Економија
Групацијата Триглав ја потврдува прогнозата за планираната годишна добивка
Во првите девет месеци од оваа година Групацијата Триглав реализира 69,9 милиони евра добивка пред даночењето, што е 8 проценти повеќе во споредба со истиот период минатата година.
Имајќи ги превид предвидените можности до крајот на годината, ја потврдува прогнозата за планираниот годишен резултат. Во однос на истиот период од минатата година, во дејноста осигурување остварен е раст на премија на сите пазари и во сите сегменти на осигурување (неживотни, животни и здравствени осигурувања), а зголемен е и опсегот на средства на клиентите со кои се управува. Во 2018 година Групацијата продолжува со спроведување на својата стратегија на раст и развој, со што се поврзани и активностите што Групацијата ги презеде оваа година. Надзорниот одбор на друштвото, на Андреј Слапар, претседател на Управата, му довери петогодишен мандат и ги потврди мандатите на членовите на управата, Урош Иванц и Тадеј Чороли. „Триглав осигурување – Скопје“, членка на Групацијата Триглав, третиот квартал оваа година го заврши со 11 отсто повисока бруто-полисирана премија (18,5 милиони евра) во споредба со истиот период минатата година.
Профитабилно работење. Деветмесечната добивка пред даночење на Групацијата Триглав изнесува 69,9 милиони евра, што е 8 отсто повеќе во споредба со истиот период минатата година. На тој резултат првенствено влијаеше доброто работење во дејноста осигурување, а приносите од инестиции, во согласност со очекувањата, беа пониски во споредба со истиот период минатата година.
Раст на премија на сите пазари и во сите сегменти. Групацијата фактурира 820,2 милиони евра консолидирана бруто-премија, што е 6 отсто повеќе во споредба со истиот период минатата година. Пораст на премија е реализиран на сите пазари на Групацијата. Во Словенија во просек порастот изнесуваше 5 отсто, а на другите пазари 8 отсто. Уделот на премија, фактурирана на пазарите надвор од Словенија, и понатаму јакне за 0,5 процентни поени и изнесува 18,3 отсто. Гледано од аспект на одделни сегменти на осигурување, премиите во неживотни осигурувања се зголемија 6 отсто, премиите од осигурувањата на живот 1 отсто, а кај здравствените осигурувања растот на премија изнесуваше 10 отсто.
Поволен комбиниран коефициент. Во споредба со истиот период минатата година, нето-износите за штети оваа година се зголемени (индекс 101), но нивниот раст видливо заостанува во однос на порастот на нето-приходи од премија (индекс 106). Тоа влијаеше на подобрување на комбинираниот коефициент на Групацијата, кој по третото тримесечје, изнесува поволни 92,4 отсто (94,5 отсто минатата година).
Понизок принос од финансиски инвестиции. На крајот на септември 2018 година Групацијата управуваше со 3,1 милијарди евра финансиски вложувања, кои во согласност со инвестициската политика се соодветно дисперзирани и главно се насочени кон валутна изложеност во евра. Приносите од нив (без приносите од вложувањата на осигуреници на животни осигурувања, кои преземаат инвестициски ризик) се намалија 19 отсто во споредба со истиот период минатата година, што поради минатогодишните еднократни случувања и ниските каматни стапки е очекувано.
Активности на преземање во рамките на стратегијата за раст и развој. Групацијата Триглав се развива и расте органски, но во соодветни околности не ја исклучува активноста на преземање. Оваа година ги потпиша договорите за купување на друштвото Raiffeisen Mirovinsko osiguravajuće društvo на хрватскиот пазар на пензиски осигурувања, купување на словенечкото друштво за управување ALTA Skladi и за купување на преостанатиот удел од 28,1 отсто на друштвото Skupna pokojninska družba, кое дејствува на словенечкиот пазар на доброволни дополнителни пензиски осигурувања.
Претседателот на управата на „Заваровалница Триглав“, Андреј Слапар, изјави: „Со работењето во деветте месеци оваа година сме задоволни, а имајќи ги превид предвидените можности до крајот на годината, ја потврдуваме својата прогноза на планираниот годишен резултат. Групацијата Триглав е финансиски цврста, работи профитабилно и безбедно и со тим од над 5.100 соработнички и соработници доследно ги спроведуваме развојните активности што сме ги зацртале. Како потврда на наведеното е годинашниот кредитен рејтинг А, со стабилна среднорочна прогноза од страна на бонитетната агенцијата S&P Global Ratings.
На својата седница, одржана на 14.11.2018 година, Надзорниот одбор на „Заваровалница Триглав“ го именуваше Андреј Слапар за претседател на управата во следниот петгодишен мандат. Андреј Слапар е носител на функцијата претседател на управата од мај 2013 година. Неговиот следен петгодишен мандат почнува на 12.11.2019 година. Воедно, Надзорниот одбор го прифати предлогот на претседателот на управата и повторно за членови на управата на „Заваровалница Триглав“ ги именува Урош Иванц и Тадеј Чороли. На функцијата членови на управата обајцата стапија во јули 2014 година, со тоа што следниот мандат на Урош Иванц му почнува на 15.7.2019, а мандатот на Тадеј Чароли стапува во сила на 30.7.2019 година. Претседателот на Надзорниот одбор на „Заваровалница Триглав“, Игор Стебернак, изјави: „Надзорниот одбор позитивно ја оценува работата на управата на друштвото. Соработката и меѓусебната доверба помеѓу управата и Надзорниот одбор се добри. Во име на Надзорниот одбор, на управата сакам да ѝ посакам многу успех во остварувањето на стратешките цели на Групацијата Триглав“.
„Триглав осигурување – Скопје“ со поголем раст на премија
„Триглав осигурување – Скопје“ третиот квартал од оваа година го заврши со 11 отсто поголема фактурирана бруто-премија (18,5 милиони евра) во споредба со истиот период минатата година. Растот на премијата се должи на одличните резултати постигнати во доменот на приватното доброволно здравствено осигурување, каде што „Триглав“ обезбеди раст на премија од 47 отсто во споредба со истиот период минатата година.
Главниот извршен директор на „Триглав“, г. Ѓорѓе Војновиќ, е задоволен од резултатите постигнати во првите три квартали од годината. „Добрите перформанси на ‘Триглав’ се должат на експертизата и балансираното управување со компанијата и со сите нејзини процеси, како и на фокусот на клиентите, кој наложува приспособување на понудата на потребите на пазарот и супериорен квалитет на услугите што компанијата ги обезбедува. Имајќи го тоа предвид, на крајот на август воведовме на пазарот нов пакет производи, „Триглав комплет +“, во кој врвната здравствена заштита што ‘Триглав осигурување’ ја нуди е дополнета со осигурување дом и каско-осигурување возила, а притоа обезбедува заштеда и до 40 отсто“, додаде во оваа пригода г. Војновиќ.
„Триглав осигурување – Живот“ е членка на Групацијата Триглав, која почна да работи на македонскиот пазар на крајот на минатата година нудејќи осигурување живот со компонента на штедење. Првата година на пазарот „Триглав – Живо“ активно работи на едукација на јавноста за спецификите и бенефитите од осигурувањето живот што ги нуди и воведување нови производи во својата продуктна палета како би можеле на клиентите да им понудат подобар квалитет на живот и безгрижна иднина.
Водечката позиција на македонскиот пазар на неживотни и животни осигурувања „Триглав“ ја потврди на крајот на вториот квартал остварувајќи пазарен удел од 15,7 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.