Економија
Инвестиција вредна над осум милиони евра: Компанијата „Бекамент“ отвори два нови погона и автоматизиран магацин
Во присуство на Потпретседателот на Владата на Република Србија и Министер за Внатрешни работи, Небојша Стефановиќ, Компанијата „Бекамент“ ги отвори новите погони за производство на прашкасти и течни материјали, како и целосно автоматизираниот магацин лоцирани во кругот на фабричкиот Комплекс во Аранѓеловац, Република Србија.
За изградба на производните погони кои се меѓу најмодерните во Европа, вложени се над 8 (осум) милиони евра. Оваа инвестиција ќе овозможи тројно зголемување на производните капацитети, односно во фабриката ќе се произведуваат до 350.000 тони градежен материјал. Новите фабрички погони се целосно автоматизирани – од процесот на производство и пакување, па се до складирањето на материјалите во магацинскиот простор.
Со стартирањето на новите погони и автоматизираниот магацин, компанијата „Бекамент“ ќе има можност за производство на 100 тони прашкасти и 70 тони течни производи на час. Проширените производни капацитети ќе овозможат Компанијата „Бекамент“ да ги задоволи сите потреби на домашниот пазар, како и на пазарите каде се врши извоз, а истовремено, преку автоматизираниот магацин да постави нови стандарди за брзината и квалитетот при достава на материјалите до купувачите.
“Ова е голем ден за компанијата ‘Бекамент’. Зад нас се 25 години успешна работа, години низ кои ги поставивме темелите на идниот развој. Резултат на сето ова е нашата лидерска позиција во сегментот на производство материјали за завршни работи во градежништвото. Благодарение на посветеноста на сите вработени во Компанијата, успеваме да ги оствариме сите зацртани деловни планови и од година во година да продолжиме со трендот на раст, во сите сегменти од нашето работење“, изјави на свеченото отворање на новите погони Александар Чоловиќ, Генерален директор на компанијата „Бекамент“.
Компанијата „Бекамент“ поседува голем број Сертификати (ЕТА Сертификат и ИСО Сертификати: ИСО 9001, ИСО 14001, ИСО 18001) кои потврдуваат дека станува збор за производи со врвен квалитет. Со стекнатите Сертификати, Компанијата Бекамент успешно ги пласира сопствените производи на домашниот, српски пазар, како и на пазарите во Хрватска, Босна и Херцеговина, Македонија, Унгарија, Бугарија, Црна Гора, Словенија и Албанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.