Развојот на земјоделството е стратешки приоритет на Владата предводена од ВМРО- ДПМНЕ. Земјоделците се клучни за руралниот развој и економската стабилност на државата затоа оваа Влада е нивен најголем поддржувач и партнер, рече денеска на прес-конференција Викторија Андоновска од ВМРО-ДПМНЕ.

„Апатичноста на претходната власт изразена преку неисплатени субвенции и афунционални системи за наводнување, сега е веќе минато. За само 15 месеци Владата предводена од ВМРО- ДПМНЕ исплати над 11 милјадра денари за заостанати и тековни субвенции, со што 70.000 земјоделци добија финансиска поддршка. Системите за наводнување пак се оспособени со што навремено е обезбедена вода за наводнување“, кажа Андоновска.

Таа рече дека од неодамна, во подрачните канцеларии на Министерството за земјоделство, шумарство и водостопанство започнато е доделувањето на картици за зелена нафта, мерка која опфаќа речиси 46.000 земјоделци, а за која се издвоени 540 милиони денари.

„Оваа година утврдена е и рекордна откупна цена за двете најзастапени вински сорти на грозје Вранец- 21,3 денари по килограм и Смедеревка- 18,9 денари по килограм. Исто така оваа година за првпат првата и втората категорија на пченица се откупуваше по цена од 12 денари, дополнително на оваа сума треба да се платат и транспортни трошоци и ДДВ од страна на мелничарите“, истакна Андоновска.

Со ВМРО- ДПМНЕ, додава таа, за првпат во државата ќе се откупува домашна пченица за потребите на стоковни резерви и тоа 9.000 тони меркантилна пченица од реколта 2025 година по цена од 13 денари по килограм, без ДДВ.

„Новина е отпочнувањето на кампањата „Македонско најдобро“ која има за цел раздвижување на домашната економија преку помагање на компаниите кои произведуваат и преработуваат македонски производи, како и поддршка на македонските земјоделци кои произведуваат примарни земјоделски производи. Најмаркантен повик е т.н. мерка 50-50, со која се кофинансира набавка на модерна земјоделска механизација. Додека пак јавниот повик за млади земјоделци броеше 254 апликации од кои одобрени се 117. ВМРО-ДПМНЕ ги враќа достоинството и сигурноста на македонскиот земјоделец. ВМРО- ДПМНЕ продолжува со поддршката кон македонските земјоделци затоа ВМРО- ДПМНЕ е вистинскиот избор за твојата иднина!“, вели Андоновска.

Бербата на винското грозје е при крај а состојбата со откупот на терен е алараманта, рече денеска на прес-конференција, Трајан Димковски, претседател на Комисија за земјоделство, шумарство и водостопанство на СДСМ.

„После месец дена од почетокот на откупот над 20 милиони килограми грозје стојат неоткупени. Лозарите се оставени сами, без поддршка од власта, во исчекување дали родот ќе им биде откупен. Ако оваа количина не се откупи во следните неколку дена, грозјето ќе изгуби на квалитет, ќе изгуби во тежина, и дали е тоа целта на Владата на ВМРО ДПМНЕ да грозјето под изговор дека е неквалитетно и како такво биде собрано по многу пониска цена. Затоа и јавно прашуваме дали е ова играта која ја води ВМРО ДПМНЕ“, рече Димковски.

Тој кажа дека Владата ги оставила лозарите на цедило и дозволила винариите да манипулираат и со цените и со откупот на грозјето.

„Деновиве повоторно ветува дека „сѐ ќе било откупено“. Но реалноста на терен е сосема поинаква – откупот се одвива забавено, без јасна стратегија и без одговорност. Манипулациите на власта одат до таму што сега на крај од бербата и откупот најавуваат дека наводно винаријата „ Вардар “ ќе го откупела вишокот грозје – над 20 милиони килограми. Дали владата знае дека оваа винарија последен пат откупувала во 2020 година, и тоа со капацитет од едвај 7 милиони килограми и дали воопшто е познато финансиското портфлио на оваа винарија? Го повикуваме премиерот Мицкоски да излезе на терен меѓу вистинските лозари да ги погледне лозарите в очи, и да понуди реално решение за откуп на грозјето. На лозарите не им треба нов Свед Милк, ново Повардарие, потребна им е вистинска поддршка и конкретни решенија“, рече Димковски.

Оцени дека „оваа влада покажа целосна незаинтересираност за една значајна земјоделска и извозна гранка како што е лозарството од која егзистираат над 11.000 лозарски семејства“.

„Владејачкото мнозинство на ВМРО ДПМНЕ застанаа против лозарите и не го поддржа предлог законот на СДСМ за дополнителна финансиска поддршка за лозарите од 3 денари по килограм грозје и против укинувањето на одредбата која дозволува 8% намалување на откупната цена. СДСМ ќе продолжи да се бори за нивните права, за фер услови и поддршка за секој лозар“, вели Димковски.

Зголемувањето на минималната плата не придонесува за затворање на компаниите и не ја уништува економијата, туку создава услови за развој и отворање на нови компании – покажува анализата на Сојузот на синдикатите на Македонија (ССМ).

Истражувањето, спроведено врз основа на податоци од Централниот регистар, според ССМ, ги демантира тврдењата дека растот на платите води до колапс на компаниите и губење на работни места.

„Газдите ја лажат Владата и јавноста кога тврдат дека ќе се затворат фирмите ако се зголемат платите, а затоа што не му веруваа на ССМ кога јасно и гласно го зборуваше тоа, податоците и фактите од Централниот регистар тоа јасно го потврдуваат и покажуваат дека:
• Во 2022 година, кога минималната плата ( за потсетување, преку протести и штрајкови) ја зголемивме од 15.194 на 18.000 денари, имаше 7.062 новоосновани фирми, а избришани или затворени 5.694.
• Во 2023 година, со зголемување на минималната плата од 18.000 на 20.175 денари, бројот на новоосновани фирми остана 7.062, а избришаните се намалија на 3.372.
• Во 2024 година, со растот на минималната плата од 20.175 на 22.567 денари, имало 6.627 нови фирми, а само 2.891 затворени“, пишуваат од ССМ.

Овие бројки, според синдикатите, јасно докажуваат дека секое зголемување на минималната плата е придобивка, а не закана за економијата и ги побиваат ставовите на газдите и на одредени експерти кои беа прилично гласни на ова поле за да спречат раст на платите.

„Ова е причина повеќе да не се сопре процесот за зголемување на платите, вклучително и зголемување на минималната плата, ова е уште еден силен аргумент за континуиран раст – не само на минималната плата, туку и на сите останати плати!
Работниците не смеат да живеат со минимални примања и да имаат најниски плати во регионот, а Владата е должна да ја поддржи потребата од раст на платите, праведната распределба на профитот и да застане на страната на достоинствениот труд на работниците“, велат од Сојузот на синдикати.

Во соопштението, ССМ испраќа порака и до работодавачите и до Владата: до компаниите – да обезбедат достоинствени плати на работниците; до Владата – да застане зад работниците и да обезбеди зголемување на минималната плата и системски раст на платите за сите.