Заменик-министерката за финансии, Гордана Димитриеска-Кочоска, ја става во ризик долгодишната соработка меѓу банката и нашата земја, било утврдено на денешната владина седница на која како гостин учествувала и претставничката на нашата земја во Светска банка, Нина Фити-Неделковска. За таа цел, велат од Владата, ќе биде побарано мислење од ДИК за нејзиното работење.

„Владата на денешната седница, со цел да се одблокира потпишувањето на договорот со Светска банка за поволен заем во висина од 90 милиони евра од страна на дополнителната заменик-министерка за финансии Гордана Димитриеска-Кочоска, организираше расправа на која како гостин учествуваше и претставничката на нашата земја во Светска банка, Нина Фити-Неделковска, која објасни дека одолговлекувањето на потпишувањето на договорот ја става во ризик долгодишната соработка меѓу банката и нашата земја, особено во делот на исклучително доброто искуство во финансиската поддршка на социјалните и општествено одговорните политики во последните неколку години“, соопштија од Владата.

Аргументите изнесени на седницата, додаваат од таму, како и исклучителниот јавен интерес за потпишување на овој поволен аранжман со Светската банка, не биле доволни за дополнителната заменик-министерка за финансии Димитриеска-Кочовска.

Со договорот за заем, средствата во висина од 90 милиони евра се наменети за зајакнување на капацитетите на здравството за справување со Ковид-19, за набавка на медицинска опрема, за финансирање на придонесите за здравствено осигурување за невработените и за ранливите групи, за финансирање на привремената поддршка за невработените со обезбедување паричен надоместок за оние што ги изгубиле работните места во кризата, за привремената социјална помош на посиромашните граѓани кои пред кризата не ги исполнувале условите, како и за поддршка за работниците што биле одјавени од нивните работодавачи и кои добиваат надоместоците од осигурување во случај на невработеност,

„Со оваа своја постапка, да одбие да го потпише договорот за заемот од Светска банка, беше истакнато на седницата, дополнителната заменик-министерка за финансии Гордана Димитриеска-Кочоска ги доведува во сериозен ризик реализацијата на овие иницијативи за зајакнување на здравството и за поддршката на социјално ранливите категории граѓани, сега посебно погодени од кризата, и во таа насока е донесен заклучок да биде побарано мислење од Државната изборна комисија за оваа опструкција во работењето на Владата од аспект на членовите од Законот за Влада кои се однесуваат на изборот и на работењето на техничката, односно преодната влада“, соопштија од Владата.