рамките на средбата, беше направен преглед на тековните проекти што се реализираат со поддршка на Германското друштво за меѓународна соработка, особено во доменот на енергетската ефикасност. Двете страни изразија задоволство од досегашните резултати, кои покажуваат конкретен напредок во унапредувањето на националните капацитети и подобрување на условите за поефикасно управување со енергетските ресурси.
Покрај актуелните иницијативи, разговарано беше и за идните правци на стратешка соработка. Притоа, беа разгледани можности за развој на нови заеднички проекти за 2026 година, кои би се фокусирале на поддршка на процесот на енергетска транзиција, дигитализација на енергетскиот сектор, како и унапредување на институционалните капацитети преку техничка и експертска помош.
Божиновска ја нагласи важноста на континуираната поддршка од страна на ГИЗ, оценувајќи ја оваа соработка како исклучително вредна за унапредување на одржливите и инклузивни политики во енергетскиот сектор. Таа додаде дека Министерството останува отворено за понатамошно продлабочување на партнерството, со цел обезбедување стабилна, зелена и иновативна енергетска иднина за граѓаните на Македонија.