Економија
ВМРО-ДПМНЕ: СДСМ тера гола политика, со минимална или со просечна плата не може да се наполни потрошувачката кошница

Додека Димитар Ковачевски мести криминални тендери за изградба на коридорите 8 и 10д, додека државата губи над 40 милиони евра поради пропадната еврообврзница и неизграден клинички центар, СДС се фали дека ги покачиле минималната плата и пензиите, а граѓаните тонат во сиромаштија и беда. Над 500.000 наши сограѓани живеат на прагот на сиромаштијата, се вели во соопштението од ВМРО-ДПМНЕ.
Од партијата додаваат дека само забегана, неспособна влада и трајно неспособен премиер како Ковачевски може да се фали дека има покачување на минималната плата во време кога државата се соочува со двоцифрена инфлација.
Според ВМРО-ДПМНЕ, инфлацијата во Македонија како резултат на неспособноста на Владата изнесува вртоглави 17,1 проценти и ја јаде вредноста на парите. На едно четиричлено семејство за еден месец, да ги задоволи основните животни потреби за храна, сметки за домување, облека, обувки и лекови, потребно му се 50.799 денари, што значи дека со една минимална или просечна плата во државата не може да се наполни ниту една потрошувачка кошница.
Во соопштението се вели дека Владата замрзна само неколку цени на прехранбените производи, а сите други цени стигнаа до плафон. И ова е задоцнета мерка, од која никаков бенефит немаат граѓаните.
Граѓаните едвај врзуваат крај со крај, ако навистина СДС и Ковачевски водат грижа за квалитетот на живот на граѓаните, тогаш само со реален раст на платите и пензиите ќе го зачуваат стандардот на граѓаните.
СДС и Ковачевски тераат гола политика. СДС и Ковачевски не може да ја согледаат вистинската состојба. Ним единствен интерес им се криминалот и бизнис-зделките.
Што побргу заминат, толку подобро е за граѓаните и државата. Потребни се промени, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дурмиши за новата потрошувачка кошничка: ќе служи за градење политики поврзани со минималната плата и ќе се усогласи со европските стандарди

На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Економија
Трипуновски: Откупните цени за пиперката се зголемени – прва класа ќе се откупува по 45 денари за килограм

Откупните цени за пиперката се зголемени – прва класа ќе се откупува по 45 денари за килограм, изјави министерот за земјоделство, шумарство и водостопанство, Цветан Трипуновски.
„На состанокот се договорија откупните цени по класи за пиперката. За прва класа откупната цена на пиперката изнесува 45 денари, за прва-втора класа е 35 денари, за втора класа откупната цена изнесува 20 денари, а за трета класа откупната цена ќе биде 15 денари”, појасни министерот.
Тој посочи дека тоа се почетните цени со кои што ќе започне откупот на пиперката за реколтата 2025 година.
„Пиперката во Македонија се одгледува во два региони – струмичкиот и прилепскиот регион. Бербата треба да биде во договорен период за да не се соочиме со зголемена количина на берба на пиперка во текот на денот и да имаме застој во откупот”, додаде министерот Трипуновски.
Министерот истакна дека оваа година откупните цени за пиперката се зголемени во однос на минатата година.
„Текот на откупот ќе го следиме преку Државниот инспекторат за земјоделство. Како Министерство стоиме на располагање, а трендот на зголемување на земјоделското производство треба да продолжи и понатаму”, посочи тој.
Економија
Владата работи на зголемување на просечната плата, најави Мицкоски

Претседателот на Владата, Христијан Мицкоски, одговарајќи на новинарско прашање во врска со растот на платите во државата, со оглед на најновите статистички податоци, според кои просечната нето плата бележи раст и изнесува 45.800 денари, изјави:
„Прво што сакам да кажам е дека и тоа не е доволно. Дека треба да биде уште поголема просечната плата, и во таа насока продолжуваме, како Влада, да работиме. Но и самиот факт и бруто и нето, од просечната плата растат повеќе од 11% е демант за сите оние, би рекол, некрофили во рамките на опозицијата, кои што изминатиов период континуирано конструираа и лиферуваа лаги во јавноста, дека платите не растеле, дека платите стагнирале итн. Но овие податоци коишто пристигнуваат се само доволен доказ дека тие, освен тоа што не говорат вистина, шпекулираат, конструираат и креираат невистини. Друго ништо не можат да сработат и токму затоа таква е состојбата во опозицијата, и токму затоа народот ја изгуби довербата во нив.“
Владата продолжува да работи, рече премиерот, за граѓаните да имаат уште повисоки примања.
„И нормално, ние како Влада продолжуваме и понатаму да работиме за уште повисоки примања на работниците, затоа што тоа е наша цел, да испорачаме тоа што граѓаните од нас очекуваат.“, објасни Мицкоски.