Вицепремиерот задолжен за економски прашања, Фатмир Битиќи, и министерот за животна средина Насер Нуредини, кои ја предводат владината делегацијакоја е во дводневна официјална посета на Обединетите Арапски Емирати, утринава во седиштето на Стопанската комора на Дубаи остварија средба со претседателот и извршниот директор Хамад Буамим и потесниот менаџмент на комората.

Во придружба на вицепремиерот Битиќи и министерот Нуредини на оваа средба присуствуваа и амбасадорот на нашата земја во ОАЕ, Абдулкадар Мемеди, директорот на Фондот за иновации и технолошки развој, Фестим Халили, директорот на Агенцијата за промоција и поддршка на туризмот, Љупчо Јаневски, како и претставници на четирите најголеми стопански комори: Антони Пешев (извршен директор на Стопанската комора на Северна Македонија), Трајан Ангелоски (претседател на Сојузот на стопански комори), Неби Хоџа (претседател на Стопанската комора на Северозападна Македонија) и Анета Антова Пешева (Претседателка на МАСИТ), кои допатуваа во Дубаи, за промоција на нашата земја во рамките на свеченоста за Националниот ден на Северна Македонија на Експо Дубаи 2020, кој ќе се одржи денес и за бизнис-конференцијата која ќе се одржува утре.

„Северна Македонија е веројатно земја со најдобри услови за водење на бизнис во Западен Балкан, но и пошироко. Имаме инструменти со кои ги поддржуваме компаниите да инвестираат во производствени погони и во земјата се застапени голем дел на компании кои се во синџирите за снабдување на големите меѓународни автомобилски компании. Со новиот Закон за енергетика и Стратегијата за развој на енергетика до 2040 година, отворивме широк фронт на инвестиции во обновливи извори на енергија, особено фотоволтаици и ветерни електрани, што на среден рок ќе обезбеди стабилно, еколошко и одржливо снабдување со електрична енергија. Гледаме можности за зголемување на соработката и во земјоделското производство, со оглед на тоа што Дубаи и Обединетите Арапски Емирати увезуваат околу 95% од потребите за храна. За унапредување на соработката во  кој било сектор, би било од обостран интерес да се возобнови директната авионска линија Скопје – Дубаи“, потенцираше вицепремиерот Битиќи и упати покана официјална делегација од Стопанската комора да ја посети Северна Македонија за да дознае повеќе за можностите за инвестирање.

Министерот Нуредини истакна дека Северна Македонија презема сериозни чекори за зачувување на животната средина и заштита на природните ресурси кои се важни за сите граѓани, како што се водата и воздухот.

Тој додаде дека се реализираат голем број на комунални инсфраструктурни објекти и пречистителни станици, а во план е да се реализираат и неколку инвестиции во фабрики за преработка на отпад, за унапредување на циркуларната економија и паметно искористување на достапните ресурси.

Соработката помеѓу Северна Македонија и Емиратот Дубаи има потенцијал да се развива со побрза динамика од досегашната, заклучија на состанокот вицепремиерот Битиќи, министерот Нуредини и претседателот на Стопанската комора на Дубаи, Буамим и притоа се согласија да се продолжи меѓусебната комуиникација и да се разменат дополнителни информации на сите нивоа, за да се зголемат можностите за економска соработка.