Економија
(Видео) Сугарески го презентира предлог-буџетот за транспорт и врски за 2019 година
Министерот за транспорт и врски, Горан Сугарески, го презентира буџетот на Министерството за транспорт и врски за 2019 година. За време на прес-конференцијата Сугарески потенцира дека буџетот за 2019 година е развоен, креиран во насока на задоволување на потребите на граѓаните и стимулирање на економскиот раст на државата, во кој речиси 90 отсто од проектираните средства се расходи наменети за капитални инвестиции.
Вкупниот буџет на Министерството за 2019 година изнесува 7 милијарди, 269 милиони и 985 илјади денари. Во делот на капиталните расходи предвидени се средства во висина од 6 милијарди, 419 милиони и 925 илјади денари, изјави Суграевски.
„Реализацијата на капиталните проекти е главен предуслов за економски раст на државата и подобрување на квалитетот на живот на сите граѓани. 2019 година за Република Македонија ќе биде година на крупни капитални инвестиции во патната, железничката и во комуналната инфраструктура, како и изградба на гасоводната мрежа“, истакна министерот Сугарески.
Повеќето од капиталните расходи се наменети за изградба на железницата кон Република Бугарија и модернизација на пругата на Коридорот 10, вели тој.
„Во делот на изградба и модернизација на железницата предвидовме 3 милијарди и 340 милиони денари или 2 милијарди повеќе во споредба со буџетот за 2018 година. Сакам да најавам дека в година ќе почнеме со изградба на втората делница од Бељаковце до Крива Паланка, а очекуваме и забрзување на изградбата на пругата од Куманово до Бељаковце. Исто така, предвидовме 430 милиони денари за субвенции за „МЖ -Транспорт“, наменети за покривање на загубите од превозот на патници“, вели Сугарески.
За изградба на гасоводната мрежа, пак, предвиден е буџет во висина од 1 милијарда и 557 милиони денари или 1,1 милијарда денари повеќе во споредба со 2018 година, посочи министерот и додаде дека очекува засилени градежни работи во текот на 2019 година со оглед на тоа дека веќе се надминати сите спорни моменти со изградбата на гасоводот на Водно.
Сугарески исто така истакна и дека в година за изградба на канализации и водоводи преку проектот од Европската инвестициска банка предвидени се 590 милиони денари. Околу 288 милиони денари се предвидени за изградба и реконструкција на водоводите во Гостивар, Кавадарци, Радовиш и во Гевгелија во соработка со банката КФВ и дека исто така в година, како што посочи министерот, ќе почне и проектот за изградба на водоводната и канализациската мрежа во индустриската зона Визбегово за што проектирани се 60 милиони денари.
Во буџетот за в година проектирани се средства во висина од 84 милиони и 210 илјади денари за финансиска поддршка за авиопревозници што ќе воспостават нови авиолинии за граѓаните, вели Сугарески.
Тој потенцира дека во текот на 2019 година ќе продолжи и изградбата на социјални станови за што се предвидени 310 милиони денари.
Веќе в година почнува нов проект за олеснување на трговијата на Западен Балкан за што се проектирани 62 милиона денари, посочи Сугарески за време на презентацијата на буџетот на Министерството и додаде дека ова е проект што ќе се реализира во соработка со Светската банка и опфаќа подобрување и опремување на граничните премини, мониторинг и безбедност на патниот Коридор 10 и други активности што ќе помогнат за меѓуграничната соработка на земјите од регионот. Вкупната вредност на целиот проект изнесува 30 милиони американски долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Почна пријавувањето за директни плаќања по програмата за финансиска поддршка во земјоделството за 2024 година
Министерството за земјоделство, шумарство и водостопанство заедно со Агенцијата за финансиска поддршка во земјоделството и руралниот развој ги информира земјоделските стопанства, дека во период од 10 мај до 1 јули ќе можат да поднесат барања по Програмата за финансиска поддршка во земјоделството за 2024 година.
Во наведениот период земјоделските стопанства можат да поднесуваат барања за: растително производство по обработлива земјоделска површина со поледелски и градинарски култури, за одржување на постоечки површини со овошни и лозови насади како и површина за производство на сертифициран семенски и саден материјал, сточарско производство за обележани грла говеда, овци и кози, за маторици, презимени пчелни семејства како и за заклани говеда во кланица, како и за органско земјоделско производство.
Земјоделските стопанства своите барања ги поднесуваат во електронскиот систем на АФПЗРР, а доколку имаат потреба од помош или поддршка можат да се обратат во подрачните единици на МЗШВ.
Аплицирањето е преку линкот www.ipardpa.gov.mk – Директни плаќања е-субвенции. Со отварање на овој линк, во полето „Известувања/упатства“ достапни се деталните упатства за поднесување на барањето, Листата на потребни документи како и Програмата и Уредбата за директни плаќања во кои детално се претставени условите и висината на финансиската поддршка.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.
Економија
Се намалува мазутот, цените на дизелот и бензините остануваат непроменети
Регулаторната комисија за енергетика, водни услуги и услуги за управување со комунален отпад донесе oдлука со која се врши намалување на малопродажните цени на нафтените деривати во просек за 0,53 % во однос на одлуката од 7.5.2024 година.
Од 10.5.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 86,00 (денари/литар)
Моторен бензин ЕВРОСУПЕР БС-98 – 88,00 (денари/литар)
Дизел-гориво ЕВРОДИЗЕЛ БС (Д-Е V) – 74,50 (денари/литар)
Масло за горење екстра-лесно 1 (ЕЛ-1) – 74,00 (денари/литар)
Мазут М-1 НС – 44,609 (денари/килограм)
Малопродажната цена на „мазутот М-1 НС“ се намалува 1,223 денар/кг и сега ќе изнесува 44,609 денари/кг.
Малопродажните цени на бензините ЕВРОСУПЕР БС-95 и ЕВРОСУПЕР БС-98, како и на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) не се менуваат.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините 2,939 %, кај дизелот 1,523 %, кај екстра-лесното масло 1,341 % и кај „мазутот“ намалувањето е 3,608 %.
Курсот на денарот во однос на доларот во изминатиот период по кој беа формирани цените со претходната пресметка е понизок 0,015 %.