Економија
(Видео) Трипуновски: СДС, Ковачевски и Николовски целосно го уништија земјоделството

Земјоделството никогаш не било полошо како во изминатите седум години. Седум години земјоделците се целосно заборавени од Владата на СДС, Димитар Ковачевски и Љупчо Николовски. Се сменија тројца министри и секој најавува подобрување на земјоделството, но резултати до ден-денес нема“, рече Цветан Трипуновски, претседател на Комисијата за земјоделство, шумарство и водостопанство на ВМРО-ДПМНЕ.
„Земјоделците едвај преживуваат, а повеќето од нив веќе ги напуштаат нивите бидејќи не само што трудот и маката им се невреднувани туку и се потценети.
Најдобар показател дека ситуацијата во земјоделството изминативе години е катастрофална покажаа протестите на земјоделците во Република Македонија, кои бараа помош од Владата на СДС и од Николовски. И, наместо помош, добија обвинувања дека протестите биле партиски и дека некој ги користи за политички поени.
СДС, Николовски и Ковачевски, наместо вината да ја бараат во себе за хаосот и пустошот во земјоделството, ги потценуваат земјоделците, кои со својата чесна работа заработуваат за себе и за своите семејства за да ги прехранат.
Од седумгодишното владеење на СДС, Ковачевски и Николовски ситуацијата во земјоделството е следна: ненавремена исплата на субвенциите и намалување на субвенциите; несигурен пласман и ниски цени за земјоделските производи во сите земјоделски гранки; проблеми со наводнување на земјоделските површини; нерамноправна распределба на земјоделското земјиште, односно наместо земјоделците да го добијат земјоделското земјиште, тоа завршува кај лица блиски до Николовски и до власта. Македонија стана увозно зависна од храна, која моли и купува храна од соседните земји, а граѓаните јадат небезбедна храна со потврдено присуство на пестициди; ненавремено справување со африканската свинска чума; граѓаните плаќаат скапо огревно дрво, а тендери за преработка на опожарените дрва земаат блиски фирми до власта и Николовски;
Николовски потпишуваше договори за доделување земјоделско земјиште по багателни цени; криминал и злоупотребување со ИПАРД-фондовите; унапредување партиски лица блиски до Николовски и вработување кадри на СДС.
На само еден месец пред гласањето на техничка влада, СДС и Ковачевски сакаат да си го озаконат предизборниот поткуп и преку таканаречениот антикризен пакет, само на неколку земјоделци ќе им дават по 1.000 денари, и тоа сѐ до завршување на изборите.
Седум години ги заборавија, а сега на само неколку месеци пред избори ќе им делат по 1.000 денари.
Нивните 1.000 денари нема да им помогнат не само на земјоделците туку и на граѓаните нема да им помогнат. Земјоделците не бараат милост, туку бараат достоинтсвени цени за земјоделските производи што ги произведуваат.
Им порачуваме дека нивните нечесни и дволични игри се препознаени од земјоделците. СДС веќе нема поддршка од граѓаните и тоа е јасно.
Со еден збор, во земјоделството никогаш не било полошо. Но, важно е на парламентарните избори да ги поразиме.
ВМРО-ДПМНЕ има план, визија, стратегија и проекти за земјоделците и ќе почне со реализација веднаш по формирањето на идната влада.
Време е за промени. Време е да се стави крај на поразителните политики на Владата на СДС, Ковачевски и Николовски“, изјави Цветан Трипуновски, претседател на Комисијата за земјоделство, шумарство и водостопанство на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.
Економија
Вреди: Поддршка за 200 нови зелени работни места во микро, мали и средни претпријатија

Од Вреди како коалициски партнер на Владата денеска објави историска мерка за поддршка на создавање нови работни места преку зелени инвестиции, во соработка со Министерството за економија и труд и Агенцијата за вработување.
Оваа мерка ќе овозможи вработување на 200 невработени граѓани во микро, мали и средни претпријатија, кои ќе добијат финансиска поддршка преку неповратен грант од 250.000 до 750.000 денари, во зависност од бројот на новите работни места: 250.000 денари за едно работно место, 500.000 за две и 750.000 за три.
Грантовите ќе овозможат компаниите да инвестираат во нова опрема и машини, софтвер и лиценци, како и технологии за обновлива енергија и материјали за енергетска ефикасност. На тој начин, мерката создава не само работни места, туку и зелени работни места кои придонесуваат за одржлива економија.
Јавниот повик е отворен за сите микро, мали и средни претпријатија кои ги исполнуваат законските услови, со приоритет за стратешките сектори: преработувачка индустрија, земјоделство, шумарство, водостопанство, водоснабдување и управување со отпад, градежништво и транспорт. Апликациите можат да се поднесуваат до 1 септември секој работен ден од 08:00 до 14:00 часот во Центрите за вработување низ целата земја, а сите информации се достапни на веб-страницата на Агенцијата за вработување.
„Ова е чекор кој покажува дека владата не се мери со слогани, туку со резултати. Инвестираме во вработување, развој, зелена економија и безбедна иднина за сите. Ова е промената што ја ветивме – влада која работи со срце и визија“, се наведува во соопштението.