Економија
(Видео) Заев: Компаниите со турски капитал се двигател на македонска економија
„Денеска сме во многу значајна комора – МАТТО, која е репрезент на нашето пријателство со Република Турција. Сериозен израз на инвестиции од македонско-турски компании и трговска размена во вредност блиску 500 милиони евра. Тоа е раст од 4% во споредба со претходната година. Заедничка цел е да постигнеме една милијарда евра трговска размена помеѓу двете земји“, истакна претседателот на СДСМ, Зоран Заев, на денешната средба со претставници – членки на Стопанската комора на Македонија – Турција МАТТО.
Заев подвлече дека компаниите со турски капитал се доста важни за македонската економија и имаат значаен удел во економскиот раст, намалување на невработеноста преку отворање нови и добро платени работни места, а со тоа и во подигање на севкупниот животен стандард на граѓаните и задржување на младите тука.
„Турските компании се двигател на македонска економија и сериозен импакт во нашиот извоз. Тие се едни од најголемите работодавачи и инвеститори во земјава и тоа во речиси сите индустриски области, од производство до угостителство“, рече претседателот Заев и додаде дека постојат уште можности за унапредување на економските односи меѓу двете земји, особено во делот на туризмот, земјоделството и во делот на образованието и културата.
„Развиваме модели на нова соработка која почна како процедура отворена од МАТТО со Владата, која верувам после изборите ќе ја реализираме. Се однесува на индустриската зона во Гевгелија, каде може да им понудиме на турските компании природниот профитабилен интерес да го фиксираат во Република Северна Македонија. Зборуваме за отстранување одредени бариери и за користење на бенефитите од договорот за слободна трговија помеѓу двете држави за слободен проток на стоки, услуги, капитал без царински бариери и давачки. Директните предлози и сугестии ќе се вградат во изборната програма која верувам ќе биде владина програма со цел да ја подобриме македонската економија и да бидеме подобар сервис на македонско – турските инвеститори во нашата земја“, заокружи Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Нови цени на бензинот и дизелот од полноќ
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 0,29 % во однос на одлуката од 27.5.2024 година.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,467%, кај дизелот за 0,878%, кај екстра лесното масло за 1,614% и кај мазутот зголемувањето е за 2,412%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,056%
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се намалуваат за 0,50 ден/лит.
Малопродажната цена на Екстра лесното масло за домаќинство на (ЕЛ-1) се намалува за 1,00 ден/лит.
Малопродажната цена на Мазутот М-1 НС се зголемува за 0,756 ден/кг.
„Напоменуваме дека ова се максималните цени на нафтените деривати од 00:01 часот на 4.6.2024 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Новиот газда на „Еуроникел“ на вработените им нуди минимални плати: Ако не потпишете ќе увеземе работници од Косово
Новите газди на кавадаречки „Еуроникел индустри“ на досегашните вработени кои останаа без работа им понудиле договори за вработување со минимални плати. Вработените се жалат дека никој од околу 600 луѓе засега не потпишал нов договор оти сите плати се многу пониски од ланските.
„Засега никој не е согласен со понуденото. Платите се движат од 22.000 до 26.000 денари. Луѓе што се претставуваат како менаџери на фабриката отворено ни кажуваат -ако не потпишете ќе увеземе работници од Косовио, тие ќе бидат задоволни. Само за споредба, платите во фабриката лани почнуваа од 29.000-30.000 илјади па нагоре“, се пожали вработен во „Еуроникел“.
Игор Ѓерасов, претседател на Синдикатот на индустријата, енергетиката и рударството на Македонија (СИЕР) потврди дека понудените плати се ниски, и дека на вработените им се врши притисок да ги потпишат.
„ Точно е дека има луѓе кои притискаат вработените да ги потпишат договорите оти во спротивно ќе донесат работници од ‘Фероникели’ од Косово, која исто така не работи. Никој досега не потпиша таков договор. Ние како Синдикат ќе бараме повисоки плати за сите вработени. Нашето барање е платите да бидат околу 40.000 илјади денари, колку што бил просекот во фабриката минатата година додека се работеше“, вели претседателот на Синдикатот, Ѓерасов за „Макфакс“.
Синдикални претставници и некои од вработените денес очекуваат средба со новите сопственици на фабриката на која ќе разговараат за платите.
Поради ненаплатени побарувања, Комерцијална банка ја презема фабриката „Еуроникел“ и на крајот на март, годинава, ја продаде на друштва основани до холандската холдинг-компанија „Полиникел холдинг БВ“, која е дел од групацијата „Јилдирим“.
Новите сопственици, веднаш откога ја купија фабриката, на Синдикатот му најавија дека на сите вработени ќе им дадат можност да се вратат на работа во рок од 90 дена и дека со производство планираат да почнат во јуни.
Претседателот на Синдикатот, Ѓерасов, сега вели дека тие рокови не е возможно да се испочитуваат оти се уште не се потпишани договорите, а производството, доколку успеат да ги склучат договорите, најрано би почнало во септември.
Фарук Беќири, кого вработените во „Еуроникел“ го посочуваат како нов директор на фабриката, не одговори на прашањата од „Макфакс“ за притисоците врз вработените и понудените минимални плати.
Од околу 600 вработени, во фабриката останаа да работат 120 работници потребни за одржување на печката, но и тие велат дека не би потпишале да работат за понудената плата.
На почетокот на февруари годинава беше отворена стечајна постапка за „Еуроникел“ во која вработените имаат побарувања од 2,1 милион евра за неисплатени плати.
Градоначалникот на Кавадарци, Митко Јанчев, кој беше вклучен во преговорите за последната продажба на фабриката, најави дека по завршување на стечајната постапка ќе поднесе кривични пријави против раководството на „Еуроникел индустри“ кое минатата година ја доведе фабриката до стечај.
Економија
Семеен ден на Макстил со децата поддржани од СОС Детско село
На традиционалниот семеен ден на Макстил годинава се приклучија 20 згрижувачки семејства со 60тина деца од СОС Детското село. Од оваа година Макстил стана нов стратешки партнер на СОС Детско село и зеде под закрила една од згрижувачките куќи, обезбедувајќи целосно покривање на трошоците за пет деца и нивното згрижување во текот на цела година.
„Макстил и СОС Детско село, сега се еден вид семејство и соодветно беше нашиот семеен ден да го поминеме со новите членови на семејството. Оваа година одржувањето на традиционалното дружење на вработените на Макстил со семејствата се совпадна токму со Меѓународниот ден за згрижувачки семејства, што го направи за нас овој ден посебен. Да се градат семејни вредности, да се поддржуваат ваков тип проекти за нас е многу повеќе од зборови, и повеќе од финансиски средства. За нас оваа соработка претставува поддршка на згрижувачките семејства, децата и младите и воедно градење на основи за здраво и праведно општество за идните генерации. Со ова наше стратешко партнерство сакаме да покажаме дека со поинаков пристап може навистина да се направи голема промена“, изјави Марија Дуковска – Павловска, генерален директор на Макстил.
Повеќе од 600 вработени и нивните семејства, заедно со децата поддржани од СОС Детско село го поминаа саботното попладне пред Управната зграда на Макстил, при што беа спроведени семејни и спортски активности и различни тематски работилници, а можеа да проследат и интерактивна музичко-драмска претстава, групно танцување и да уживаат во настапот на музичкиот бенд.
„Големо беше изненадувањето и радоста по добивање на поканата од нашиот партнер Макстил за приклучување на нивниот семеен ден за нивните вработени и тоа токму на денот на згрижувачите. Со радост ја прифативме оваа можност дел од семејствата поддржани од СОС Детско село да бидат присутни на овој преубав и забавен настан. За едно дете да расте среќно, задоволно, исполнето и за да напредува натаму во животот, неопходна му е поддршката која што ја добива во семејството. Многу деца во светот не се во можност да живет со своето семејство и имаат потреба од алтернативна грижа што значи сместување на оваа ранлива група на деца во други семејства. Овој ден ги слави хероите кои одлучиле да ги отворат своите срца и домови и живеат една хумана мисија и се грижат за овие деца со многу љубов, толеранција и поддршка. Благодариме на Макстил се надеваме дека овој пример ќе го следат и други компании“, изјавија од СОС Детско село.
1 јуни е Ден на згрижувачките семејства. Од самото основање до денес, СОС Детското село посветено работи на обезбедување квалитетна алтернативна грижа за деца без родители и родителска грижа и своето успешно 23 годишно искуство го заокружува со развој на иновативна програма за поддршка на згрижувачките семејства. Новата унапредена услуга за стручна помош и поддршка на 74 згрижувачки семејства и сигурно опкружување за вкупно 140 деца и млади се обезбедува преку Центарот за поддршка на згрижувачки семејства.
(ПР)