Економија
„Еуроникел“ втор ден на протести: Исплатете го августовското ДДВ за да земеме плата

Синдикалната организација на „Еуроникел“ упати отворено писмо до Фатмир Битиќи, Сања Лукаревска, Димитар Ковачевски, до градоначалникот на Кавадарци, Митко Јанчев, и до директорот на Комерцијална банка АД Скопје, Хари Костов.
Од таму бараат да се исплати августовското ДДВ за да земат плата.
„Втор ден протестираме во знак на револт и бараме да се исплати августовското ДДВ за да земеме плата, да платиме сметки, кредити, да добиеме здравствено осигурување да може хронично болните да добијат терапија, да може тие што имаат операции да добијат здраствена нега, да може трудниците да добијат породилно боледување, а вие сте и глуви, и неми и слепи додека ние стоиме на патот и молиме не за милост, ами за нашите заработени пари.
Не може ДДВ-то достасано уште во октомври сè уште да не е исплатено на крајот на ноември. А еве веќе и рокот за септемвриското ДДВ е поминат. Не може УЈП да седи врз нашите пари и да бара начини и да нè задолжува со нови даноци сè со цел да не ни ги исплати средствата што ни ги должат. Тоа е нечесно и нечовечно кон 1.000 работници, кон 1.000 семејства, кон нашите деца, кои треба да ги храниме, образоваме, да им обезбедиме здраствена заштита“, се наведува во писмото.
„Почитуван заменик-претседателе Битиќи, почитувана директорке Лукаревска, дојдете на блокадите, погледнете не во очи, слушнете ги нашите маки, но најважно од сè – пуштете ги средствата за ДДВ и ние како луѓе да можеме да однесеме леб дома. Тоа се наши пари. Милостина не бараме.
Ве молиме што побргу пуштете ги средствата што ние чесно ги заработивме. Сите протестираат за поголеми плати, ние протестираме да земеме каква-таква и да добиеме здравствено осигурување“, се додава во отвореното писмо.
Од таму најавуваат дека продолжуваат со блокадите и в понеделник на региналниот пат Градско – Прилеп кај селото Дреново, до целосно разрешување на нивното прашање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дурмиши се сретна со норвешка делегација: Зголемен интерес за норвешки инвестиции во Северна Македонија

Министерот за економија и труд, Бесар Дурмиши, денеска во просториите на Министерството пречека висока делегација од Кралството Норвешка, предводена од амбасадорката Кристин Мелсом, амбасадор на Норвешка за Северна Македонија и Србија, како и претставници на владини институции и познати норвешки компании.
На средбата се разговараше за можностите за проширување на норвешките инвестиции во Северна Македонија, со посебен акцент на Технолошко-индустриската развојна зона Тетово (ТИРЗ Тетово), која е препознаена од норвешката влада како еден од најзначајните инвестициски проекти во регионот.
Министерот Дурмиши истакна дека иако политичките и билатералните односи меѓу двете земји се одлични, економската соработка сè уште не го следи истиот интензитет. Според официјалните податоци, вкупната трговска размена помеѓу Северна Македонија и Норвешка изнесува просечно околу 8 милиони евра годишно – бројка која е релативно ниска во однос на реалниот потенцијал за соработка.
Министерот потсети дека во 2021 година е потпишан Договор за јавно-приватно партнерство со компанијата “Normak Investment Group AD Тетово”. Покрај постоечките инвестиции, како онаа на компанијата LEAR, се најавени и две нови инвестиции, меѓу кои и инвестиција од компанијата “Norsksolar”, која веќе има донесено инвестициска одлука.
Министерот подвлече дека Северна Македонија во моментов привлекува повеќе норвешки инвестиции отколку која било друга земја од Западен Балкан – успех кој ја потврдува довербата и конкурентните предности што ги нуди нашата држава.
Во заклучокот на средбата, министерот уште еднаш го потврди силниот институционален ангажман за подобрување на бизнис-климата, привлекување на странски инвестиции, поддршка на домашните компании и развој на пазарот на трудот, како дел од новите надлежности на Министерството за економија и труд.
Економија
Божиновска: Владата е цврсто определена за зелена иднина

На денешната надзорна расправа во Собранието на тема „Ефектите од аерозагадувањето во Скопје и во другите градови врз здравјето на луѓето и мерките што се преземаат за заштита на јавното здравје“ се обрати министерката за енергетика, рударство и минерални суровини од редовите на ВМРО-ДПМНЕ Сања Божиновска.
Божиновска објасни дека аерозагадувањето е комплексен предизвик и дека Министерството за енергетика, рударство и минерални суровини пристапува кон решавањето на проблемот и тоа со мерки за почисти извори на енергија и одржлив енергетски систем и наведе дел од проектите.
„Министерството за енергетика, рударство и минерални суровини е активно вклучено во реализацијата на повеќе проектни програми од „Планската програма за почист воздух 2024–2030“, кои имаат за цел да го намалат аерозагадувањето преку енергетски решенија. Нашата улога е јасно дефинирана во следните проекти: Греење без емисија- топлински пуми, високо ефикасни котли, когенеративни гасни централни, проект државата не загадува-водиме со пример, такси без директни емисии. Преку овие мерки, Министерството за енергетика, рударство и минерални суровини ја потврдува својата посветеност кон создавање на одржлив и еколошки енергетски систем, кој ќе обезбеди почист воздух и подобар квалитет на живот за сите граѓани“, истакна Божиновска.
Потсети на случајот за набавка на токсичен мазут што бил користен за греење на болници и јавни објекти полно со штетни соединенија и високи нивоа на сулфур и тешки метали.
„Да ве потсетам на последниот случај за кој Обвинителството води постапка, набавка на токсичен мазут што бил користен за греење на болници и јавни објекти во земјава. Во фокусот на истрагата е компанија која во 2023 испорачувала контаминирана нафта. Сериозен здравствен скандал, локалните инспекции утврдиле дека наместо мазут, се користело токсично индустриско масло, полно со штетни соединенија и високи нивоа на сулфур и тешки метали. И тоа не еден туку мрежа на увозници кои, спротивно на законот, испорачувале горива што не ги исполнуваат ниту основните еколошки стандарди а цената, како и секогаш ја плаќаат граѓаните, со своето здравје и со загадената животна средина“, децидна е Божиновска.
На крај додаде дека Владата е цврсто определена за зелена иднина, и интензивно работи на реализација на капитални проекти.
„Го поддржуваме и секој чекор што води кон почист воздух – од користење електрични автомобили, до инсталирање соларни панели на покриви и развој на енергетски задруги каде граѓаните самите ќе можат да произведуваат и користат чиста енергија. Оваа Влада е цврсто определена за зелена иднина. Интензивно се работи на реализација на капитални проекти“, рече Божиновска.
Економија
Исплатени над 100 милиони денари на 7.158 земјоделци

Министерството за земјоделство, шумарство и водостопанство соопшти дека се исплатени 105.002.614,00 денари кон 7.158 лица.
„Денеска се реализираше исплатата на подмерка 1.5 Дополнителни директни плаќања од подмерка 1.4 за остварено производство од домат, пиперка, краставица, корнишон, зелка, грав и компир на отворено и во пластеници од Програмата за финансиска поддршка во земјоделството за 2024 година“, велат од Министерството.
Корисници на оваа подмерка се земјоделските стопанства кои имаат засадени површини со домат, пиперка, краставица, корнишон, зелка, грав и компир и се корисници од подмерка 1.4 од Програмата за 2024 година, а оствареното производство е предадено на регистриран откупувач, вклучително и произведените градинарски култури за потребите на сопствениот преработувачки капацитет или е користено за домашни потреби или е продадено на пазар.